Yohana 10
10
1Amin, amin, namburra, esiingie na mbenge ghati ya ifio lwa magonji, nde akwea hengi na hengi, niye mhiwi na msoka.
2Eingia na mbenge niye Mrisha magonji.
3Emjuuiaya uu mwinda mbenge, na magonji mesikia ighonda, ameitanga magonji makwe na izina, ameete shigati.
4Ekimang’ola magonji makwe, atonga kurongora hawo, na magonji memratera amu wemtisiwa ighonda.
5Mugheni tewemratere amu tewemtisiwe ighonda la mugheno.
6Mfanano uu akawawurra Isa, kake tewevitisiwe vindu evitetie.
7Akatetawa Isa, Amin, amin, namburra, ti mi ni mbenge ya magonji.
8Wose wezie kuwoka hangu ni wehiwa na wesoka, kake magonji temewasikia ighonda.
9Mi ni mbenge, eingia na mi enekia, eneingia, enefuma, enewona marisho.
10Mhiwi teza nde ahiwe, asinze, anyamare: mi nizie wawone moo, na wanete kuuwona.
11Mi ni mrisha wedi, Mrisha wedi evika moo wakwe elwa magonji.
12Eokie na mshahara na esiokie mrisha, na esiokie mwenye magonji, ekimbona iginga leza, amashiga magonji, ematuka, iginga limagura, limagawanya magonji.
13Eokie na mshahara ematuka, amu kuoka na mshahara tiki, na temarinda magonji.
14Nimi niye mrisha wedi, niwatisiwe wala wangu, nitisivika na wala wangu.
15Sandu enitisiwa Apa, huwo nami namtisiwa Apa: na moo wangu nauwika elwa magonji.
16Na magonji meingi nina, mesiwa ifio ili, nawo kiniwe niwaete, nawo wenenisikia ighonda, ineoka ifio mwe na mrisha mwe.
17Amu ii Apa enikundie, amu mi nauwika moo wangu niuuhewa.
18Tehena ewushija, nde mi nauwika mwenye, nina zinya za kuuwika, nina zinya za kuuhawa, na kiteto iki naingwa na Apa wangu.
19Wayahudi wakaghawawa na viteto ivi.
20Wakateta weingi wawo, Ena luhungu, kucha kwakwe kwateka, nikini mumsikija?
21Weingi wakateta, Mwenye luhungu teteta huwo. Luhungu luidima kumjuua meso ebajikameso?
22Iokie musi wa kutasa ndaswa ghati ya Yerusalemi, na misi ya kisie.
23Isa akasela hekaluni ghati ya mbenge ya Sulemani.
24Wakamjunguluka Wayahudi wakamburra, Mtano nirini uigure ngoro yetu, Ukioka Masiya, utuwurre na some.
25Akatalwa Isa, Namburra na tomuitikija, vindu naviareha na izina la Apa wangu, ivi viniwondjia mburi.
26Kake unwi tomuitikija, amu si unwi wa magonji mangu, sandu nimburrie.
27Magonji mangu menisikia ighonda, nami nametisiwe namo meniratera.
28Nami namaainga moo wa tendarasi, na temeneteka tendarasi, na mundu teidima kumasoka mkononi hangu.
29Apa wangu eniingie mbaha kukela wose, nete teidima mundu kumasoka mkononi hakwe Apa wangu.
30Mi na Apa mwe.
31Wayahudi wakauhawa mabwe wamgere.
32Akawatalwa Isa, Nambondjia vindu vyedi vingi hena Apa wangu; hena kindu ani munigera mabwe?
33Wakamtalwa Wayahudi, Hena kindu kiedi tokukugera mabwe, nde hena lung’endo, amu we, mwana Adamu, ukuosha Izuwa.
34Akawatalwa Isa, Tevitamiwe ghati ya torati yenyu, Mi nitetie, unwi maizuwa?
35Ekiwateta maizuwa wala weingiwe kiteto cha Izuwa (na matamo temaidima kubawa).
36Mumburra ula emgurie nganyi Apa akamwingija masangeni, Wateta na lung’endo, mikiteta, Mi ni Mwana wakwe Izuwa?
37Nisikaareha vindu vya Apa wangu, msiniitikija.
38Nikiviareha, msiniitikija mi, viitikijeni vindu, mbone kutisiwa na kuitikija ti ndeni hangu ni Apa, nami ndeni hakwe.
39Wakakundawa kumgura, kake akafuma ghati ya mikono yawo.
40Akatongawa hakwe sela ya keri ya Yardeni handu eokie kuwoka Yohana ekibatiza, akaikaa uko.
41Wengi wakaza hakwe, wakateta, Yohana tearehie luano, kake vyose emtetie uu Yohana vya kididi.
42Wengi wakamwitikija uko.
Currently Selected:
Yohana 10: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
