ڢِتُواْوَ 35
35
ڧَٰعِدُواْدِنْ رَانَرْ هُوتُ تَمَكُواْ
1مُوسَٰى يَتَتَّارَ دُكَنْ جَمَعَرْ إِسْرَٰٓءِيلَ يَثٜىٰ مُسُ «وَطَنَّنْ سُونٜىٰ أَبُبُوَنْ دَ يَهْوٜىٰهْ يَعُمَرْثٜىٰكُ كُيِ؞ 2عَكْوَانَ شِدَ ذَاعَيِ عَيْكِ، عَمَّا رَانَ تَبَݣَويْ رَانَرْ هُوتُ تَمُسَمَّنْ ثٜىٰ، رَانَرْ دَ عَكَ كٜىٰٻٜىٰ دَ ڟَرْكِے غَ يَهْوٜىٰهْ؞ دُكْ وَنْدَ يَيِ عَيْكِ أَ رَانَرْ، ذَاعَ كَشٜىٰشِ؞#ڢِتْ 20.8-11؛ 23.12؛ 31.15؛ 34.21؛ لِـ ڢِرْ 23.3؛ مَيْ شَـ 5.12-14 3بَذَاكُ هُورَ وُتَا أَ رَانَرْ هُوتُ تَمَكُواْ أَوُرَارٜىٰنْ ذَمَنْكُبَ؞»
بَيٜىٰ بَيٜىٰ دُواْمِنْ يِنْ تٜىٰنْتِنْ يَهْوٜىٰهْ
﴿ڢِتْ 25.1-9؛ 39.32-43﴾
4سَيْ مُوسَٰى يَثٜىٰ وَدُكَنْ جَمَعَرْ إِسْرَٰٓءِيلَ «غَا أَبِنْدَ يَهْوٜىٰهْ يَعُمَرْتَ؞ 5كُكَرْٻِ بَيٜىٰ بَيٜىٰ غَ يَهْوٜىٰهْ دَغَ حَنُّنْ دُكْ وَنْدَ يَيِ نِيَّ أَ ذُوثِيَارْسَ، بَرِ يَكَٰوُاْ بَيْكُواْ نَظِينَارِيَ دَ أَظُرْڢَا دَ تَغُلَّ، 6دَ ظَرٜىٰنْ سَاڧَ مَيْ كَلَرْ ضُوً بُلَ دَ مَيْ كَلَرْ جَرْ غَرُورَا دَ مَيْ كَلَرْ جَا دَ ظَرٜىٰنْ لِيلِنْ مَيْݣَوْ دَ ظَرٜىٰنْ غَاشِنْ عَكُيَ، 7دَ ڢَتُنْ رَغُنَ وَطَنْدَ عَكَ ڠَرَ دَ ڢَتُ مَاسُ ݣَوْ دَ إِتَاثٜىٰنْ عَكَشِيَ، 8دَ مَنْ ظَيْتُنْ دُواْمِنْ ڢِتِلُ دَ كَايَنْ يَجِ دُواْمِنْ مَنْ كٜىٰٻٜىٰوَ دَ كُمَ تُرَارٜىٰ مَيْ ڧَنْشِ، 9دَ دُووَڟُنْ عُواْنِسْ دَ سَوْرَنْ إِرِنْ دُوَڟُو مَاسُ دَرَجَ دُواْمِنْ أَ مَنّٜىٰسُ عَكَنْ عٜىٰڢُوادْ دَ أَلْجِهُنْ ڧِرْجِ نَ عٜىٰڢُوادْ؞
10«بَرِ دُكَنْ ڠُونَيٜىٰنْ عَيْكِنْ حَنُّ دَسُكٜىٰ عَثِكِنْكُ سُذُواْ سُيِ دُكَنْ أَبِنْدَ يَهْوٜىٰهْ يَعُمَرْتَ عَيِ، وَتُواْ 11تٜىٰنْتِنْ كَسَنْثٜىٰوَرْ يَهْوٜىٰهْ، بَبَّنْ أَبِنْ رُڢٜىٰوَرْ تٜىٰنْتِنْ دَ أَبِنْ رُڢٜىٰوَرْسَ دَ مَطَوْرِنْسَ دَ ڢِرَمْ نَاسَ دَ سَنْدُنَنْسَ دَ غِنْشِڧَنْسَ دَ غِنْدِنْ ذَمَنْسَ، 12دَ عَݣُوتِنْ يَرْجٜىٰجٜىٰنِيَ دَ سَنْدُنَنْسَ دَ مُرْڢِنْسَ، وَنْدَ شِينٜىٰ وُرِنْ طَوْكَرْ أَلْحَكِنْ ذُنُوبِ دَ بَبَّنْ لَبُلٜىٰ دُواْمِنْ يَتَرٜىٰ عَݣُوتِنْ، 13دَ تٜىٰبُرِنْ دَ سَنْدُنَنْسَ دَ دُكَنْ كَايَنْ عَيْكِنْسَ دَ غُرَاسَرْ دَ عَكَ كٜىٰٻٜىٰ أَغَبَنَ، 14دَ سَنْدَا مَيْ رِڧٜىٰ ڢِتِلُ دُواْمِنْ حَصْكٜىٰ دَ كَايَنْ عَيْكِنْسَ دَ ڢِتِلُنْسَ دَ كُمَ مَنْ ڢِتِلُنْسَ، 15دَ بَغَدٜىٰ نَڧُواْنَ تُرَارٜىٰ دَ سَنْدُنَنْسَ دَ مَنْ كٜىٰٻٜىٰوَ دَ تُرَارٜىٰنْ ڧَنْشِ دَ لَبُلٜىٰنْ ڧُواْڢَرْ شِغَ تٜىٰنْتِنْ، 16دَ بَغَدٜىٰ نَهَدَايَ تَڧُواْنَاوَا دَ رَاغَرْسَ تَتَغُلَّ دَ سَنْدُنَنْسَ دَ كَايَنْ عَيْكِنْسَ دَ ڧَتُوانْ ݣُونُواْ نَتَغُلَّ دَ غِنْدِنْ ذَمَنْسَ، 17دَ لَبُلٜىٰنْ ڢِيلِنْ بَبَّنْ تٜىٰنْتِنْ دَ غِنْشِڧَنْسَ دَ غِنْدِنْ ذَمَنْسُ دَ لَبُلٜىٰنْ ڧُواْڢَرْ شِغَ ڢِيلِنْ بَبَّنْ تٜىٰنْتِنْ، 18دَ ڧُسُواْشِنْ كَڢَ تٜىٰنْتِنْ كَسَنْثٜىٰوَرْ يَهْوٜىٰهْ دَ ڧُسُواْشِنْ ڢِيلِنْ بَبَّنْ تٜىٰنْتِنْ دَ إِغِيُواْيِنْسُ، 19دَ رِيغُنَ مَاسُ أَدُوانْ سَاڧَ نَهَنُّ دُواْمِنْ حِدِمَ ثِكِنْ وُرِے مَيْ ڟَرْكِے دَ رِيغُنَ مَاسُ ڟَرْكِے نَ هَٰرُونَ ڢِرِسْتِ دَ رِيغُنَ نَیَیَنْسَ مَظَا دُواْمِنْ حِدِمَرْسُ تَڢِرِسْتُواْثِے؞»
مُتَنٜىٰ سُنْ كَٰوُاْ بَيٜىٰ بَيٜىٰنْسُ
20سَيْ دُكَنْ جَمَعَرْ إِسْرَٰٓءِيلَ سُكَتَاشِ دَغَ غَبَنْ مُوسَٰى؞ 21سَيْ سُكَ دَاوُاْ؞ دُكْ وَنْدَ ذُوثِيَارْسَ تَتَٻَشِ دَ وَنْدَ رُوحُنْسَ يَمُواْڟَشِ يَكَٰوُاْ وَ يَهْوٜىٰهْ بَيْكُوانْسَ دُواْمِنْ عَيْكِنْ تٜىٰنْتِنْ سَدُوَ دَ دُكَنْ كَايَيَّكِ نَحِدِمَرْسَ دَ رِيغُنَنْسَ مَاسُ ڟَرْكِے؞ 22سَيْ مَظَا دَ مَاتَا سُكَ دِنْغَ ذُوَا، دُكْ وَنْدَ يَكٜىٰدَ نِيَّ أَ ذُوثِيَارْسَ، سُكَ كَٰوُاْ بَيٜىٰ بَيٜىٰنْسُ غَ يَهْوٜىٰهْ نَیَنْ كُنّٜىٰنْسُ نَظِينَارِيَ دَ ذُواْبَّنْ يَڟُنْسُ دَ وَرْوَرُواْرِنْسُ دَ سَرْڧُواْڧِنْ وُيَنْسُ دَ سَوْرَنْ كَايَنْ أَدُواْ إِرِ إِرِنَّظِينَارِيَ؞ 23دُكْ وَنْدَ يَكٜىٰدَ ظَرٜىٰنْ سَاڧَ مَيْ كَلَرْ ضُوً بُلَ، كُواْ مَيْ كَلَرْ جَرْ غَرُورَا، كُواْ مَيْ كَلَرْ جَ، كُواْ ظَرٜىٰنْ لِيلِنْ مَيْݣَوْ، كُواْ ظَرٜىٰنْ غَاشِنْ عَكُيَ، كُواْ ڢَتُنْ رَغُنَ وَطَنْدَ عَكَ ڠَرَ، كُواْ ڢَتُ مَاسُ ݣَوْ سُكَ كَٰوُاْسُ؞ 24دُكْ وَنْدَ يَ عِيَ كَٰوُاْ بَيْكُواْ نَأَظُرْڢَا، كُواْ نَتَغُلَّ يَكَٰوُاْشِ بَيْكُواْ غَ يَهْوٜىٰهْ؞ دُكْ وَنْدَ يَكٜىٰدَ إِتَاثٜىٰنْ عَكَشِيَ وَنْدَ يَكٜىٰدَ أَمْڢَانِ وُرِنْ عَيْكِنْ، شِے مَا يَكَٰوُاْ؞ 25دُكَنْ مَتَ مَاسُ عِيَيِنْ ظَرٜىٰ، سُكَيِ سُكَ كَٰوُاْ ظَرٜىٰ مَيْ كَلَرْ ضُوً بُلَ دَ مَيْ كَلَرْ جَرْ غَرُورَا دَ مَيْ كَلَرْ جَا دَ ظَرٜىٰنْ لِيلِنْ مَيْݣَوْ؞ 26دُكَنْ مَاتَانْدَ ذُوثِيَارْسُ سُكَ مُواْڟَسُ سُيِ أَمْڢَانِ دَ عِيَوَرْسُ، سُكَيِ ظَرٜىٰ نَغَاشِنْ عَكُيَ؞ 27شُوغَبَنِّ سُكَ كَٰوُاْ دُووَڟُنْ عُواْنِسْ دَ سَوْرَنْ إِرِنْ دُوَڟُو مَاسُ دَرَجَ دُواْمِنْ أَ مَنّٜىٰسُ عَكَنْ عٜىٰڢُوادْ دَ أَلْجِهُنْ ڧِرْجِ نَ عٜىٰڢُوادْ، 28دَ كَايَنْ يَجِ دَ مَنْ ظَيْتُنْ دُواْمِنْ ڢِتِلَ دَ مَنْ كٜىٰٻٜىٰوَ دَ تُرَارٜىٰ مَيْ ڧَنْشِ؞ 29دُكَنْ جَمَعَرْ إِسْرَٰٓءِيلَ، مَظَا دَ مَاتَا، وَطَنْدَ ذُوثِيَارْسُ سُكَ مُواْڟَسُ سُكَ كَٰوُاْ كُواْوَنٜىٰ أَبِنْدَ ذَيْ تَيْمَكَ وَجٜىٰنْ يِنْ عَيْكِنْ دَ يَهْوٜىٰهْ يَعُمَرْثِ مُوسَٰى يَيِ؞ سُكَ كَٰوُاْسُ بَيٜىٰ بَيٜىٰ نَيَرْدَرْ رَيْ غَ يَهْوٜىٰهْ؞
مَعَيْكَتَنْدَ ذَاسُيِ تٜىٰنْتِنْ يَهْوٜىٰهْ
﴿ڢِتْ 31.1-11﴾
30سَيْ مُوسَٰى يَثٜىٰ وَجَمَعَرْ إِسْرَٰٓءِيلَ «غَاشِ، يَهْوٜىٰهْ يَذَاٻِ بٜىٰظَلٜىٰلْ طَنْ عُرِ جِيكَنْ هُرْ دَغَ ذُرِيَرْ يَهُودَ؞ 31يَكُمَ ثِكَشِ دَ رُوحُنْسَ دَ حِكِمَ دَ عِيَوَرْ عَيْكِ دَ سَنِنْ كُواْوَنٜىٰ إِرِنْ عَيْكِنْ حَنُّ، 32دُواْمِنْ يَڧِرْڧِرُواْ ذَانِ ذَانِنْ أَبُبُوَ، يَڧٜىٰرَ أَبُبُوَ دَغَ ظِينَارِيَ دَ أَظُرْڢَا دَ تَغُلَّ، 33يَسَسَّڧَ دُوَڟُو مَاسُ دَرَجَ وَطَنْدَ ذَاعَ سَا عَڧَرَمِنْ ڢِرَمْ، يَسَسَّڧَ إِتَاثٜىٰ، كُمَ يَكَسَنْثٜىٰ ڠُونِنْ كُواْوَنٜىٰ سَنَعَرْ حَنُّ؞ 34يَهْوٜىٰهْ كُوَ يَبَا بٜىٰظَلٜىٰلْ دَ عُواْهُواْلِيَبْ طَنْ أَهِسَمَكْ نَظُرِيَرْ دَنْ حِكِمَرْ دَ ذَاسُ عِيَ كُواْيَ وَ وَطَنْسُ إِرِنْ سَنَعَرْسُ؞ 35يَهْوٜىٰهْ يَثِكَسُ دَ عِيَوَرْ يِنْ كُواْوَنٜىٰ إِرِنْ عَيْكِنْ حَنُّ دَ نَظَانٜىٰ ذَانِ دَ نَسَاڧَ دَ نَأَدُوانْ سَاڧَ نَهَنُّ نَظَرٜىٰنْ سَاڧَ مَيْ كَلَرْ ضُوً بُلَ دَ مَيْ كَلَرْ جَرْ غَرُورَا دَ مَيْ كَلَرْ جَا دَ ظَرٜىٰنْ لِيلِنْ مَيْݣَوْ؞ سُنَدَ ڠُونِنْتَ تَيِنْ كُواْوَنٜىٰ إِرِنْ عَيْكِنْ حَنُّ؞»
Currently Selected:
ڢِتُواْوَ 35: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
