Lukga 10
10
1Washa de‐e hagregi, Hirukanara kerepanashagowi hijanera gijarussana, egi jhinagananka egi wominaghirera harnaj nupshana eja howarewagigina jowehieja, hajinja Exji howarekjanegi eja.
2Esge wawagena: Maxhoikisherera rokanaxjina, eshi maxhikisherera jarnagkhirana, esge maxhoikishere Hirukanara gitawire e maxhikisherera rewagigikjena maxhoikhishere harnieja.
3Rawinane, horuxujwire, jhasgarning hikisge shungjang horogeja howare‐ningigiwina.
4Inke shuroshu harnirawinine, shige panra, shige waguje, egi inke hisha hikaragi‐winianje nagueja.
5Egi jhi jagura hisha eja horakawawigi jorni wawiaje: Jhi de‐e rashgunikjena.
6Egi rashguni ninkjangra hisha hijajegi rashguni hashiniwira hakishu unkjanena, inke shesgarnigi, shige hakja harakarashinikjanihawina.
7Egi jhi‐eja hiwushawiaje, warujwiaje egi rajgawiaje washa jagu hornikuinawigi, waranagre woirowe gimignankshana. Inke jhira howe wou harawinianje.
8Egi jhinag jagura eja hisha horakawawigi, egi hokewenigigirawigi, warujwiaje washa jagu jowerawieja nigishurawigi.
9Egi howashara hijarnankhi rushja wahiwiaje, egi wawagawiaje: Maura hungma harnira hiwusunsh jina.
10Eshi jhinag jagura eja hisha horakawawigaja egi inke hokewe‐ningigirawinigi, jhinag eja hihinabwiarnaga, nagura howarawiaje egi wawiaje:
11Jasgegi jhinag hashiniwinegi majushishignagre hirairajawina warnisinshjanihawina. Eshi hiraperesjanihawina de‐e, Maura hungma harnira hiwusunsh jigajerera.
12Egi warnigawina: Hambeja Sodom e hijaira hirohegjanena, jhinag she‐e e hijaira hawekjanena.
13Harawekjanena Xorasin, harawekjanena Bethsaida, wowakanjank rokana wagiuinegi Tirus egi Sidon eja nigiuirawire shesge wagigiregi, s’irejaxji haga najgerakarateg hiranana waiperisasag hornashiranaga raxojeja minag hiranana.
14Eshi Tirus egi Sidon eja herera woehieja hiraijera hiroheg hawairekjanena, ne hiraijera harawekjanihawina.
15Egi ne Kapernaumra wangregi harnini‐hajiakarairena, pej‐shishigeja hornit’unairekjanena.
16Hisha harnanixguwingi, harnaixgunkjanena, egi hisha hornishigwigi, hunshikjanena, egi hisha hunshigkhi, huingigira hoshig waunkjanena.
17Egi kerepana‐shagowira hakirirena wogishawa, wairena: Hirukanara, waxopinishishigra reshge jagu hiagawira hingiuinawina rash hashinira hiauwi.
18Egi Jesus wawagena: Hajharna Satanra wangregi howaji shibrena wakanja hojambnisge.
19Horuxujwire homashja hornikuwina wakhara egi skorpionra warnashi, egi hornish’ighirawira homashja warninera wawirukana ningigiwira, egi inke hisha washa ningishga ruxurug hiranikjanihawina.
20Shesgarnunige inke washa de‐e hawau wogishawawinine, naxiragnanka washa wiragawigi ningiuinawigi, eshi wogishawa phiraniwina rash washiniwira wangregi wagaxnangra esge.
21Jesus howagix eja naxiragra wogishawarna, egi wena: Wainiginapshana Jaji wangregi egi mara Hirukanara, washa de‐e nuxawa waragit’umbra washinperesra, egi wouphira, egi ninkjangnigra janti waragigira. Hojia Jaji, deshesge hira raiphinge.
22Washara harnaj hunkuna Jajiga. Egi inke hisha hiperesnina Hinigra peshe herera, eshi Hianjrashana hiperessana, egi inkisha hiperesnina Hianjra peshe herera, eshi Hinigrashana hiperessana, egi e hisha Hinigra hiperes‐hinana.
23Egi wironag warnieja hopahinashina, egi inekhi wawagena: Wogishawaxjinakshana hishjasu de‐e washara wajairena, washjawire.
24Hornigitagwina: Prophetra roha egi hungra, washa de‐e waja roguinena e washjawina, egi inke wajairanina, egi washa de‐e naxgu roguinena e nanaxguwina, egi inke warnaxguiranina.
25Egi horuxujre, waehisha nashina egi hiunjarna, wena: Hirukanara jagu haungi manegus wankshighoina duxuruigkjaneshe?
26Egi Jesus wagena: Woehieja jagu wagaxankshe? Jagu eja ag‐hashjashe?
27Egi horniharna wena: Mau Hirukana hashinira najge hashinira harnaj hiwoxete hiaje egi naxirag hashinira harnaj, egi homashja hashinira harnaj, egi warnai hashinira harnaj, egi wawirakishu‐wusunshra wawikisge khianje.
28Egi Jesus wagena: Phi waragena, de‐e uanje, egi wankshig‐shinkjanena.
29Eshi e khiraphinai wena, Jesus wagena: Peshe hiakipusunshgi hereshe?
30Egi Jesus horniharna wena: Wankshig hisha Jerusalem‐eja rena Jerixo howarena egi wamanuke hokit’unena, e waini warnira wagirushoroj hirena egi wapopoxhirena egi nigeowakarairena, jowe d’arna t’unairena.
31Egi eja herena nabhoruxaj hirukanaisha eja howena, egi jaja hajagi shegu hikijanra hahiowena.
32Egi shige Lewit‐hisha jaja eja higi hajarna egi shegu hikijanra hahiowena.
33Eshi Samarit‐hisha hikiwarakhi houanka eja jina, egi jaja hajagi najogijana.
34Egi hirahina, egi howapoxra wagijag‐shana, egi wikini egi nishuj wagiwaxuna, egi wanoijge harnira haminaggigina, egi hikiware hojhieja harnihina, egi hirakarana.
35Egi haininegi nigiowaregi egi Denaria nupiwi kurusanaga egi hirukanajega hokuna, egi wagena: Hirakarare egi jarnaga hawinsh shenanagi, jaja shige hakirigi hirowe ningigikjena.
36Hajanga dani hajane wamanukeja hokit’unega e wikiusunsh‐khinguni hirareshe?
37Egi wena: Hisha najojara kawahajega. Egi Jesus wagena: Rare, egi jasgehiga shesge hiaje.
38Egi herena, harairena jhinagisha eja hokawairena, egi hinugisha Martha higairera eojhieja hokewegigina.
39Egi hinugjega hinugisha khinubra Maria higairera, e Jesus si‐hieja minagshana, egi hoit’era harnagixgunakshana.
40Eshi Martha hawekhinjena wawagirajege egi hirajina, egi wena: Hirukanara, inke washa hiraranishanakshe hinug hakhinubra hit’urarnaga inekhi warnigitajane, hogiragre hingijirekjena.
41Egi Jesus horniharna egi wagena: Martha, Martha najgewornijina ne washara roha hawerakhina.
42Eshi washaisha u‐phira, egi Maria hophinjega e gijana, e inke girus‐phinikjanena.
Currently Selected:
Lukga 10: WIN
Highlight
Share
Copy
Want to have your highlights saved across all your devices? Sign up or sign in
Published by the American Bible Society in 1907.
