Hoixgara 15
15
1Egi wangra hisge Judea‐eja howajirena wakhinubhirera washa wagigus‐hirena egi wairena: Inke manijehirawinigi Mosesga woshga harnira hish’uwinigi, inke nina‐ambnikjanihawina.
2Esge jaja Paulus egi Barnabas wakhiba‐wakhira inke xununira, egi wakitak‐hirena, wowewira hakishjeg‐hirena, Paulus egi Barnabas egi hijanera hisge Jerusalem‐eja howarairanaga Apostelra egi xetera de‐e wawigiwax‐hirekjege.
3Egi wohokhu‐hojhi hakishu harairawina, Phenike egi Samaria e hahiowairena, horaghirena hirarujeja herera wakshainegi, egi wakhinub‐hirera harnaj wogishawara rokana wahirena.
4Egi jaja Jerusalem‐eja hahiregi wohokhu‐hojhieja rus‐hirawina egi Apostelra egi xetera wauinena, egi washara harnaj horaghirena Maura jagu wagiungi.
5Eshi Pharisera woinjab‐khina hota nashinena, e harnaxgunagra wairena: Wamajairegi e‐phinana egi Mosesga woehi harnira uinekje wigairena.
6Egi Apostelra egi xetera stoirena washa de‐e haehi.
7Egi jaja kikitagra rokana wairegi Peter nashina egi wawagena: Wangra egi hikhinubwira, hirapereswina, sireja Maura horogregi wangaijawina, hirarujeja herera hoit’e woragphira naxguinekjanera i‐harninegi howahira egi harnaxguinena.
8Egi Maura, E najgera wawiperes‐jena, wawogiragshana Naxirag Wakanjangra wawogaga wangagiuwira shesgena.
9Egi e hereranaga ne inke hisha hijan wangahiwinina, najge warninera waphi‐unjena harnaxgura hiu.
10Egi jagu‐u Maura gishja hish’uwishe, wironagra jashe warnineja je‐winapin waragit’umbwishe, e hianjiwahiwira egi shige ne inke hoxere hiruxurugwinina?
11Eshi harnaxguwina, Hirukanara Jesus Kristus najoja harnira hiu hiniambwina, hishge shesgairekjanena.
12Egi worohanka harnaj xapgunixji‐nankshana, egi Barnabas egi Paulus harnagixgu‐nangwina, horagnankshana Maura woijanti egi wowakanjang hirarujeja herera wagiu gigirawigi.
13Egi rashjainegi hageja Jakobga horniharna wena: Wangra egi hikhinubwira, harnaigixguwine:
14Simon horagshana, Maura jasge hounahianaga hirarujeja herera jorni wirahigi, wankshignanka eja warusanaga rash harnira harniwagigina.
15Egi de‐e hikisgegaja prophetra hoit’e warninera, wagaxangra.
16Egi de‐e hagnigi hakja hakirikjanena egi Dawid jhi harnira shige haunkjanena, e khanarnihera. Egi homahujaireja shige jhira haunkjanena, egi roja hakanaikjanena.
17Wankshig hirotara nigete Hirukanara horninege, egi hirarujeja herera harnaj jarnaga rash harnira hihokhuinegi, Hirukanara ena, E washa de‐e ungi.
18Maura wore harnira harnaj hiperes‐nanksana managre jeg‐ungi epareja.
19Esge de‐e wahena: Jarnaga hirarujeja howajira Maura eja howakshainera inke najge wojhi wahiwinine.
20Eshi wawagax hiwagiunkjawina, mau‐kiku gikarajra hinakewe khinekjena shishigkhinekjanege, egi inke hikikshaksha hiranikjena, egi warni‐doxi horushga russaghire ruj hinakewe‐khinekjena, egi wa‐i.
21Mosesga sirejaxji jhinag‐nagre eja harnaj wahogikhuinena, e woehira giairena wohokhu‐hojhieja Sabath hamb‐hokahi.
22Egi Apostelra egi xetera egi wahokhu‐hojhira harnaj hirairena, wang gijainekje hornihe warnineja egi Antiox‐eja howare‐wagigirekjege Paulus egi Barnabas wakishu. Rashra warajirena: Judas, rash hinup harnira Barsabas higairera, egi Silas, e wang xetera herena wakhinub horogeja.
23Egi wawagax hisha harni‐rewagigirena deshesge airena: Apostelra egi xetera egi wahkinubwira, hinikaragi rehirawina hikhinubwira hirarujeja hereraniwira, jarnaga Antiox‐eja egi Siria‐eja egi Silikia‐eja haranishawigi.
24De‐e naxguwira esge wauwina, hota eegi howahi hoit’e najge hiwoji ninawigi, naxirag washiniwira wanigirusheshe hirawi, wairena: Jasgegi manije hirawigishana phinashe egi woehira sh’uwingishana, wangnanka inke u‐washi shesge hinigairekjawi hihawinina.
25Egi histowianaga warnaina hishankira hawira, phinguni hirewahina, wang gijainja eja howare‐hawina Barnabas egi Paulus wawagixetewira wakishu.
26Wang de‐e wankshighoi harninera wakurushjanehirena, Hirukana harniwira Jesus Kristus rash harnira hawau.
27Esge shige Judas egi Silas rewagigiwina, e shige washa de‐e i‐hironigirag‐hirekjanihawina.
28Naxirag Wakanjangra giphinguni hirewahina egi nishge phinguni hiarawina inke wak’in xete hiraijera k’in‐ningiginikjanihawina washa de‐e phinana eshana.
29Egi mau‐kik’u warni nab higiruxajhire ruj hinakewe khiwianje, egi wa‐i egi washa doxi horushga russaghire ruj hinakewe khiwianje egi hikikshaksha hinakewe khiwianje. Washa de‐e hinakewe warakhiwingi, phirawinana. Hophi howe ronigiguwine.
30Egi jaja rewagigiregi Antiox‐eja hahiregi, egi jaja worohanka sto‐wahiregi wawagaxra wawogairena.
31Egi jaja hajairegi, warukhegnanka hawau wogishawa hirena.
32Egi Judas egi Silas prophet hishge waunanke, wakhinubra hoit’era rohaxji wirakara’shina egi mashja wahina.
33Egi hirarexji hipa hiwushairegi wakhinubwira rashguni keregigirawina, Apostel‐eja howakarairena.
34Shesgarnunige Silas higu eja unjera giphina.
35Paulus egi Barnabas hishge Antiox‐eja higu unankshana, Hirukanara hoit’e harnira wagigus egi wahokhunankshana egi hijanera roha shige.
36Egi hamb jarnahangiregi Paulus Barnabas wagena: Hiwakhinubra shige hiwomakhini hinekjena, jhinag hajainjashana. Hirukanara hoit’e harnira hiwihokhuna, jasge hinankhi hiwajakjena.
37Egi Barnabas Johnga rash hinup harnira Markus higairera hakishu re‐naina.
38Eshi Paulus inke shesgera hisha hakishu re‐phini hiranaina, e wat’unegi Pamphilia‐eja gurna egi inke ware wakishu ranina.
39Egi kikitagra rokana wairege khiruje‐hirena egi Barnabas Markus russana egi wajowe Kiprus‐eja howarena.
40Egi Paulus Silas gijana egi harairena, wakhinubra Maura najwoja harnieja horushja rehirena.
41Egi Siria egi Kilikia eahiwowena, wohokhu‐hojhira mashjawahi.
Currently Selected:
Hoixgara 15: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
