Luka 15
15
1Na weokie wekimsongeria weuhia lushango wose, nawo wenye ng’oki, wamsikije. 2Wakanunuwikia Wafarisayo na watama, wekighamba, Uu etigha wenye ng’oki, ela nawo.
3Akawawurra mfwanano uu, ekiteta, 4Mundu ani wenyu eokie na maghonji ighana, imwe lamo likimtekia, esishige mala makumi kenda na kenda ishighati, ekilitongia lila lateka, mtano ekiliwona? 5Na ekiliwona, eliwikia kituroni hakwe ekiizihirwa. 6Naye ekiza hakwe, awaitanga wambuyae na walatya wakwe, awawurra, Izihirweni hamwe nami, amu naliwona igonji langu litekie. 7Namburra unywi, huwo kuneoka kuizihirwa wanga hena mwenye ng’oki mwe echwamuti, kukela hena wedi makumi kenda na kenda, wesikundie kuchwa‐muti.
8Kana mche ani ekioka na rupia ikumi, imwe ikimtekia, esiwasha taa, na kuhaiya nyumba, ekienda hena lunyarki, mtano ekiwona? 9Na ekiiwona, ewaitanga wambuyae na walatya, ekiteta, Izihirweni hamwe nami, amu naiwona rupia ila itekie. 10Huwo namburra unywi, kuoho kuizihirwa msongorana wa malaika wa Izuwa hena mwenye ng’oki mwe echwa muti.
11Akaghamba, Mundu mwe eokie na waana weri; mdongo wawo akamburra wawee, 12Apa, ununge ifungu langu la mali liniguia. 13Akawaghawia mali makwe. Na kutera kwa misi si miingi mwana mdongo akawunganya vyose akazoka kutonga isanga la hae; uka akazarazara mali makwe hena kuketa viwiwi. 14Na ekinaidiwe vyose, ikaoka nzaa mbaha isanga lila; akawoka naye kuwona wukiwa. 15Akatonga akakuguranya na inoti mwe wa isanga lila, ula akamtuma ngondeni hakwe kurisha nguwe. 16Akalangwa kuighuta hena makanda welie nguwe, esiingwe ni mundu. 17Na ekikuhundukia mwenye akaghamba, Wazoro awo wa apa weighuta wekishiga kidjo, nami nakomwa ni nzaa. 18Ninewuka, ninetonga ha apa, ninemburra, Apa, natekwa wanga ya Izuwa na msongorana wako; 19tekiniwe kuitangwa mwana wako; unioshe sa mwe wawo wazoro wako. 20Akawuka akamzia wawee; naye ekioka hae, wawee akambona, akamsaria, akasara, akamguia singoni, akamnyonyoza. 21Mwana akamburra, Apa, natekwa wanga ya Izuwa na msongorana wako; tekiniwewa kuitangwa mwana wako. 22Kake wawee akawawurra wazoro wakwe, Ng’oleni wangu suke ila yedi, mumudoke; mwingeni pete kichaeni na viratu maghuni. 23Eteni na ndama ibandie, mreisiza, tule tuizihirwe. 24Amu uu mwana wangu eokie atefwa, naye awuka; eokie ateteka, naye awonwa. 25Wakawoka kuizihirwa. Na mwana wakwe mbaha eokie mtemeni; naye ekiza akasongeria nyumba, akasikia ngori na vivino. 26Akamwitanga mwanake mwe, akambujanya mburi, Hena kini? 27Akamburra, mundwenyu aza; na waweo amsiza ndama ibandie, amu ya kumbona na kiboha. 28Akaregija nete tekundie kuingia; wawee akafuma akamsemba. 29Naye akatalwa akamburra wawee, Yoa miaka ii yose nakutumikia, nete kiteto chako kimwe sishigie mi; nete touniingie mi mtano kidaghina, nuzihirwe na wambuyaa wangu. 30Kake mwana wako uu, elie mali mako hamwe na wabuya, ekiidiwa kuza, wamsizia ye ndama ibandie. 31Naye akamburra, Mwana wangu, we misi yose uoho hamwe nami, na vindu vyangu vyose nivyo vyako. 32Huwo kuizihirwa na kuizihirwa kuna ngalo, amu mundwenyu uu eokie atefwa, naye akia; eokie ateteka, naye awonwa.
Currently Selected:
Luka 15: TAVETA
Highlight
Share
Copy
Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.
