Yohana 11
11
1Heokie na mundu ewadjua, Lazaro wa Betania, wa kaa wawo Maryamu na Martha wanduwawo wakwe.
2Niye Maryamu ula emgerie marhamu Bwana, akamhaidja mawu na nyui jakwe, munduwawo wakwe Lazaro ewadjua.
3Amu ii wanduwawo wakwe Wakamwingijia, wekiteta, Bwana, yoa, ula umkundie ewadjua.
4Ekisikia Isa aketeta, Ndwari ii si ya kufwa, nde ya luisiso lakwe Izuwa, aisiswe Mwana wa Izuwa naye.
5Akawakunda Isa Martha na munduwawo wakwe na Lazaro.
6Ekisikia ti ewadjua akaikaa handu aho misi miri.
7Mtano ekuade akawawurra waanaloshwa, Tuhunduke ghati ya Uyahudi.
8Wakamburra waanaloshwa, Rabbi, misi ii Wayahudi wekundie kukugera mabwe, wenehundukawa uko?
9Akatalwa Isa, Tejioho saa ikumi na mbiri ya hemusi? Mundu ekisela hemusi tekibigha kichaa, amu awona changaji cha masanga ama.
10Mundu ekisela kio ekubigha, amu changaji tehena hakwe.
11Akateta ama, ekuade akawawurra. Lazaro mbuyaa wetu eshinjie, kake natonga nimbushe.
12Waanaloshwa wakamburra, Bwana, ekishinjia, enekia.
13Akuteta Isa kufwa kwakwe, wala wakaghamba eteta kushinjia kwa luwohi.
14Akawawurra Isa hena some, Lazaro efwie.
15Namwizihirwa unwi, mbone kuitikija, ti mi sioho uko, nde tutonge hakwe.
16Akawawurra Tomaso (eitangwa Maza) waanaloshwa waghenji, Tutonge na uswi, tufwe hamwe naye.
17Ekiza Isa akawona ti eokie misi minne ghati ya mbira.
18Betania ioho afuhi na Yerusalemi, sandu stadio ikumi na sano.
19Wakaza Wayahudi wengi hawo Martha na Maryanu, wawahunduie elwa munduwawo.
20Naye Martha ekisikia ti Isa eza, akamtongia; Maryamu akaikaa nyumbeni.
21Martha akamburra Isa, Bwana idje we aha, mundu wetu idje tekifwa:
22Nde mtano ngeriaha natisiwa vyose uvikundie hakwe Izuwa, Izuwa enekuinga.
23Isa akamburra, Munduwenyu enewuka.
24Akamburra Martha, Natisiwa ti enewuka ghati ya kuwuka kwa musi wa kuidiwa.
25Akamburra Isa, Mi ni kuwuka na moo, eniitikija, ekifwa, eneoka na moo.
26Na ula eoka na moo ekiniitikija tafwaye tendarasi. Wamaitikija ama?
27Akamburra, Ee, Bwana, naitikija ti niwe Masiya, Mwana wakwe Izuwa, eza ghati ya masanga.
28Ekiteta ama akatonga akamwitanga Maryamu munduwawo, akambewedia, ekiteta, Mlosha eoho, ekuitanga.
29Naye ekisikia akawuka wangu akamzia.
30Na Isa esimefika ghati ya kaa, kake eoho handu emtoranie Martha.
31Amu ii Wayahudi weokie naye ghati ya nyumba wakamhunduia, wekimbona Maryamu ti ewuka wangu akafuma, wakamratera wakateta, Etonga hena mbira eiye uko.
32Maryamu ekiza handu eoho Isa, akambona, akamgura mawuni, ekimburra, Bwana, idje we waha munduwetu idje tekifwa.
33Isa ekimbona ekiiya nawo Wayahudi wetikane naye wekiiya, akaregija ngoroni, akashiniwa,
34Akateta, Nihi mumbikie? Wakamburra, Bwana, uze, uyoe.
35Isa akang’ola masoji.
36Wakateta Wayahudi, Yoa sandu emkundie.
37Weingi wawo wakateta, Teidima uu, amjuue meso ebajikameso, kuareha ti uu asifwe.
38Isa, ekiregijawa ngoroni, akafika hena mbira. Leokie na mbanga, na ibwe liwikwa wanga hakwe.
39Akateta Isa, Ushijeni ibwe. Akamburra munduwawo efwie, Martha, Bwana, ngeriaha awoa, amu afika misi minne.
40Akamburra Isa, Sikuwurre ti ukiitikija unekuwona kuisiswa kwakwe Izuwa?
41Wakaliwushija ibwe eyedjwe efwie. Isa akawushija meso makwe wanga, akateta, Apa, nakuinga haika ti wanisikia.
42Nami natisiwa ti wanisikia misi ose, kake elwa matorano majunguluka nitetie, wawone kuitikija ti niwe uniingija.
43Ekiteta ama akang’ola ighonda ibaha, Lazaro, fuma na shigati!
44Akafuma ula efwie, ekichungwa mawu na mikono na nguo, na usho wakwe uchungwa na leso. Akawawurra Isa, Mchungueni, mshigeni atonge hakwe.
45Wayahudi wengi, wezie hakwe Maryamu, wakaviyoa vindu eviareha wakamwitikija.
46Weingi wawo wakatonga hena Mafarisayo, wakawawurra eviareha Isa.
47Wakawunganya wakohani wabaha na Mafarisayo lumungu, wakateta, Tuareha kini? amu mundu uu eareha maluano mengi.
48Tukimshiga huwo wose wenemwitikija, na Warumi weneza wenetuwusha uswi na handu na mbare.
49Mwe wawo Kayafa, eokie mkohani mbaha mwaka ula, akawawurra,
50Unwi tomutisiwa kiteto na tomkusara ti ituwe mundu mwe afwe elwa wandu, mbare yose wesiteke.
51Ama tematetie na kucha kwakwe ye, kake ekioka mwaka ula mkohani mbaha akamwotia ti Isa enefwa elwa mbare.
52Na si elwa mbare ila tiki, nde waana wa Izuwa weghawanyika awawunganya hamwe.
53To musi ula wakateta mburi wamkome.
54Isa teseliewa hena some ghati ya Uyahudi, kake akafuma uko mtano handu afuhi na mashigati, mtano kaa iitangwa Efraim, akaikaa uko na waanaloshwa wakwe.
55Ikafikia Pasaka ya Wayahudi, wakakwea wengi mtano Yerusalemi ghati ya isanga kuwoka kwa Pasaka, wakuzerrije.
56Wakamwenda Isa, wakateta wonawo, wekiimuka hekaluni, Mwawonaze, tezia hena itasi.
57Weng’olie wakohani wabaha na Mafarisayo kiteto, ti mundu ekimtisiwa eoho, awawondje, wawone kumgura.
Currently Selected:
Yohana 11: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
