Yohana 13
13
1Kuwoka kwa itasi la Pasaka, ekitisiwa Isa ti saa yakwe yaza evetie ghati ya masanga ama kutonga hakwe Apa; ekioka awakundie wala wakwe ghati ya masanga, akawakunda mtano kuidiwa.
2Kidjo cha chamageri kiokie, Shetani emgurie ngoro Yuda wa Siman Iscariota emng’ole;
3Ekitisiwa Isa ti Apa emwingie vyose mikononi hakwe, na ti efumie hakwe Izuwa akaoka ekimhundukia Izuwa;
4Akawuka ghati ya kidjo, akawika nguo jakwe, akauha kidami, akakuchungia.
5Akagera mbombe ghati ya mwanje, akaza awaoje mawu waanaloshwa, na amahaije na kidami ekichungiwe.
6Akaza hena Siman Petro, naye ekamburra, Bwana, we wanioja mawu?
7Akatalwa Isa, akamburra, Niviareha tutisiwe we ngeriaha, unetisiwa ekuade.
8Akamburra Petro, Tunioja mawu mangu mtano tendarasi. Akamtalwa Isa, Nisikuoje, touna ngata nami.
9Akamburra Siman Petro, Bwana, si mawu mangu tiki, nde na mikono na mtwi.
10Akamburra Isa, Ula eogha teimbeye kuojwa nde mawu, kake ni ezerre pia: na unwi mzerre, nde si wose.
11Amu emtisiwe ula enemng’ola; amu ii akateta, Tomzerre wose.
12Ekinawaoja mawu akajiuha nguo jakwe, akakuyajawa, akawawurra, Mutisiwa nimwarehieze?
13Muniitanga Mlosha na Bwana, mteta nezo, amu nimi.
14Nikioka nimwoja mawu mi Bwana na Mlosha, na unwi imbe kuojana mawu.
15Amu namwinga fwana, sandu nimwarehe mi, na unwi mwarehe.
16Amin, amin, namburra, mzora si mbaha kukela bwana wakwe, kana ula eingijwe kukela ula emwingija.
17Mkimatisiwa ama mnetasiwa mkimaareha.
18Simtetie wose; natisiwa wala niwasawurrie; kake vitamo vifike, ula ela kidjo hamwe nami aniwushijia kuwu kwakwe.
19Ngeriaha namburra kuwoka esimeoka, na inekaoka mwitikije mimi niye.
20Amin, amin, namburra, emwikajasi ula nimwingije enikaja mi, naye enikaja mi emwikaja ula eniingije.
21Ekiteta ama Isa akaregija ngoro, akateta, Amin, amin, namburra, ti mwe wenyu enening’ola.
22Waanaloshwa wakayoana wekifwiwa ni mtwi navyo eviteta.
23Eokie mwe wa waanaloshwa wakwe ekiyajwa mbafuni ha Isa, emkundie Isa.
24Akamkonya uu Siman Petro ambujanye niani emteta.
25Ekiyajwa uu mbafuni ha Isa akamburra, Bwana, Niani?
26Akatalwa Isa, Niye ninemtonya ninechibikia, Naye ekinachibikia akamwinga Yuda wa Siman Iscariota.
27Kutera ya kutonya Shetani akamwingia, Akamburra Isa, Kindu warehe, ukiarehe wangu.
28Na tehena mundu eyejwe etisiwe hena kindu ani emburrie.
29Weingi wakaghamba, ekioka Yuda ena kikuchu, ti Isa emburrie, Zora vindu tuvikundie vya itasi, au ang’ole kindu cha wakiwa.
30Ekiuhia kutonya ngeriahaichi akafuma; kikaoka kio.
31Ekinafuma akateta Isa, Ngeriaha eguriwa nganyi Mwana wa Adamu, na Izuwa eguriwa nganyi naye.
32Izuwa ekiguriwa nganyi hakwe, Izuwa enemgura nganyi mwenye, na ngeriahaichi enemgura nganyi.
33Waana, hadongowa nioho na unwi, Mnenienda, na sandu niwawurrie Wayahudi ti handu nitonga unwi tomuidima kuza, huwo ngeriaha namburra na unwi.
34Kiteto kisha namwinga, mkundane; sandu nimkundie unwi, na unwi mkundane.
35Amu ii wenetisiwa wose unwi ni waanaloshwa wangu, mkioka na kukundana unwi na unwi.
36Akamburra Siman Petro, Bwana, utongahi? Akamtalwa Isa, Handu nitonga tuidima kuniratera ngeriaha, uneniratera ekuade.
37Akamburra Petro, Bwana, nikini siidima kukuratera ngeriaha? Ninewika moo wangu hena lwako.
38Akatalwa Isa, Unewika moo wako hena lwangu? Amin, amin, nakuwurra, nguruwi teneiya kuwoka usimenikania katatu.
Currently Selected:
Yohana 13: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
