Mateus 28
28
Jesus Hiwejyawakatnaka Piranapni
1Waneya hyinuwakle seman-hohne, yetshpotukawa, Maria Madalena tshinkaluro hiyrunu sato Maria tshinkaluro yomletshi retapna.
2Chinpotukawa tshiji hiyolikpotutatka, satu hiwejikaluru Hoyakalu towreru, tenhohne hichpajikatshri hapokle tshinanu waneya rerutlu sotlu yomletshi hajeru waneya htuplahohotlu.
3Rawrakle pixka rixhojita hiyrunu himkalu klat-potu neve pixka.
4Waneya yomletshi hislahatshine soldado-ne, rutatakna waneya hipnatshine pixka rixanatkana, tsru hpiklena tshinanu.
5Waneya hiwejikaluru Hoyakalu towreru tenhohne hajeru wla tshinna suxone:
— Hi hpikanu, nimatlu Jesus, cruz hipnapikatshri hijha.
6Hi hewitkalu seyni riwekatnaka halikaka, htshinyawaka potuko pixka. Wkata hina, hetapyawakaplu rukoluhakanaxyawaka.
7Waneya chinpotukawa hyanu, rasruklene hinkajyawakapa, wla htshinanna: “Hipuktshi riwekkajikatka. Wale kosekamtanhi hixa Galileia tshijne. Wane hexinri.” Xawakni hichinikanru ntshinyahi.
8Waneya yomletsh-yehi ruchpajyana suxone, hchiretna. Hpikmakna seyni rumuwahchinikanupotutkoxna. Rasukamtna rasruklerune runkakapyawakapna.
9Waneya chinpotukawa Jesus yoptotna. Wla htshinna:
— Kihlehchinikanuphi.
Waneya suxone hapokanwakatlu, hsaprikjixitluna, rimalwuxyawakapluna.
10Waneya Jesus wla tshinna:
— Hi hpikanu. Hajewa, nomolene hinkakapanu Galileia tshijne hyiywakapna. Waneko rexinnona.
Yomletshi Hislahatshine Hinkakle Piranapni
11Rasruklene nwaka hyaka pchinikna suxone, satkaka yomletshi hislahatshri poktshi yatka runkaklewaxyawakapna tsru hixikatshinwa sacerdote-ne ptowru hakanhatshritka.
12Waneya tsru hixikatshinwa sacerdote-ne hiyrunu tsrukakalune judeu-ne hapatjeta hjemahchinikankajyawakapna hanu rixanna. Waneya tsru tiyiro renekatkana soldado-ne yomletshi hislahatshine.
13Hiyrunu wanna wla tshinna soldado-ne:
— Wla htshinanu: “Hoyetshno wumkakanaxinixka rasruklene tshowhutaplu himanni.”
14Seyni xye pirana hjeminipa phuru Pilatos, wiynumsatanru hma kojwakahchinikanuxyawakanupa.
15Hiyáhoni soldado-ne yoptotlo tiyiro waneya tsru hixikatshinwa sacerdote-ne tshinakjixyawakna potuko htshinatkana. Hiyáhoni xye pirana soldado-ne hinkakle hipalapiranatatka judeu-ne tskalaya haté xawakni.
Jesus Hakanhiywaka Galileia Tshijneya Piranapni
16Waneya onze rasruklene Galileia tshijne hyatkana, himriji Jesus tshinyawak-potukna.
17Jesus rexinixkana, rimalwutluna seyni pimrine satkaka hi halixlu.
Tsru Towutlu Piranapni
18Waneya Jesus hapyehitna rasruklene waneya wane htshinna:
— Hita henekka psol-potuko tsru hitakkaluru tenhohneya tshij-koxa.
19Wale tshinanu hyanu. Hasrukanna ptowru tshijne hajene. H-batiza-tanna Hoyakalu Hirtshi hiwakaya, Hoyakalu Whene hiwakaya, Hoyakalu Hiwejikaluru hiwakaya.
20Hasrukanna kajnako rixyawakapna wale pirana psoluka ntowuthi hinkaklexyawaka. Hiyrun-koxa hixayma nwanu psol-hohneko hikeklu hohne mnikawnakatupa.
Currently Selected:
Mateus 28: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
