Lúkɩ 4

Dɩ́blʋ̀ɔ̀ sa Zozíi zɔ̀

(Matíe 4.1‑11; Málɩ́kɩ 1.12‑13)

1Blɔ̀blɔ̀zùzùò kwlíi Zozíi jɩ̀, ʋ́ kʋ ɔ́ jɩ̀ lé ɔ́ wlʋ́ Zrʋdɛ́ɛnyié gɔ̀ lé ʋ́ fɔɔ́ zɩkpɩkɔfʋ́ a mnɩ́. 2Mà tányɩɛ́ mʋ́ zuzùò fɔɔ́ mɔ̀ɔmɔ̀ a, Dɩ́blʋ̀ɔ̀ trányɩlɔɔ́ kplala a, yrií a gwlɩ̀ a sɔ́. Ɔ nɩ́ li lé yrié gwlɩ̀ɛ̀sɔ́ɔ́ sralɔ neé, bhʋ́ kleé bhlálɔɔ́. 3Naa bhʋ́ Dɩ́blʋ̀ɔ̀ srʋ ɔ́ mà: «Lagɔ a Yuwliyʋɔ́ ɔ́mɔ́ nɩ̀ ŋwɔ́ɔ cɩ́cása a, nɩ lé cɔ́kpalɩ́bhuó lɩ̀à ká flɔ́ɔbhuo plɩ́.» 4Bhʋ́ Zozíi srʋ ɔ́ mà: «Á jɩ́jrà Lagɔ̀bɔ̀gʋ a mnɩ́ mà: Flɔ́ɔ a múó ʋ̀ nɩ́ nyɔ a lelilɩ ŋwɔ́ɔ.#4.4 A zɛlɩɩ sáà Detro 8.3.»

5Lé Dɩ́blʋ̀ɔ̀ gblálɔɔ́ lagowlú, lé ʋ́ tʋalɔɔ́ kɔ́ zɔ̀ a léyibhlɩɛ́ fɩ́ɛ́ 6lé ʋ́ srʋ ɔ́ mà: «Léyibhlɩɛ́ fɩ́ɛ́ lɩ̀à, mɔ́ɔ á nyɛ́ɛ́, ɛ yà ɛ mnɩ́ a léyrie fɩ́ɛ́ sɔ́, nyɔɔ́ ɩ́ wà a, ɔ́mɔ́ ná kɛ́ɛ́ nyɛ́, ɩ́ yi mɔ̀ mɛ́ nyɛ́. 7Mà nɩ̀ sra fɩ́ɛ́ mɔ́ɔ wlú lé nɩ̀ bʋbɔ̀ mɔ́ɔ a, ɩ̀ yi ʋ́ ɛ́ lɔ̀fɩ́ɛ́ lɩ̀à bhá mɔ̀ kɛ̀ɛ!»

8Bhʋ́, Zozíi srʋ ɔ́ mà: «Ɩ́ jɩ́jrɔ̀ mà: Nà Kanyɔɔ́ ɔ̀ ŋwɔ́ɔ nà Lagɔ a, ɔ́ a múó coco, ɩ̀ kà lé kà bʋbɔ̀, ɔ́ a múó coco, ɔ́ drɩ̀ ɩ̀ kà, lé kà koti sá sra».#4.8 A zɛlɩɩ sáà Detro 6.13.

9Lé Dɩ́blʋ̀ɔ̀ fɔɔ́ Zelízalɛ́mʋ, lé ʋ́ gbláalɔɔ́ Lagɔ̀wlʋ̀ɔ̀ a tàye kʋ́, lé ʋ́ srʋ ɔ́ mà: «Nɩ̀ ŋwɔ́ɔ cɩ́cása Lagɔ a Yuwliyʋɔ́ a, wlʋ́ dɛ́ lagowlú, lé blì lé kwlíi dʋ̀dʋ kʋ́. 10Máà á jɩ́jrà mà:

Lagɔ yi ɔ kplɔkplɔzìzi srʋ lé ɩ́ yi mɔ̀ dɛdɛ̀.

11 Lé ɩ́ yi mɔ̀ glɔ̀gbɩ́ zɔ̀ tʋa lé, nà bhɔɔ́ nɩ́ ka cɔ́kʋ gʋ́zʋ̀. # 4.10‑11 A zɛlɩɩ sáà Lɔlɔ 91.11‑12. »

12Dɩ́blʋ̀ɔ̀ cí saá a, Zozíi srʋ ɔ́ mà: «Á jɩ́jrà Lagɔ̀bɔ̀gʋ a mnɩ́ mà: Nɩ̀ɩ ka lé kà Kanyɔɔ́ ɔ̀ ŋwɔ́ɔ nà Lagɔ a, zɔ̀ saà!#4.12 A zɛlɩɩ sáà Detro 6.16.»

13Dɩ́blʋ̀ɔ̀ bhɩa Zozíi a zɔ̀ sasʋ́ zɔ̀ a, ʋ́ʋ wlʋ́ ɔ́ gɔ̀ lé ʋ́ mʋ gláa ka tányɩ ànɛ a zà.

Zozíi ɔ bhílie nɩ́ ɔ wɔlɩ́ mányɩ

(Matíe 4.12‑17; 13.53‑58; Málɩ́kɩ 1.14‑15; 6.1‑6)

14Wɔlíɛ́ fɩ́ɛ́ lɩ̀à plɩ́ a, Zozíi ɔ́ɔ yrɩ́bha Galilée, Blɔ̀blɔ̀zùzùò kʋ̀ ɔ jɩ̀ a, ʋ pɔ́waá kʋ àyɩ mɔ́ mʋ́, ɩ́ nɩ lé ɔ ŋwnú mʋ bhlɩ́ɛ́ fɩ́ɛ́ jɩ̀. 15Ɔ́ cɩ́a zúfʋcɛcɩghlɩɛ́ a mnɩ́, lé nyʋa falɔɔ́ ŋwnú.

16Zozíi mʋ Nazalɛ́tɩ, mɔ̀ɔmɔ̀ ɔ́ nyniì, ɔ́ mʋ a, Zúfʋnyʋa a nyɔbhleyru ŋnɩ a, ɔ́ mʋ zúfʋcɛcɩwlʋɔ́, sɩ́tɛ̀ mʋ́ ɔ́ nie kɔ́ɔ̀kɔ́. Mà tányɩɛ́ mʋ́ Lagɔ̀bɔ̀gʋ a zɛzɛtanyɩ ŋnɩ a, ɔ́ soglù ɔ́ ká zɛɛ, 17lé á nyɛ́ ɔ́ Lagɔ a nékʋ́cinyɔ Ezayíi a bɔ́gʋ̀ɔ̀. Ɔ́ kalʋ klʋ́ a, wɔlɩdrèè ɔ́ bhli jɩ̀ a, á má ŋwɔ́ɔ mà:

18 Kanyɔ Lagɔ a zuzu kʋ mɔ́ɔ jɩ̀.

Mɔ́ɔ ɔ́ saà, lé ɔ́ cíe lé ká Lagɔ a Námadìè ŋazɩ̀nyʋa srʋʋ̀.

Ɔ́ɔ cíe mɔ́ɔ lé,

Nyʋaá kʋ̀ bhlí a, a ká flíi,

Nyʋaá à nɩ́ yɛ́ kʋ́ a, a yɩ́ ká wlée,

Nyʋaá á bhlile géyisa kʋ́ a, a ká flíi. # 4.18 A zɛlɩɩ sáà Eza 61.1‑2.

19 Lé Kanyɔ Lagɔ a nyúpalʋkpaá a yruó ʋ̀ yie ŋnɩ ka a,

Ká amɔ mʋ́ pápa a. # 4.19 A zɛlɩɩ sáà Levíi 25.10.

20Tányɩɛ́ mʋ́ Zozíi bhɩa zɛlɛ zɔ̀ a, ɔ́ɔ bhle bɔ́gʋ̀ɔ̀ lé ɔ́ ŋwʋ́ʋ zúfʋcɛcɩwlʋɔ́ mnɩ́ a cóyʋɔ́ wlɩ lé ɔ́ bɔ́ɔ sá. Mà nyʋa fɩ́ɛ́ kʋ̀ zúfʋcɛcɩwlʋɔ́ mnɩ́ a, a yɩ́ kʋɔ́ jɩ̀. 21Bhʋ́ ɔ́ srʋ á mà: «Zɩmnɛ́ a yruó lɩ̀à, wɔlɩ́ɛ́ ɩ̀ jɩ́jrɔ̀ lɛ́ bɔ́gʋ̀ɔ̀ lɩ̀à mnɩ́, lé a nú lɛ́ a, ɩ́ ya ŋnɩ.» 22Mà wɔlɩ́ɛ́ Zozíi sa mɔ̀ɔ lé tɔ́gɩ̀sɩ̀ɛ̀ ɔ́ pá a, ɛ námɛ mna nyʋaá fɩ́ɛ́ neé, ɩ́ nɩ lé á yráyralɛ, á nie: «Bhè Zɔ̀zɛ́fʋ a yʋ́ɔ́ mɔ́ nɩ́ɩ dɛ́ kʋʋ?» 23Bhʋ́ Zozíi srʋ á mà: «Ɩ́ yì saá cémʋ́ a na ká mɔ́ɔ núnúó kʋ́ páa lé a ká cí mà: Dɔ̀tá à, mɔ̀ mɔ̀glʋ̀ yalɩma ɩ̀ nyòku! Lé a ká sáà mɔ́ɔ srʋ mà: Wɔlíɛ́ fɩ́ɛ́ ɩ̀ nɩ Kapɛnayʋ́mʋ a, à núí! Na, nɩ sáà mɩ́ dɛ́ ɩ̀ bhlé.» 24Lé Zozíi srʋ á sɔ́kʋ́ ɔ́ anɩ́: «Ná srʋɛ yɩ́ amɔ cɩ́cása mà, Lagɔ a nékʋ́cinyɔ nɩ kʋ ɔ bhlé a, ɔ bhílie nɩ́ mányɩlɔɔ́. 25A dʋdʋɛɛ, cɩ́cása a mnɩ́ náa srʋɛ amɔ mà, Lagɔ a nékʋ́cinyɔ Elíi a tanyɩɛ́, lagɔɔ́ gʋɔ klʋ́, lé nyú nɩ́ bhla àààn, lé ɩ́ nɩ lɩkpɩ ta lé cɩ́ gbɩ́flɔ́. Lé kɔkwɛ kádɛ pla bhlɩ́ɛ́ fɩ́ɛ́ jɩ̀, bhʋ́ a tanyɩ, kʋ́zrɩ̀ŋwnàà kʋ̀ Izrayɛ́lɩ a, a nɩ́ bɛ́, 26mà sɩ́tɛ̀ ɩ́ kʋ lé Lagɔ nɩ́ ɔ nékʋ́cinyɔ Elíi Izrayɛ́lɩ a kúzrɩ̀ŋwnàà a nyièdɩ a kʋ́zrɩ̀ŋwnɔ gɔ̀ cíe, mà Sidɔ́ɔ a dúo á wlele Salɛtáa a, mɔ̀ a kʋ́zrɩ̀ŋwnɔ gɔ̀ Lagɔ cíe Elíi.#4.26 A zɛlɩɩ sáà 1 Léyuo 17.8‑16. 27Lagɔ a nékʋ́cinyɔ Elizée a tanyɩ, sɩ́tɛ̀ mʋ́ kosugɔ̀bhlànyʋa zù wá Izrayɛ́lɩ, mà sɩ́tɛ̀ ɩ́ kʋ lé Elizée nɩ́ Izrayɛ́lɩ a kosugɔ̀bhlànyʋa a nyièdɩ a kosugɔ̀bhànyɔ yalɩma, mà lówùdùyʋ Naamáa, Silíibhlɩ kʋ́ a nyɔ kosugɔ̀bhlànyɔ bhlá wá a, ɔ́ a múó Elizée yalɩma wá.#4.27 A zɛlɩɩ sáà 2 Léyuo 5.1‑14.»

28Mà wɔlɩ́ɛ́ Zozíi cí a, ɩ́ ŋáta nyʋaá fɩ́ɛ́ kʋ̀ zúfʋcɛcɩwlʋɔ́ a mnɩ́ a, di. 29Ɩ́ nɩ lé á soglù lé á bhlio kʋ́, lé á fɔɔ́ kíkéé jɩ̀ Nazalɛ́tɩdùò bɔ́ɔ a, mɔ̀ á fɔɔ́ a kɔ́ɔ́ gbàzrʋ̀ a mnɩ́ súù. 30Mà ɔ́ blée nyʋaá nyièdɩ lé ɔ́ mʋ.

Zozíi sa nyɔ nyumozùzu jɩ̀

(Málɩ́kɩ 1.21‑28)

31Ɩ̀lɩa plɩ́ a, Galiléebhlɩ a dúo á wlele Kapɛnayʋ́mʋ a, Zozíi mʋ mɔ̀ɔ, lé Zúfʋnyʋa a nyɔbhleyruó kʋ́, ɔ́ cɩ́a a zúfʋcɛcɩwlʋ a mnɩ́. 32Mà cémʋ́ ɔ́ cɩ́alɛ a, ɩ́ la a mɔ̀ɔ a nyʋa lɔlɔ kʋ́, máà ɔ cícíwɔlɩɛ́ kplɔɔ̀ lé ɩ́ gbɔ́ nyʋa a di.

33Mà zúfʋcɛcɩwlʋɔ́ mnɩ́, nyɔ kʋ mɔ̀ɔ ɔ́ ka nyumozùzu jɩ̀, ɔ́ bhɩa wɔlɩ́, 34ɔ́ anɩ́: «Ààà! Ɔ̀ wle mɔ̀ dɛ́ à Nazalɛ́tɩyʋ Zozíi? Nà yi dɛ́ lé kà àmɔ̀ bhlá áa? Ɩ́ yi mɔ̀ námasa, Lagɔ a Kplɔkplɔnyɔɔ́ ɩ̀ ŋwɔ́ɔ.» 35Ɩ́ kʋ bhlà ɔ́ neé bhè Zozíi gáa nyumozʋ̀zùò kʋ́, ɔ́ anɩ́: «Bhli né kʋ́, lé wlʋ́ nyɔɔ́ jɩ̀!» Ɔ́ cí bhlà sa mɩ́ bhè, nyumozùzùò páa nyɔɔ́ sá jrè a nyièdɩ fɩ́ɛ́ lé ʋ́ wlʋ́ɔ́ jɩ̀, mà lɛ́ nɩ́ nyɔɔ́ bhlá. 36Mà nyʋa fɩ́ɛ́ neé ya á mna, lé á srʋ srʋ á pʋpʋ a nyièdɩ mà: «Niwɔlɩ gbá kʋ̀ sɩ́tɛ̀ aa? Bhè ɩ̀ kɩ̀ɩ fɩ́ jɩ́lɛ nyumozìzi lé ɩ́ gúé à?» 37Wɔlɩɛ́ lɩ̀à nɩ lé Zozíi a ŋnɩ́ bhli bhʋ́anɩ bhlɩ́ɛ́ a lɔ̀fɩ́ɛ́.

Zozíi yalɩma gupuonyʋa kɔ́kɔ́mnɩ́

(Matíe 8.14‑17; Málɩ́kɩ 1.29‑34)

38Zozíi wlʋ́ zúfʋcɛcɩwlʋɔ́ a mnɩ́ áa, ɔ́ɔ pla Simɔ́ɔ a gbó. Mà ɔ́ mʋ a, ɔ́ ŋnɩ Simɔ́ɔ a ŋwʋ́trɔ wɔtrɔkukó mʋ́, lé á srʋ Zozíi mà ɔ yilo kʋ́. 39Lé Zozíi mʋ lé ɔ́ gbíó gɔ̀ lé ɔ́ gáa wɔtrɔɔ́ kʋ́ lé ʋ́ wlʋ́ɔ́ mʋ́. Ŋwnɔ́ɔ́ so kɔ́ɔ̀kʋ́ glù a, ɔ́ɔ bháa ʋ́ a wɔlɩ́ a yɩ́gɔ̀ ŋwʋ̀ŋwʋ́ɛ́ kʋ́.

40Tányɩɛ́ mʋ́ yrʋ́ bhɩa lagɔɔ́ a, nyʋaá fɩ́ɛ́ gupuonyʋa kʋ gɔ̀ a, gúó yi céana kʋʋ, áa faa Zozíi drɩ̀ɩ̀ lé ɔ́ gbɛlaá glɔ̀gbɩ́ jɩ̀ lé á yalɩmalɛ. 41Nyumozìzi sa yrè lé ɩ́ wlʋ́ɛ́ gupuonyʋa kɔ́kɔ́mnɩ́ jɩ̀, ànɩ nie: «Mɔ̀ ŋwɔ́ɔ lɛ́ Lagɔ a Yuwliyʋɔ́!» Mà Zozíi gáalɩɩ́ kʋ́, máà ɩ́ yì saá mà ɔ́mɔ́ ɔ̀ ŋwɔ́ɔ Kláyɩ́sɩ, ɔ́ nɩ́ nyɩ́ɩ́ mɔ̀ɔ sa da.

Zozíi pá tɔ́gɩ̀sɩ Zúfʋ cɛcɩ a mnɩ́

(Málɩ́kɩ 1.35‑39)

42Zrɩ̀ɩ zɩ kɔ́ɔ̀kʋ́ a, Zozíi wlʋ́ʋ dú gwá lé ɔ́ mʋ dɛ́ɛ́ nyɔ nɩ́ kʋ a, mà sɩ́tɛ̀ ɩ́ kʋ bhè nyʋaá mʋ́mɔɔ́ lé á yɔ́ɔ́, mà á yɛ́ ɔ́ a, a nɩ́ yrá yɩ́ la lé ɔ wlʋ́laa gwá. 43Bhʋ́ ɔ́ srʋ á mà: «Ɩ ka sáà lé ɩ plɩ́ɩ dí ànɩ a mnɩ́, lé ká Lagɔ pɔ́wa a Námadìè mɔ̀ɔ saà, máà ɩ́mɩ́ ka ŋnɩ́ lé Lagɔ cíe mɔ́ɔ.» 44Lé Zozíi bháʋ́ Lagɔ a Námadìè a wɔlɩ́ a cícíé kʋ́ Zudée a zúfʋcɛcɩghlɩɛ́ a mnɩ́.

Currently Selected:

Lúkɩ 4: NEY

Highlight

Copy