Luku 13
13
Yezu lɛ mɛn dia mà minin nə golee Lawa li fufuu
1Bɛa biikoo kɛ lɛ li, minin nə́ daa pɛ Yezu ni, mà Pilati na á Galilee minin tɛnɛn toa wúlu boe, á ǹ dɛ, ǹ mà nə́ n lɔlɔkɔn ka ǹ *wúlu mànan mà nɛ.
2Yezu nə́ ǹ lɛ si: «Ka n taasɛ, mà bɛa Galilee minin kɛn lɛn man nə́ goã sii baraa-zɛnaalin lɛa, ǹ nə́ la ǹ miãn manɛ, bɛ lɛ nɛ sii kɛ nə́ n zɛnaa ǹ nɛ? 3Haayii! Masɛ n pii ka nɛ, bɛ̀ ka n taasɛ ka wusoo kaa sii baraan kio wa, ka dɔn man die bɔ̀n biɛ miɛ̃. 4Silowee sanabolo bɛ́ á mɛnaa min fulukiwisi mɛn la á ǹ dɛ, ka n taasɛ, mà bɛn man nə́ goã zɛ̀rɛdɛnan lɛa ǹ nə́ la Zeruzalɛmu kiwi minin gialakunun kɛn manɛ? 5Haayii. Masɛ n pii ka nɛ, bɛ̀ ka n taasɛ ka wusoo kaa sii baraan kio wa, ka dɔn man die bɔ̀n biɛ miɛ̃.»
Gɔ́rɔ da nɛ-kɔle baãnaa
6Yezu sii a kɔnboe kɛ nyaa:
– Gɔ́rɔ da goon na á goã giĩ goon a dù gɔrɔ nɛ. Á daa ga nɛ li a ganaa, a màn kɔ́n yɛ-a wa. 7Giĩ lɛ tɔ́n pɛ dù gɔrɔ lɛ a dí-nyali ni mà a lɛ̀ sɔɔ n ke bɛ̀ asɛ da ga nɛ li gɔ́rɔ da kɛ ganaa, mà asɛ ná a màn kɔ́n yii-a wa. Mà a kuru. Mà a toa walan mìi n ka wàa-n doo, mà a n tán ziziɛ̃ kooro? 8Sɛnɛ, dí-nyali lɛ pɛ: «Dɛnaagiĩ, a toa miɛ̃la doo, ma da lɛ genli yawa ma zɛnaa, ma mànan bù kaa a ganaa. 9Kɔntan á die nɛ koe lɛ̀boe. Bɛ̀ a nɛ kɔ wa, ma tɔn kuru.»
Yezu lɔ bɔlɔka goon a busu nya susu ǹ pii pinaa
10Yezu na á goã minin darɛɛ lɛsɔkɔn kion Zuifun *susu ǹ pii pinaa. 11Lɔ goon dɔ na á goã kion lɛ nɛ, nɔ̀ɔnɔn ná a ganaa, ǹ nə́ kũ ǹ nə́ baa bɔlɔka lɛa a lɛ̀ fulukiwisi n ke. A na á goã pusii ni, a ba boe la a n tele duduu wa. 12Yezu bɛ́ á yɛ á pɛ: «Lɔ lɛ, á ke n busu lɛ nya sisia.»
13Á n gɔn da la. A din bǎã-n gɔrɔ, lɔ lɛ wusoo á n tele ka perepere. Á yoo á n Lawa tɔ boe. 14#BBN 20.9,10; TDP 5.13-14. Lɛsɔkɔn kion lɛ a goledɛnaa yɔrɔ kɔsɛ, a giala Yezu na á busulə kaka kɔ susu ǹ pii pinaa. Á boo saa á pɛ zaman nɛ: «Lɛawaa sɔrɔ tumaa tan dí nya ǹ piin lɛa. Haya, ka da bɛa piin kɛn lɛn li, màn mɛn bɛ́ toɛ, ǹ kaa busun nya, ka baran da susu ǹ pii pinaa bɛ ganaa wa.»
15Dɛnaa tɔ́n ná a lɛ si kɛnɛn: «Gɔ́ɔ̃ tì-an kɛn, ka dinin die ne, susu ǹ pii pinaa, a ba a dii, hinlaa a dundun fore, a bɔ tɔɔn màn bii ǹ bǎã nɛ, a wo mu kɔ la wa? 16Sanparɛ ka lɔ kɛ nɛ, bɛ mɛn bɛ́ wɔ digolo Abrahamu a nɔ̀ɔn lɛa, *Sɛtaan nə́ nɔmiɛ a lɛ̀ fulukiwisi n ke, bɛ miã a si zɔ́ɔ la bie siĩni susu ǹ pii pinaa lɛ-n dinin wa?»
17Bɛa boon kɛn lɛn nə́ sìi da Yezu a zɔ́ɔn tumaa ganaa. Sɛnɛ, zaman lɛ sɛ din tumaa na á goã n nyɛnyɛɛ, a sii sonboren kɛn zɛnaa a lɛa.
Boo giməə mutardə we laanka yɔ bù wɔ paǹ li
(MAT 13.31-33; MAR 4.30-32)
18Yezu tɔ́n pɛ: «Man die *Lawa a kiibaa kɛ zoɛ̃ kɔn ka wàa-n ke? A n kɔnboe ka wàa nɛ? 19A n kɔnboe ka mutardə we goon ne, giĩ goon nə́ saa á wɔ tán a dù gɔrɔ-n. Màn we lɛ bɔ á da baa, bàanan nə́ ǹ kiin dɔ a gùrùn ganaa.»
20Yezu wusoo doo á pɛ: «Man die Lawa a kiibaa kɛ zoɛ̃ kɔn ka wàa nɛ? 21A n kɔnboe ka yɔ bù ni, lɔ goon nə́ saa á kaa buuru wusu yia gigiã li, yǎa a ná a din tumaa yoo.»
Izirayeli minin tá re we Lawa a kiibaa ǹ bǎã lɛ-n ya?
(MAT 7.13-14,21-23)
22Yezu bɛ́ zii la woe Zeruzalɛmu kiwi, a na á goã boe kiwi dadaran laanka a bɔnboɛɛnɛn nɛ, a n minin darɛɛ. 23Min kɔ́n nə́ pɛ-n kɛnɛn: «Dɛnaa, min mɛnɛn bɛ́ re kirisibiɛ, ǹ tá re gigiã koe?»
Yezu tɔ́n pɛ ǹ nɛ:
24– Ka n doa, màn mɛn bɛ́ toɛ, ka wɔ ka kiɛnlɛ boɛɛn kɛ nɛ. A giala, man pii ka nɛ, min gigiã á re giɛ li, mà ǹ wɔ, ǹ ba re boe la wa.
25Bɛ̀ kiondɛnaa yoo á kiɛnlɛ tã, bɛ̀ ǹsɛn nə́ kanaa, maǹ die a giala koe ǹ kiɛnlɛ dɛ, bɛ̀ ǹ nə́ pii: «Dɛnaa, kiɛnlɛ bũ wɔsɛn manɛ.» Bɛa waáraa, kiondɛnaa lɛ n die ǹ lɛ sii mà asɛ ba ǹ bɔ ǹ bǎã doɛ̃ wa. 26Maǹ die yui ǹ pɛ bɛa biikoo li kəni mà ǹsɛn nə́ màn bii kun ka a din ni dɔn. Mà táa a na á goã minin darɛɛ ǹsɛn dinin bǎã fúlun ni. 27#LOE 6.8. A n die pii ǹ ni mà asɛ ba ǹ bɔ ǹ bǎã doɛ̃ wa. Mà ǹ nə n zɔ̃ ǹ nə n bɔ asɛ ganaa. Mà ǹ tumaa n sii baraa-zɛnaalin lɛa. 28#MAT 22.13; 25.30. #MAT 8.11-12. Wuu-pɛ laanka sɔ kerebɔ á re yii, biikoo mɛn waáraa bɛ̀ ǹ nə́ wɔ digolo Abrahamu yɛ, ka Izaaki ni ka Zakɔba nɛ, ka Lawa a boo gii-dalin kɛn tumaa nɛ, bɛn nə́ Lawa a kiibaa ǹ bǎã kɛ nɛ, ǹsɛn nə́ zuĩ-n kanaa. 29Sonbore, minin tá re boe lɛ̀giala-n, ǹ bɔ lɛ̀nyɛɛnɛ, ka gusin a lɛ̀ gùrù laanka gɔsɛ wɔ nɛ, ǹ giã ǹ bǎã yɛ Lawa li zɔ́n màn bii ǹ bǎã kɛ nɛ. 30#MAT 19.30; 20.16; MAR 10.31. Bɛa yɔrɔ kɛ lɛ la, pelo a kiodɛnan tɛnɛn tá re nyɛɛnaandɛnan biɛ biɛ̃, pelo a nyɛɛnaandɛnan tɛnɛn tá re kiodɛnan biɛ biɛ̃.
Yezu n die gɛ̀ we Zeruzalɛmu kiwi
(MAT 23.37-39)
31Bɛa biikoo li *Fariziɛ̃n kɔnɔn nə́ n mɔrɔ Yezu ganaa, ǹ nə́ pɛ nɛ mà a woo a n bɔ kànaa, a giala kii Erɔdi n giɛ li a dɛ a gã.
32Yezu pɛ mà ǹ wo pɛ bɛa basaã-kɔle kɛ nɛ mà á ke, mà asɛ n nɔ̀ɔnɔn lui, a n busulən kaka koe pelo laanka biɛ̃ nɛ, mà a lɛawaa sɔɔbaa ǹ wɔ pinaa mà asɛ a dí á re nyɛɛ. 33Sɛnɛ, mà asɛ doamaa nɛ a wo nyɛɛnɛ ka a zii tɔ we-n pelo ka biɛ̃ nɛ ka biɛ̃lɛaan nɛ, a giala mà Lawa a boo gii-dali kɔ́n ba boe la a gã bǎã kɔsɔ nɛ, bɛ̀ Zeruzalɛmu kiwi bie wa.
34Yezu pɛ:
– Zeruzalɛmu kiwi, nsɛ lɛ n Lawa a boo gii-dalin dii ǹ nə́ giɛ̃. Lawa bɛ́ min mɛnɛn diɛ n nɛ dí ganaa, ma n bɛn dii ka kɔlɔn nɛ. Masɛ gunyin damata ke man giɛ li, ma tá minin lɛ soekɔn, ka koo dan bɛ́ a nɛn soekɔn a nyàa kan giulun lɔn. Ǹ bɛ́ ǹ lɛ kɔ wa. 35#LOE 118.26. Haya, ka tá re soe ka kaa Lawa a kion kɛ toa walan ka lenlen. Masɛ n pii ka nɛ, máa ka a re masɛ yii doo wa yǎa biikoo doe, ka bɛ́ re pii biikoo mɛn li: «Min mɛn bɛ́ die ka wɔa Dɛnaa tɔ nɛ, Lawa barka wɔ bɛ nɛ!»
Currently Selected:
Luku 13: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
