Yohana 12
12
1Na misi tandatu kuwoka kwa Pasaka, Isa akaza Betania, handu eoho Lazaro efwie, embushije ghati ya wefwie.
2Wakamwarehia uko kidjo cha chamageri; Martha akainda, Lazaro akaoka mwe wao wekuyedje naye.
3Naye Maryamu ekiuha ratli ya marhamu ya nardo izerre yenye izora nyingi, akambira Isa mawu, akahaija mawu makwe na nyui jakwe, nyumba ikaizua na mbungo yakwe marhamu.
4Akateta mwe wa waanaloshwa wakwe, Yuda wa Siman Iscariota, enemng’ola.
5Nikini marhamu ii teitaghwa hena dinari maghana matatu, wakaingwa wakiwa?
6Akamateta ama si amu erinda wakiwa, kake amu kuoka mhiwi akaoka na kikuchu, akavitika vyegeriwe.
7Akateta Isa, Mshige, auvikia musi wa kujikwa kwangu.
8Amu wakiwa mna misi ose henyu, mi misi ose tomnami.
9Matorano mengi wakamtisiwa Isa eoho, wakaza si elwa Isa tiki kake wambone na Lazaro ewukie hena kufwa.
10Wakateta mburi wakohani wabaha wamkome na Lazaro.
11Amu elwa lwakwe Wayahudi wengi wakafuma, wakamwitikija Isa.
12Musi wa keri wakwe matorano mengi wekiza ghati ya itasi wekisikia ti Isa eza Yerusalemi,
13Wakamauha mani ma machangara wakafuma wambone, wakang’ola ighonda, Hosanna, atasiwa ula eza na izina lakwe Bwana, niye Mfumwa wa Israeli.
14Isa ekimbona mwana njoe akamkwea sandu metamiwe.
15Usiondoke, kibora Sayuni, yoa, Mfumwa wako aza, emkweie mwana wa njoe.
16Vindu ivi tewetisiwe kuwoka waanaloshwa wakwe, nde ekinaguriwe nganyi Isa, niho wekikumbuka ti ivi viokie vitamiwe, navyo viokie wemwarehie.
17Matorano mala meokie naye, ekinamwitanga Lazaro ghatiya mbira, akambushija hena kufwa, wakawondja mburi.
18Amu ii wakamzia matorano, amu wesikie ti aluarehie luano ula.
19Mafarisayo wakateta wohenawo, Yoeni sandu tusiwe kiteto, Yoa, masanga mamratera.
20Weokie na Wayonani ghati ya wawo wezie waombe ghati ya itasi.
21Wakamzia Filipo, eokie wa Betsaida ya Galilaya, wakambujanya wekimburra, Bwana, tukundie kumbona Isa.
22Akaza Filipo akamburra Andrea, na Andrea na Filipo wakamburra Isa.
23Isa akawatalwa ekiteta, Saa yafika aguriwe nganyi Mwana wa Adamu.
24Amin, amin, namburra, mbeu ya ngano isikagwe si ikafwe, iikaa mwenye, ekifwa eng’ola mawonwa mengi.
25Ekundie ngoro eneitesha, naye eisuie ngoro ghati ya masanga ama eneikija hena moo wa tendarasi.
26Mundu ekiniinda eniratere, nami handu nioho, uko eneoka na mwinda wangu; mundu ekiniinda, Apa enemguria nganyi.
27Yoo ngoro yangu iregije, nitete kini? Apa unikije ghati ya saa ii, kake elwa ii nizie mtano saa ii.
28Apa, uligurie nganyi izina lako. Ikaza ighonda ghati ya wanga, Niligurie nganyi na ninegurawa nganyi.
29Matorano weimuke wakasikia, wakateta, Yaoka kururuma. Weingi wakateta, Malaika etetie naye.
30Akatalwa Isa, akateta, Ighonda ili teliokie elwa mi, nde elwa unwi.
31Ngeriaha kuoho kuchila kwa masanga ama, ngeriaha mbaha wa masanga ama enetaghiwa some.
32Nami nikiwushijwa ghati ya isanga ninedjuta hangu vyose.
33Akateta ama ekiwondja kufwa enefwa.
34Matorano wakamtalwa, Uswi tusikie ghati ya torati ti Masiya eikaa tendarasi: nini wateta we ti tiwe Mwana wa Adamu kuwushijwa? niani uu Mwana wa Adamu?
35Akawawurra Isa, Ngeriaha misi si mingi changaji kioho henyu: seleni mkioka na changaji, kija kisimgure, amu ula esela ghati ya kija tetisiwe handu etonga.
36Mkioka na changaji, kiitikijeni changaji, muwone kuoka waana wa changaji. Akateta ama Isa, akatonga hakwe akakuwisa.
37Kake ekioka emaareha maluano mengi huwo kurongora yawo, tewamwitikija:
38Kiteto cha Isaya nabii kifike ekiteta, Bwana niani ejiitikija mburi jetu, na mkono wakwe Bwana ajuuiwa ninani?
39Amu ii teweidime kuitikija amu atetawa Isaya,
40Awabaja meso, akawaareha ngoro idindie, wesiwona na meso, wesikusara na ngoro, wagharuke, niwakije.
41Nivyo evitetie Isaya ekiuwona ubaha wakwe akamtetia.
42Mtano na merangoni mwa wabaha wengi wakamwitikija, kake elwa Mafarisayo, tewemratera, wasing’oliwe ghati ya sunagogi.
43Amu wakakunda kuisiswa kwa wandu kukela kuisiswa kwakwe Izuwa.
44Isa akang’ola ighonda akateta, Eniitikija, teniitikija mi nde ula eniingije.
45Eniyoa mi, emyoa eniingija.
46Nizie changaji ghati ya masanga, ula eniitikija asiikae kijeni.
47Naye evisikia niviteta asivigure, mi simchilia, amu siziemi nimachilie masanga, kaka nimakije masanga.
48Enisua, esivikunda niviteta, ena ula amchilia, kiteto nikiteta, nicho kinemchilia musi wa kuidiwa.
49Amu mi sitetie na mburi jangu tiki, kake eniingije Apa, uu akaniinga viteto nivitetawo na nivighambawo.
50Nami natisiwa ti kiteto chakwe ni moo wa tendarasi, Amu ii niviteta mi, sandu Apa eniwurra, nivyo nitetawo.
Currently Selected:
Yohana 12: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
