Yohanis 5

Yesus kasi bae laki-laki satu yang seng bisa bajalang

5:1-18

1Abis Yesus kasi bae pegawe istana tu pung ana laki-laki, Antua pi ka kota Yerusalem par iko orang Yahudi pung hari basar satu di sana. 2Di kota tu ada kolang aer basar satu tampa orang mandi. Kolang aer basar tu, akang ada dekat pintu maso satu ka kota Yerusalem yang orang kasi nama akang Pintu Domba. Dalang bahasa Ibrani, orang kasi nama kolang aer tu par Betesda.#5:2 Kolang ni paleng basar, sama deng lapangan bola. Akang pung kadalang labe dari 6 meter. Akang pung teras ada lima bua. 3Di teras-teras tu ada orang-orang saki banya paskali yang biasa tidor-tidor bagitu sa. Ada yang buta, ada yang tempang, deng ada lai yang lumpu. [Dong samua tidor-tidor di situ sa tunggu aer dalang kolang tu bagoyang. 4Barang, sakali-sakali Tuhan pung malekat turung la kasi bagoyang aer dalang kolang tu. Sapa sa yang turung kamuka waktu aer dalang kolang tu bagoyang, dia pung panyaki langsung bae, biar kata dia saki apa lai.]

5Di situ ada laki-laki satu yang su 38 taong seng bisa bajalang. 6Waktu Yesus lia laki-laki tu tidor-tidor di situ deng waktu Antua tau kalo laki-laki tu saki su lama, Antua bilang par dia kata, “Bu, ale mau bae ka seng?”

7La laki-laki tu bilang par Antua, “Sio Bapa e, beta mau! Mar, sapa tu yang mau tolong kasi maso beta ka dalang kolang tu waktu akang pung aer bagoyang? Waktu beta usaha maso ka dalang kolang tu, salalu sa ada orang laeng yang su maso kamuka beta.”

8Yesus bilang par dia kata, “Bangong, gulung ale pung tikar tu, la bajalang suda!” 9Waktu Yesus abis bicara bagitu, oras itu tu jua laki-laki tu langsung bae. Jadi dia bangong, gulung dia pung tikar, la bajalang.

Mar hari itu tu orang Yahudi pung hari Barenti Karja. 10Tagal itu, orang Yahudi pung pamimping-pamimping agama bilang par laki-laki tu kata, “Hoe bu! Ale tau ka seng kalo hari ini ni hari Barenti Karja? Kalo iko katong pung atorang agama, ale seng bole bawa ale pung tikar tu hari ini.”

11Mar laki-laki tu bilang par dong kata, “Bapa-bapa e! Orang yang kasi bae beta tu yang suru beta gulung beta pung tikar la bajalang.”

12Dong bale tanya dia kata, “Eh! Sapa tu yang suru se gulung se pung tikar la bajalang?”

13Mar laki-laki tu seng tau kata yang kasi bae dia tu sapa, tagal Yesus su tapele di tenga-tenga orang banya yang ada di situ.

14Abis itu, akang pung babarapa waktu bagini, Yesus baku dapa laki-laki tu lai dalang kintal Tampa Sombayang Pusat. La Antua bilang par dia kata, “Bu, dengar bae-bae. Ale su bae dari ale pung panyaki tu to? Jadi jang biking dosa lai! Jang sampe ale dapa labe tarbae lai dari yang kamuka tu.”

15Abis bicara deng Yesus, laki-laki tu pi kasi tau par orang Yahudi pung pamimping-pamimping agama kata Yesus tu yang kasi bae dia dari dia pung panyaki.

16Jadi, tagal Yesus kasi bae orang pas waktu orang Yahudi pung hari Barenti Karja, orang Yahudi pung pamimping-pamimping agama mulai cari jalang par biking susa Antua. 17Mar Yesus bilang par dong kata, “Bapa-bapa e! Sampe oras ni Beta pung Bapa sa karja sabang hari, biar kata itu hari Barenti Karja lai. Jadi, Beta jua musti karja biar kata itu hari Barenti Karja lai.”

18Tagal Yesus bilang bagitu, dong labe tamba usaha lai par bunu Antua. Dong biking bagitu bukang cuma tagal Antua kasi bae orang pas orang Yahudi pung hari Barenti Karja sa, mar tagal Antua jua kasi sama Antua pung diri deng Allah waktu Antua bilang kata Antua pung Bapa tu par Allah.

Yesus kasi tau soal Antua pung diri sandiri par pamimping-pamimping agama

5:19-47

19Yesus bilang par orang Yahudi pung pamimping-pamimping agama tu lai kata, “Bapa-bapa, dengar bae-bae tagal apa yang Beta bilang ni batul! Beta ni Allah pung Ana, jadi Beta seng bisa biking apapa iko Beta pung mau sandiri. Beta cuma biking apa yang Beta lia Beta pung Bapa ada biking, tagal apa yang Beta pung Bapa biking, itu jua yang Beta biking. 20Barang, Beta pung Bapa sayang Beta. Antua jua kasi unju samua yang Antua biking par Beta. Mar bukang cuma itu sa. Antua nanti kasi unju tanda-tanda herang yang labe basar lai par Beta biking. Tanda-tanda herang tu labe basar dari cuma kasi bae laki-laki yang seng bisa bajalang tu sa. Waktu bapa-bapa dong lia akang, bapa-bapa dong samua nanti taherang-herang. 21Tagal, sama deng Beta pung Bapa kasi bangkit orang mati la kasi hidop dong kombali, Beta jua nanti kasi hidop sapa sa iko Beta pung mau. 22Labe-labe lai, Beta pung Bapa seng jadi hakim par manusia, tagal Antua su kasi samua kuasa par Beta, biar Beta jadi hakim par manusia. 23Beta pung Bapa biking bagitu biar samua orang taru hormat par Beta, sama deng dong taru hormat par Antua. Sapa seng taru hormat par Beta, itu sama sa deng dia seng taru hormat par Beta pung Bapa yang utus Beta ka dunya ni lai.

24Dengar bae-bae tagal apa yang Beta bilang ni batul! Sapa yang dengar apa yang Beta bilang ni deng parcaya par Beta pung Bapa yang utus Beta, oras ni jua dia su mulai hidop tarus-tarus deng su seng dapa hukum lai. Barang, dia yang dolo musti dapa hukum dalang naraka, dia su bebas la su mulai hidop tarus-tarus. 25Dengar bae-bae tagal apa yang Beta bilang ni batul! Dong yang seng parcaya Beta tu macang deng orang yang su mati. Mar satu waktu, dong nanti dengar Beta, Allah pung Ana ni pung suara. Bukang cuma nanti, mar sakarang ni jua akang su jadi. Sapa yang dengar apa yang Beta bilang ni, dia nanti hidop tarus-tarus deng Allah. 26Barang, sama deng Beta pung Bapa ada pung kuasa par biking manusia hidop, Antua jua kasi kuasa tu lai par Beta par biking manusia hidop tarus-tarus. 27Antua jua kasi kuasa par Beta biar Beta bisa jadi hakim par putus manusia pung parkara, tagal Beta ni Ana Manusia.

28Jang herang dengar apa yang Beta baru bilang tu. Barang pas akang pung waktu, samua orang yang su mati nanti dengar Beta pung suara. 29La dong nanti kaluar dari dalang kubur la hidop kombali. Sapa yang waktu hidop biking bae, dia nanti hidop kombali par hidop tarus-tarus deng Allah. Mar sapa yang waktu hidop biking jahat, dia nanti hidop kombali par dapa hukum tarus-tarus.

30Beta seng biking samua tu iko Beta pung mau sandiri. Beta jadi hakim par putus manusia pung parkara iko apa yang Beta pung Bapa su bilang Beta musti biking. Tagal itu, Beta putus manusia pung parkara seng barát sabala. Barang, Beta seng biking samua tu iko Beta pung mau sandiri, mar iko Beta pung Bapa pung mau. Antua yang utus Beta datang ka dunya ni.

31Kalo cuma Beta sandiri yang jadi saksi soal Beta pung diri, pasti seng satu orang lai yang parcaya kalo apa yang Beta bilang tu batul.#Kaluar dari Mesir 17:6, 19:15 32Mar ada Satu Orang lai yang jadi saksi soal Beta. Antua tu Beta pung Bapa. Beta tau kalo apa yang Antua bilang soal Beta tu batul. 33Kamong su suru orang par dengar apa yang Yohanis Tukang Baptis tu kasi tau soal Beta. Apa yang dia bilang tu batul. 34Mar Beta seng parlu manusia jadi saksi par Beta. Beta cuma mau bilang soal apa yang Yohanis parna bilang par kamong sa, biar kamong parcaya akang la biar Allah kasi salamat kamong. 35Apa yang dia bilang tu macang deng lampu yang manyala tarang, yang biking kamong pung hati sanang paskali. Mar cuma sadiki tempo sa kamong sanang deng apa yang dia bilang tu.

36Mar samua yang Beta biking, akang jadi bukti Beta ni sapa. Samua yang Beta biking tu, akang labe panting dari apa yang Yohanis bilang soal Beta. Beta biking samua yang Beta pung Bapa suru. Antua mau Beta musti kasi klar akang samua. Samua tu jadi bukti kalo Beta pung Bapa di sorga yang utus Beta. 37Beta pung Bapa yang utus Beta tu, Antua yang jadi saksi soal Beta pung diri. Kamong seng parna dengar Antua pung suara ka seng parna lia Antua pung rupa. 38Kamong jua seng simpang Antua pung ajarang dalang kamong pung hati, tagal kamong seng parcaya Beta yang Antua utus ni. 39Kamong balajar Allah pung Tulisang sunggu-sunggu tagal kamong sangka kata kalo kamong biking iko apa yang kamong baca, kamong bisa hidop tarus-tarus deng Allah. Mar biar kata Allah pung Tulisang tu bicara soal Beta lai, 40kamong seng mau parcaya Beta, biar Beta bisa biking kamong hidop tarus-tarus deng Allah.”

41La Yesus bilang par orang Yahudi pung pamimping-pamimping agama tu lai kata, “Beta seng harap satu orang lai taru hormat par Beta. 42Mar soal kamong, Beta tau parsis kamong pung hati tu bagemana. Kamong seng sayang Allah sadiki lai. 43Beta datang deng Beta pung Bapa pung kuasa, mar kamong seng mau tarima Beta. Mar nanti kalo ada orang laeng datang deng dia pung kuasa sandiri, kamong tarima dia. 44Jadi, bagemana kong kamong bisa parcaya Beta, kalo kamong sandiri laeng suka makang puji laeng mar seng pastiu kata Allah yang satu areng-areng tu puji kamong ka seng? 45Jang kira kalo Beta yang nanti tudu kamong di muka Beta pung Bapa. Yang nanti tudu kamong di muka Beta pung Bapa tu Musa, orang yang kamong harap par tolong kamong tu. 46Barang, kalo kamong parcaya apa yang Musa tulis, kamong jua pasti parcaya Beta lai tagal Musa tulis soal Beta. 47Mar tagal kamong seng parcaya apa yang Musa tulis tu, bagemana kong kamong bisa parcaya apa yang Beta bilang?”

Currently Selected:

Yohanis 5: ABMA

Highlight

Copy