Kwidika 9
9
Chipupu chakujaha ayimuna
1Yehova wamwilili Mosi, nindi, Iŋilaku mwadiyi Fwaro, wumwili neyi, Tiya chanahoshiyi Yehova, Nzambi yawaHeberu, nindi, Yileki antu ami ayi akankalakeli.
2Neyi kwonti kweyi kuyileka, neyi saŋa wayikakela hohu,
3wakamona chikasa chaYehova chakakwata hayimuna yeyi yidi mumpata; nihatuwalu, nihayimbulu, nihaŋameli, nihaŋombi, nihayimuna yanyanya; kwakela musoŋu watama nankashi.
4Hayimuna yawaIsarela nayimuna yawaEjipitu Yehova wakambula hakachi, hayimuna yejima yawanyana kaIsarela hihakafwa hoku niwumuku.
5Yehova nakani dehi nihakachikoŋelayi, nindi, Kumadiki Yehova wakakoŋa chumichi munu mwituŋa.
6Dichi chikwachili Yehova welili chumochu, yimuna yejima yamuEjipitu yafwili. ilaŋa hayimuna yawanyana kaIsarela hihafwili hoku niwumuku.
7Fwaro watemesheluku nakwihula, komana chalala, hayimuna yawaIsarela hihanafwi hoku chimuna hela nichimuku. Ilaŋa muchima waFwaro saŋa wadikaŋila mbe, hayilekeli antuku.
Chipupu chamahuti
8Yehova wayilili aMosi naAroni, nindi, Zomonenu wuti wamuluteŋu namakasenu, Mosi awufukumuni mwiwulu Fwaro chochamutalayi.
9Wukwikala lunkuŋu lwapepela nankashi mwejima mwahita ituŋa daEjipitu, wukubalumuka mahuti akubusika, niyilonda hamu, nihadi antu nihadi anyama, mwejima mwahita ituŋa daEjipitu.
10Azomweni wuti wamuluteŋu, ayili nakwimana kumesu aFwaro. Mosi wawufukumwini mwiwulu, wabalumukili himahuti akubusika, niyilonda hamu, nihadi antu nihadi anyama.
11Niatutepa akaŋenyi kwimana kumesu aMosi muloŋa wamahuti; muloŋa niatutepa adiŋi namahuti, niaEjipitu ejima adiŋi nawu.
12Yehova wachinchikishili muchima waFwaro, hayitejeluku, mwomwahosheliyi Yehova naMosi.
Chipupu chanvula yamalola
13Yehova wamwilili Mosi, nindi, Wakamenekeshaŋa budidi, wakayi nakwimana kumesu aFwaro, wakamwili neyi, Tiya chanahoshiyi Yehova, Nzambi yawaHeberu, nindi, Yileki antu ami, ayi akankalakeli.
14Ichi dinu nukutemesha hamuchima weyi, nihadi ambuŋeyi, nihadi antu eyi, yipupu yami yejima, kulonda wiluki neyi hanu hamaseki hejima hikudi wakweseka nanamuku.
15Nukwolola kwami chikasa chami dinu kulonda nikubabeshi nineyi niantu eyi ejima nanyisoŋu; akakufumisha hanu hamaseki.
16Chalala dichi chinakulemesheli kulonda #Rom 9:17nikumwekesheli ŋovu yami, kulonda ijina dami dakatiyakani mwejima mwahita maseki.
17Nihanu wudikaŋaŋa tuhu nawantu ami chakadi kuyumbaku, tahindi?
18Tiya, itaŋwa dakumadiki chidakashika itaŋwa hohenohu hidinashiki, nakanokesha nvula yamalola yeneni nankashi, antu kanda dehi amonaŋahu nvula yidi chochochu munu muEjipitu, kufumisha hamwaka wakusambila nakushika kwitaŋwa daleluku.
19Dichi dinu temeshaku wiŋiji swayi swayi yimuna yeyi, niyuma yeyi yejima yidi mumpata, muloŋa niantu ejima, nianyama ejima akashintakeshawu mumpata, akabula kuletawu hamukala, nvula yamalola yakayinoka, akafwa.
20Ahadi ambuŋaFwaro átiyili woma #Yish 13:13wezu daYehova atemwishili niaŋamba jawu niyimuna yawu nakuyiŋija mumatala;
21ábulili kwakama izu daYehova ashiyili niaŋamba jawu niyimuna yawu mumpata.
22Yehova wamwilili Mosi, nindi, Ololaku chikasa cheyi kwiwulu kulonda nvula yamalola yinoki mwituŋa dejima daEjipitu, yinokeli niantu nianyama ninyitondu yayisakola yakudima yejima yekala mumaha, mwejima mwahita ituŋa daEjipitu.
23Mosi wolweli chikasa chindi kwiwulu nimukombu windi; Yehova watemesheli nikudidima ninvula yamalola, nikesi kahitili lufuchi nakuholokela hamaseki; Yehova wanokesheli hetuŋa daEjipitu nvula yamalola.
24Kwadiŋi nvula yamalola, nikesi kadibomba namalola, kakala nankashi, kanda dehi achimonaŋahu dehi mwituŋa daEjipitu dejima kufumisha hatachikiluwu aEjipitu kutuŋa nyikalaku.
25Mwejima mwahitili ituŋa daEjipitu #Mas 78:47-48; 105:32nvula yamalola yahumpwili yejima yadiŋi mumaha, niantu nianyama; nvula yamalola yahumpwili ninyitondu yayisakola yakudima yamumaha, yakotweli ninyitondu yamaneni yejima yamumaha namumasaŋa.
26Chiŋa mwituŋa daGosheni hohu, mwashakaminuwu anyana kaIsarela, mwomwabulili nvula yamalola.
27Fwaro watemesheli nakutambika aMosi naAroni, wayilili nindi, Ichi naputoli dehi; Yehova diyi waloŋa, ninami niantu ami twatama.
28Mulembelelenu Yehova; iku kudidima kweneni ninvula yamalola yinawanini dehi, nukuyileka kwami, himwakashakama nawa cheŋuku.
29Mosi wamwilili nindi, Chinukufuma hamukala nukumwolwela Yehova makasami, nikudidima kwakamwena, hikwakekala nawa cheŋi ninvula yamalolaku, kulonda wakeluki neyi maseki #Mas 24:1ambala aYehova.
30Hakwinza nineyi niambuŋeyi nayiluki nami himwakamutiya Yehova Nzambi womaku, kanda.
31Nifulakisi nibali yachikekeli, bali yadiŋi yasoŋa dehi, fulakisi yadiŋi yakenuka dehi.
32Hakwinza tidiku namakundi hiyachikekeluku, muloŋa yachidiŋi kanda yikuli.
33Mosi washiyili Fwaro, wafumini hamukala, wamwolweleli Yehova makasindi, nikudidima kwamweneni, ninvula yamalola yaketukili, ninvula yayeni hiyachabumukili cheŋi hamasekuku.
34Fwaro chamweniyi nvula yinaketuki dehi, nimalola nikudidima kunakumi dehi, waputoleli cheŋi, wadikaŋili mumuchima windi, niyena niambuŋindi.
35Muchima waFwaro wachinchikili, hayitejeli anyana kaIsarela kuyaku, mwomwahosheliyi Yehova naMosi.
Currently Selected:
Kwidika 9: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
