Lúkɩ 5

Zozíi wle ɔ tagà kʋjɩ̀nyʋ̀àà

(Matíe 4.18‑22; Málɩ́kɩ 1.16‑20)

1Zozíi kʋ tányɩ a múó, Zenezalétɩ a nyíé gɔ̀, lé nyʋa bhúbhuoloó, áa yi a ká Lagɔ̀wɔ̀lɩ̀ɛ̀ nyúkwlí pʋ. 2Ɔ nɩ náà dʋdʋɛ a, gɔ́kádɩ a sɔ́, kʋ ʋ́ nyíé gɔ̀, ɩ́ kanyʋa kʋ sáà ʋ́ á wɔlɔ a pílɩ. 3Lé Zozíi pla Simɔ́ɔ a gɔ́lʋ́ a múó a mnɩ́ lé ɔ́ srʋ ɔ́ mà ɔ lú ɔ wlʋ́ tòyipɛ nyígbʋ̀gbʋ́ɔ́ gwá. Lé ɔ́ plɩ́ɩ gɔ́lʋ́ɔ́ mnɩ́ lé ɔ́ bɔ́ɔ sá, lé ɔ́ bháʋ́ nyʋa a cɩ́acʋ́ kʋ́.

4Ɔ́ bhɩa cícíé zɔ̀ a, ɔ́ srʋ Simɔ́ɔ mà: «Lú à mʋ nyíé a dɛ́ɛ̀ trʋ mʋ́ a, lé a páa ʋ́ a píloó!» 5Bhʋ́ Simɔ́ɔ srʋ ɔ́ mà: «Másɛɛ̀, à kʋ̀ dɩ́bɩ̀ɛ̀ lɩ̀à pílɩ a páada àààn lé zrɩ̀ɩ zɩ, à nɩ́ lɛ́ yɛ́. Mà cémʋ́ yà yɩ́ lɛ́ cí a, ɩ́ yi yɩ́ mɩ́ páa.» 6Mà á páa pílɩɛ́ a, zrì á bhla a, ɩ́ zumole plɩ́ gɔ̀, ɩ́ ka ŋnɩ́ lé pílié yrayrɔɔ̀. 7Ɩ́ nɩ lé á pá a lía kʋ̀ gɔ́lʋ́ ànʋ a mnɩ́ a, sɔɔ́, a ká yi á ká a kʋ́ fa. Á yi lé a yà sɔ́ jri pílié lé á yíe gɔ́lɩ́ɛ́ sɔ́ɔ́ zrì kʋ́, mà zrìè a zumole ka ŋnɩ́ lé gɔ́lɩ́ anɩ vlɔ. 8Mà tányɩɛ́ mʋ́ Simɔ́ Pɩ́ɛ́lɩ yɛ́ wɔlɩ́ɛ́ a, ɔ́ sra Zozíi a drɩ̀ koti sá, lé ɔ́ srʋ ɔ́ mà: «Kanyɔɔ̀, Ɩ́bhìè wlʋ́ mɔ́ gwá, mà yáa nyumoé nɩ!» 9Mà zrìè a zumole la Simɔ́ɔ yà nyʋa ɔ yà sɔ́ kʋ ʋ́ a, sɔ́ ŋanɩmɛ kʋ́. 10Bháa yɩ́ Zebedée a yúó Zákɩ yà Záan sɔ́ jɩ̀, lé kà Simɔ́ɔ a nɩ nyʋaá sɔ́ jɩ̀ ŋnɩ. Lé Zozíi srʋ Simɔ́ɔ mà: «Simɔ́ɔ̀, ŋanɩmɛ ná bhlá mɔ̀, mà bháa yɩ́ lɛ́ zɩmnɛ́ jɩ̀ a, nyʋa a jrinyɔ nà kà yɩ́ plɩ́.» 11Zozíi srʋ lɛ́ sɩ́tɛ̀ Simɔ́ɔ a, áa jri yɩ́ gɔ́lɩ́ɛ́ kíké wlú lé á tɩ ʋ́ lɩ́ɛ́ fɩ́ɛ́ lé á jɩ́ ɔ́ kʋ́.

Zozíi yalɩma kosugɔ̀bhànyɔ

(Matíe 8.1‑4; Málɩ́kɩ 1.40‑45)

12Yruú kʋ̀ a, Zozíi kʋ dú a múó mnɩ́ lé nyɔ a múó kosugɔ̀gu bhlá a, yi plɩ́ ka. Mà tányɩɛ́ mʋ́ ɔ yɩ́ bhli Zozíi jɩ̀ a, ɔ́ sra ɔ́ drɩ̀ koti sá lé ɔ́ srɔɔ wlú lé ɔ́ srʋ ɔ́ mà: «Kanyɔɔ̀, nɩ̀ yrá a, ɩ̀ yi mɔ́ yalɩma.» 13Ɔ́ cíí a, Zozíi fa sɔɔ́ lé ɔ́ gbɔ́ ɔ́ lé ɔ́ srʋ ɔ́ mà: «Ɩ́ yrá lé kà yalɩma!» Á kʋ dáamúó lé kosugɔ̀gùò wlʋ́ nyɔɔ́ mʋ́. 14Lé Zozíi srʋ ɔ́ mà: «Bhli né kʋ́ nàa srʋ nyɔ lé mʋ Lagɔ̀bʋ̀bɔ̀nyɔ gɔ̀ lé ɔ ká mɔ̀ dʋdʋ̀ lé Moyízɩ a Jràmáá a bʋbɔ̀lɩ̀ɛ̀, ɔ́ cɛ́cɩ wá a, kɩɩ saà.#5.14 A zɛlɩɩ sáà Levíi 14.2‑32. Ɩ́mɩ́ nà kà nɩ lé, nyʋa ká saá yɩbhlɩ mà, yà yalɩma.»

15Ɩ́ nɩ lé Zozíi a ŋwnú mʋ wá. Lé nyʋa ŋnɩlɔ̀ wlú lé á pʋ ɔ́ nyúkwlí lé á yio gɔ̀ lé ɔ́ yalɩmalaá. 16Mà tányɩ kʋɛ ʋ́ lé Zozíi gbʋ́gbʋɛ nyɔ nɩ́ kʋ a, lé ɔ́ bhibhie.

Zozíi yalɩma kplákplányɔ

(Matíe 9.1‑8; Málɩ́kɩ 2.1‑12)

17Zozíi kʋ yruú a múó kʋ́ Lagɔ̀wɔ̀lɩ̀ɛ̀ a cɩ́ada lé Falizɩ́ɛnyʋa yà lɔ̀ a másɛnyʋa sɔ́ wlʋ́ Galiléebhlɩ yà Zudéebhlɩ sɔ́ a dí a mnɩ́ lé á yi á kʋ jrè gɔ̀ nyʋa a nyièdɩ, àna wlʋ́ sáà Zelízalɛ́mʋ lé á yi. Mà Kanyɔ a pɔ́waá kʋ̀ Zozíi jɩ̀ a, á nie lé gupuonyʋaá fɩ́ɛ́ yie a, á yalɩmalɛ. 18Á dʋdʋ̀ a, kplákplányɔ kʋ gbàpʋ́, nyʋa gbɩdɩɔ́ á yie, nyʋaá yrá lé á ká wlʋɔ́ a mnɩ́ pla lé a kɔ́ Zozíi drɩ̀ púo. 19Mà nyʋa a zumole ka ŋnɩ́ lé a nɩ yɛ́ cásɩ a ká plɩ́, ɩ́ nɩ á lé a yɔ̀sɔ́ gblà wlʋɔ́ a wlú lé á sʋʋ́ jɩ̀ zíkipɩʋ lé a yɔ̀sɔ́ blée mɔ̀ lé á kwlíi Zozíi drɩ̀, jrè a nyièdɩ. 20Zozíi yɛ́ nyʋaá a fádùò a, ɔ́ srʋ gupuonyɔɔ́ mà: «Mɔ̀, nàa nyumoé ya mɔ̀ cielo!»

21Wɔlíɛ́ Zozíi srʋ gupuonyɔɔ́ a, ɩ́ nɩ lé lɔ̀ a másɛnyʋaá yà Falizɩ́ɛnyʋaá sɔ́ fafa wɛ́ gɔ̀, ɩ́mɩ́ ŋwɔ́ɔ mà: «Nyɔ́ gbá kʋ̀ dɛ́ ɔ ŋáta Lagɔ a ŋnɩ́ àa? Nyɔ gbá yi mi lé ɔ̀ yi ɔ́ liyʋ a nyumoé cie áa? À nɩ nɩ́ Lagɔ a múó coco ŋwɔ́ɔ a!» 22Mà cémʋ́ Zozíi yɩbhlɩ wɔlɩ́ɛ́ á bhobho a, ɔ́ srʋ á mà: «Ɛ̀ kʋ̀ʋ lé a bhobho sɩ́tɛ̀ a wɔlɩ́ a? 23Ká kplákplányɔ srʋ mà ɔ́ nyumoé yɔɔ́ cielo, bhè kɔ́ srʋ mà ɔ soglù lé ɔ ná a, wɔlɩdrìè sɔ́ɔ́ lɩ̀à a mnɩ́, àna gbá tɛ́ mʋ́ à? 24A ka lé a ká saá yɩbhlɩ mà, Nyɔɔ́ a Yuwliyʋɔ́ ka dɛ́ dʋ̀dʋ kʋ́ pɔ́wa lé ɔ́ ká nyʋa a nyumoé cie.» Lé ɔ́ srʋ kplákplányɔ mà: «Náa srʋɛ yɩ́ mɔ̀, soglù! Bhá ʋ́ nàa gbàpʋ́ɔ́ kà gbó mʋ!» 25Nyɔɔ́ so kɔ́ɔ̀kʋ́ glù a, nyʋaá fɩ́ɛ́ a drɩ̀ a, gbàpʋ́ɔ́ jɩ̀ ɔ́ pʋ́ la a, ɔ́ bháʋ́ mʋ́, ɔ́ kʋ Lagɔ a ŋwnú fada àààn, lé ɔ́ ŋnɩ ɔ gbó. 26Neé mna nyʋa fɩ́ɛ́, ɩ́ nɩ lé á fa Lagɔ ŋwnú, á ka yɩ́ Lagɔ a cɩ́cása, á cíe lé á nie: «À yà zɩmnɛ́ wɔlɩ́ɛ́ ɩ̀ mna nyʋa neé a yɛ́.»

Zozíi yi bhàlʋ̀nyʋa a zà

(Matíe 9.9‑13; Málɩ́kɩ 2.13‑17)

27Ɩ̀lɩa plɩ lé Zozíi flʋ zɔ̀ a, ɔ́ yɛ́ lapóo a kʋbhlinyɔ a múó, ɔ́mɔ́ á wlele Levíi, ɔ́ bɔ́ɔ ɔ nɔnʋzrɩ̀da lé Zozíi srʋ ɔ́ mà: «Jɩ́ mɔ́ɔ kʋ́!» 28Lé Levíi soglù, ɔ́ tɩ ʋ́ ɔ lɩ́ɛ́ fɩ́ɛ́ lé ɔ́ jɩ́ Zozíi kʋ́.

29Yruú a múó kʋ́, Levíi wle Zozíi ɔ gbó ɔ ká li, mà lapóo a kʋbhlinyʋa kɔ́kɔ́mnɩ́ yi, á kʋ ʋ́, lé yígàdà nyʋa àna kʋ sáà ʋ́ lelitebhleé jɩ̀. 30Mà Falizɩ́ɛnyʋa yà lɔ̀ a másɛnyʋa sɔ́ kalɛ Zozíi neé, á yrá ɔ́ kʋjɩ̀nyʋ̀àà mà: «Ɛ̀kʋ̀ʋ̀ bhè a yà lapóo a kʋbhlinyʋaá yà bhàlʋ̀nyʋ̀àà sɔ́ a lile kʋ́ lé a mnálɛ kʋ́ à?» 31Lé Zozíi srʋ á, ɔ́ anɩ́: «Nyʋaá gú nɩ́ bhlá a, á nɩ́ mʋ́mɔ dɔ̀tányʋa, mà gupuonyʋaá ámá à mʋ́mɔ dɔ̀tányʋa. 32Nyʋa à kà a nɩnɩgbɩ srí sá a, á zà nɩ́ yì, mà bhàlʋ̀nyʋa á zà ɩ́ yi a ká cɩ́cɩɩ a ká á nyumoé a gbʋ́ wlʋ́.»

Kleé a pʋ́ʋpʋ́ʋwɔlɩ

(Matíe 9.14‑17; Málɩ́kɩ 2.18‑22)

33Lé nyʋa srʋ Zozíi mà: «Záan yà Falizɩ́ɛnyʋa sɔ́ a kʋjɩ̀nyʋ̀àà pʋ́lɛ kɔ́ɔ̀kɔ́ kleé lé á bhibhie, bhè mɔ̀ ànɔ̀ɔ̀ nà naá lie á mná.» 34Zozíi srʋ á, ɔ́ anɩ́: «A yi míi lé a yi yʋwlɩɛ́ ɔ̀ síé a, ɔ bheyinyʋaá ɔ́ wle lé à yi a, srʋ mà, a pʋ́ʋ kleé ɔ klʋ́ jɩ̀ɩ̀? A nɩ́ nɩ saá! 35Mà yru yi ʋ́ kʋ lé á yi á yʋwlɩɛ́ síe a gɔ̀ sà bhʋ́ a tányɩɛ́, á yi yɩ́ kleé pʋ́ʋ.»

36Lé Zozíi pá sɔ́kʋ́ núnúó àna, ɔ́ anɩ́ mà: «Nyɔ nɩ́ sa kótuyalʋ gɔ̀ pɩ́ʋ́ lé ɔ́ kʋ́ʋ kótuzʋ gɔ̀ kpláa. Ɔ́ nɩ nií a, ɔ́ ya kótuyalʋɔ́ ŋáta, fɩ́ɛ́ lé kótuyalʋɔ́ a pɩ́ɔ́, nɩ́ ka námasa kótuzʋ̀ɔ̀ kʋ́ bhli. 37Nyɔ nɩ́ bhá sáà nɔyalʋ, lé ɔ kʋ́ʋ jìdàníé#5.37 jìdàníé: Nyidìè mnɩ́ á ŋwʋ́ɛ́ wá nyú, bhlibhlʋ yà nʋ́ sɔ́ sá. ɩ̀ kà jɩ́jɔ̀lʋ́ a mnɩ́ sá ŋwʋ́. Ɔ nɩ nií a, nɔyalʋɔ́ yi jìdàníé wla Lé ʋ́ yi sá kɔ́sɔ. Nʋ́ɔ́ ya ŋátɔ lé jìdàníé ya sáà yɩ́ ŋátɔ. 38Ɩ́ kʋ lɛ́ sɩ́tɛ̀ a, nɔyalʋ, jìdàní yalɛ a mnɩ́ á ŋwʋ́lʋʋ sá. 39Lé nyɔ nɩ́ wlʋ́ duváa yà sa ŋwʋ̀da gwlɛ a, mnáada lé ɔ ká duváa yalɛ mʋ́mɔɔ̀, máà ɔ́ yì saá cémʋ́ duváa yà sa ŋwʋ́da gwlɛ a, ámá náa!»

Currently Selected:

Lúkɩ 5: NEY

Highlight

Copy