Luka 14
14
1Ikaoka ekinaze nyumbeni ha mbaha mwe wa Wafarisayo musi wa Sabato ale kidjo, wakaoka wekimnyatia. 2Heokie na mundu msongorana wakwe ewadjua ndwari ya kuwimbwa. 3Akatalwa Yesu, akawawurra waana wa wuchili na Wafarisayo, ekiteta, Ze? Ni kyedi kumhodja musi wa sabato, kana si huwo? 4Wakahuja. Akamwuha, akamhodja, akamsama. 5Akawawurra, Niani wenyu ena njoe kana ng’ombe agwa na iwongo, esimng’ola chwii ila musi wa sabato? 6Nawo wasiidime kumtalwa ivi.
7Akawawurra mfwanano wala weitangwa, ekinawone wundu wevisawura vichumbi vya kuwoka; 8ekiwawurra, Ukiitangwa ni mundu ngasuni, usiikae ghati ya vichumbi vya kuwoka; isioke kwakicha hena ena luisiso kukela lwako aitangwe naye; 9mwenye kumwitanga we na ye asize, akuwurre, Mshighirie uu aikae; niho unewokwa ni soni kuuha handu ha nyuma. 10Kake ukiitangwa tonga ureikaa handu ha nyuma; nesa ula ekuitange ekiza akuwurre, Mbuyaa, songeria uko; niho uneoka na nganyi mesoni ha wose weikee hamwe nawe. 11Amu ose ekukweja enesejwa; naye ekuseja enekwejwa.
12Akamburra ula emwitange, Ukiareha kidjo cha hemusi kana cha chamagheri, usiwaitange wambuyao, nete wandwenyu, nete mbare yako, nete walatya wena mali; wasikuitangewa nawo, uwone kuihwa. 13Kake ukiareha kidjo kibaha, uwatighe wakiwa, virema, wechingilika, webajike‐meso, nawe uneoka keba; 14amu tewena cha kukuihia; amu uneihwa hena kuwuka kwa wandu wedi.
15Ekinavisikie ivi mwe wawo weikee hamwe naye akamburra, Keba ula enela kidjo ghati ya ufumwa wa Izuwa. 16Akamburra, Mundu mwe earehe kidjo kibaha; akawaitanga wandu weingi: 17akamtuma muzoro wakwe magheri ma kidjo kuwawurra wala weitangwe, Izoni; amu ingeriaha chaidivika. 18Wakawoka wose hena ngoro mwe kuomba washigiwe. Wa kuwoka akamburra, Nazora mteme, yaniwe kutonga kuuyoa, nakuomba nishigiwe. 19Ungi akaghamba, Nazora virigha vya ng’ombe visano, nitonga nivigheshe; nakuomba nishigiwe. 20Ungi akaghamba, Naaika mche, huwo siidima kuza. 21Akaza muzoro, akamtindia mzuri wakwe ivi. Niho mwenye nyumba akaregija akamburra muzoro wakwe, Fuma wangu, utonge nzia mbaha na ndongo ja kiongo, na weokie wakiwa, virema, webajike‐meso, wechingilika uwaete na aha. 22Muzoro akaghamba, Mzuri, viarehika vila uviaghanyie, kake hena handu ingeriaha. 23Mzuri akamburra muzoro wakwe, Fuma utonge nzieni na mihakeni, uwasingirije kuingia, nesa nyumba yangu iwone kuizua. 24Amu namburra, Wandu wala weitangwe tewenekichama kidjo changu mtano mwe.
25Wakaraterana naye matorano meingi; 26akagharuka akawawurra, Mundu ekiza hangu, esishishirwa ni wawee, na mee, na mche wakwe, na waana wakwe, na wandwawo, na warumburie, mtano na moo wakwe ye, teidima kuoka mwanalosha wangu. 27Ose asitika msalaba wakwe, na kuniratera mi, teidima kuoka mwana losha wangu. 28Amu niani wenyu ekikunda kujenga mnara, esiikae kuwoka, na kutara nzoro, ti ena vindu vya kuufisha? 29Isioke kwakicha ekiwoka kujenga esiidime kuidiwa, wose wemyoa wawoke kumsola, 30wekiteta, Mundu uu ewokie kujenga nete tena zinya ja kuwuidiwa. 31Kana mfumwa ani, ekitonga kubighana na mfumwa ungi ngondoni, esiikae kuwoka atete mburi ti aidima na maghana ighana kutorana na ula eneza wanga yakwe na maghana ighana keri? 32Kwakicha si huwo, magheri ula ekioka hae, atuma wasu, akunda vindu vya kukundana. 33Na huwo mundu ose wenyu esivisua vyose evina, teidima kuoka mwanalosha wangu. 34Munyu ni kindu chedi; kake munyu ukioka watesha mnono wakwe, nikini kiufwaniawa? 35Touwewawo nete hena mteme nete hena kitondo; wandu wautagha. Ula ena masikio ma kusikia asikie.
Currently Selected:
Luka 14: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
