Yohanis 6

Yesus kasi makang labe dari lima ribu orang

6:1-15

(Matius 14:13-21; Markus 6:30-44; Lukas 9:10-17)

1Abis dari kota Yerusalem, akang pung babarapa waktu bagini, Yesus manyabrang ka dano Galilea pung sabala. Dano Galilea tu pung nama laeng dano Tiberias. 2-3Sampe di sabala, Antua nai ka gunung satu la dudu sama-sama deng Antua pung murid-murid di situ. Orang banya kawang-kawang iko Antua tarus, tagal dong su lia tanda-tanda herang yang Antua biking sampe orang-orang saki jadi bae. 4Waktu itu, orang Yahudi pung hari basar Paska su dekat.

5Waktu Antua angka muka lia kiri-kanang bagini, Antua lia orang banya kawang-kawang ada datang par Antua. Jadi Antua bilang par Filipus kata, “Filipus e! Kira-kira katong bisa bali roti di mana par kasi makang orang banya ni?” 6Antua bilang bagitu par tes Filipus sa, tagal Antua sandiri su tau kata Antua nanti mau biking apa.

7La Filipus bilang par Antua, “Bapa e! Biar kata satu orang karja dua ratus hari lai, mar dia pung gaji#6:7 Gaji: Waktu itu, tantara ka orang karja dapa bayar satu hari satu dinar (Matius 20:2). Jadi, kalo karja dua ratus hari, dong dapa bayar dua ratus dinar. tu seng sampe par bali roti par dong samua, biar kata satu orang cuma dapa sapanggal alus sa.”

8Mar Yesus pung murid satu lai nama Andarias, Simon Petrus pung ade laki-laki, dia bilang par Antua kata, 9“Bapa e! Ada ana laki-laki satu di sini yang bawa roti jelai#6:9 Jelai ni macang deng gandum ka padi. Akang pung harga labe mura dari gandum. Tagal itu, akang jadi makanang par orang-orang kasiang ka par binatang piara. Lia 1 Raja-Raja 4:28. lima bua deng ikang dua ekor. Mar kalo kasi makang orang banya ni deng akang, sapa makang sapa seng?”

10La Yesus bilang par Antua pung murid-murid tu kata, “Suru dong samua tu dudu do!” Di tampa tu rumpu-rumpu paleng banya, jadi orang-orang tu dudu di situ. Dari dong samua yang dudu tu, yang laki-laki sa mangkali ada barang lima ribu orang kapa.#Matius 14:21 Itu jua balong rekeng parampuang deng anana lai.

11Abis itu, Yesus ambe roti tu la sombayang minta dangke dari Allah par akang. Abis itu, Antua bage-bage akang par samua orang yang dudu di situ. Antua biking bagitu lai par ikang-ikang tu. Dong samua tu makang puas-puas. 12Waktu dong samua su makang sampe kanyang, Antua bilang par Antua pung murid-murid tu kata, “Tolong kumpul makanang yang labe tu do! Jang kasi tinggal akang tabuang-buang bagitu!”

13Jadi dong kumpul makanang yang labe tu. Dari roti jelai lima bua tu sa, orang banya tu makang seng abis akang sampe ada sisa sapulu dua bakol. 14Waktu orang banya tu lia tanda herang yang Yesus biking tu, dong bilang, “Memang batul! Seng sala lai! Antua ni Allah pung juru bicara yang Allah su parna janji nanti datang ka dunya!”

15Mar Yesus tau kalo dong tu mau datang par paksa Antua jadi dong pung raja. Tagal itu, Antua pinda ka tampa laeng lai di atas gunung tu biar Antua bisa sandiri di situ.

Yesus bajalang di atas aer

6:16-21

(Matius 14:22-33; Markus 6:45-52)

16Pas su mulai mati-mati galap, Yesus pung murid-murid turung dari atas gunung ka pinggir dano Galilea. 17Tagal su malang baru Yesus balong-balong datang baku dapa deng dong lai, dong nai parau la balayar ka sabala, ka kota Kapernaum. 18Waktu dong ada panggayo bagini, omba mulai basar di dano tu tagal anging paleng kancang. 19Pas dong su panggayo mangkali barang lima anam kilometer bagitu, dong lia Yesus ada bajalang di atas aer datang ka dong pung parau. Dong takotang paskali. 20Mar Yesus bilang par dong kata, “He, jang taku! Ini Beta ni.” 21Jadi dong sanang sampe dong kasi nai Antua ka dalang parau, la oras itu jua dong sampe di tampa yang dong mau pi di sabala tu.

Orang banya cari-cari Yesus

6:22-24

22Akang pung eso bagini, orang-orang banya yang masi tinggal di pinggir dano Galilea tu sadar kalo parau sabua areng-areng yang balabu di situ tu su seng ada lai. Dong jua sadar kalo Yesus pung murid-murid su panggayo parau tu ka sabala, mar Antua sandiri seng pi sama-sama deng dong.

23Waktu itu, ada orang-orang yang datang deng dong pung parau-parau dari kota Tiberias. Dong balabu seng jau dari tampa Tuhan Yesus sombayang minta dangke dari Allah par roti yang orang banya su makang kamareng tu. 24Jadi, tagal orang banya tu lia kalo Yesus deng Antua pung murid-murid seng ada di situ lai, dong langsung nai parau-parau tu la pi ka kota Kapernaum par cari Antua.

Yesus tu roti yang biking katong hidop

6:25-59

25Waktu orang banya yang iko Yesus tu baku dapa deng Antua di dano Galilea pung sabala, di kota Kapernaum, dong bilang par Antua kata, “Tuang Guru e! Bapa sampe di sini apa tempo?”

26Mar Yesus bilang par dong, “E, dengar bae-bae tagal apa yang Beta bilang ni batul! Kamong cari Beta bukang tagal kamong su lia tanda-tanda herang yang Beta biking, mar tagal kamong su makang roti yang Beta kasi sampe kamong pung poro tare. 27Jang karja cuma par cari roti yang nanti bisa rusak. Mar labe bae karja par cari roti yang seng bisa rusak, yang bisa biking kamong hidop tarus-tarus deng Allah. Beta ni Ana Manusia. Jadi Beta yang nanti kasi roti tu par kamong, tagal Beta pung Bapa su angka Beta la su kasi kuasa par Beta par biking bagitu.”

28Tagal Antua bilang bagitu, dong tanya Antua kata, “Bapa e! Kalo bagitu, katong musti biking apa biar katong bisa iko Allah pung mau?”

29La Yesus bilang par dong, “Dengar! Yang Allah mau tu, kamong musti parcaya Beta, Orang yang Allah utus ka dunya ni.”

30Mar dong bale tanya Antua lai kata, “Kalo bagitu, coba Bapa kasi unju tanda herang satu par katong kamari, biar katong lia la parcaya kalo Bapa ni Orang yang Allah utus! Jadi Bapa mau biking apa? 31Dolo waktu katong pung tete-nene moyang ada di padang gurun, dong makang roti dari sorga yang dong bilang akang par manna tu. Carita ni ada dalang Allah pung Tulisang yang bilang kata, ‘Antua kasi makang katong pung tete-nene moyang deng roti dari sorga.’ ”#Kaluar dari Mesir 16:4

32La Yesus bale bilang par dong, “E, dengar bae-bae tagal apa yang Beta bilang ni batul! Bukang Musa yang kasi roti dari sorga tu par kamong pung tete-nene moyang makang, mar Beta pung Bapa yang kasi. La sakarang ni, Antua jua ada kasi roti yang batul dari sorga par kamong. 33Barang, roti yang Beta pung Bapa kasi tu roti yang turung dari sorga par biking manusia di dunya ni hidop tarus-tarus.”

34La orang banya tu bilang par Antua kata, “Bapa e, kalo bagitu kasi roti dari sorga tu par katong tarus jua.”

35La Yesus bilang par dong, “Beta ni Roti yang batul-batul datang dari sorga, yang bisa biking manusia hidop tarus-tarus deng Allah. Sapa yang datang par Beta, dia nanti seng lapar-lapar lai. La sapa yang parcaya Beta, dia nanti seng aos-aos lai. 36Mar sama deng apa yang Beta parna bilang par kamong, biar kata kamong parna lia Beta, kamong seng parcaya Beta. 37Samua orang yang Beta pung Bapa su kasi par jadi Beta pung orang-orang tu, dong nanti datang par Beta. Kalo dong datang, Beta pasti tarima dong deng seng user dong. 38Barang, Beta datang dari sorga bukang par biking Beta pung mau sandiri, mar par biking Beta pung Bapa yang utus Beta tu pung mau. 39La Antua yang utus Beta tu seng mau paskali kalo dari samua orang yang Antua su kasi par Beta tu, ada yang mati tarus. Mar yang Antua mau tu biar Beta kasi hidop dong samua kombali waktu dunya ni su mau abis. 40Tagal yang Beta pung Bapa mau tu, sapa sa yang tau kalo Beta ni Allah pung Ana la parcaya Beta, dia nanti hidop tarus-tarus deng Allah. La waktu dunya ni su mau abis, Beta nanti kasi hidop dia kombali.”

41Tagal Yesus bilang kata Antua tu Roti yang turung dari sorga, orang-orang Yahudi tu bamulu di balakang Antua. 42Dong laeng bilang par laeng kata, “E, Dia ni Yesus to? Yusuf pung ana laki-laki. Katong kanal dia pung mama deng bapa. Jadi mangapa kong Dia bilang kata Dia datang dari sorga?”

43Mar Yesus bale bilang par dong, “Hoe, jang bamulu di balakang-balakang. 44Seng ada satu orang lai yang bisa datang par Beta kalo Beta pung Bapa yang utus Beta tu seng bawa dia par Beta. Sapa yang datang par Beta, Beta nanti kasi hidop dia kombali waktu dunya ni su mau abis. 45Dalang Allah pung juru-juru bicara dong pung tulisang jua su bilang kata, ‘Allah nanti kasi balajar dong samua.’#Yesaya 54:13 Tagal itu, samua orang yang su dapa kasi balajar dari Beta pung Bapa deng yang su dengar Antua pung ajarang, dong pasti datang par Beta. 46Seng ada satu orang lai yang parna lia Beta pung Bapa, cuma Beta yang datang dari Allah Bapa ni sa yang su lia Antua.

47Dengar bae-bae tagal apa yang Beta bilang ni batul! Sapa yang parcaya Beta, dia nanti hidop tarus-tarus deng Allah. 48Beta ni Roti yang batul-batul turung dari sorga, yang bisa biking manusia hidop tarus-tarus deng Allah. 49Kamong pung tete-nene moyang memang su makang roti yang dong bilang akang par manna tu, waktu dong bajalang langgar padang gurun. Mar biar kata dong su makang roti tu lai, dong tetap mati jua. 50Mar sakarang, di muka kamong ni ada Roti yang turung dari sorga. Sapa yang makang Roti ni, dia nanti seng parna mati. 51Beta ni Roti yang hidop, yang turung dari sorga tu. Sapa yang makang Roti ni, dia nanti hidop tarus-tarus deng Allah. Roti yang Beta maksud tu Beta pung badang sandiri yang Beta kasi par manusia di dunya biar dong bisa hidop tarus-tarus.”

52Pas dengar bagitu, orang-orang Yahudi tu baku malawang kong laeng bilang par laeng kata, “Ih, Laki-Laki bicara apa ni? Bagemana kong Dia bisa kasi Dia pung badang par katong makang?”

53La Yesus bilang par dong, “Hoe! Dengar bae-bae tagal apa yang Beta bilang ni batul! Sapa yang seng makang Beta Ana Manusia ni pung badang deng seng minong Beta pung dara,#6:53 Waktu Yesus bilang orang musti makang Antua pung badang deng minong Antua pung dara, Antua pung maksud bukang makang deng minong batul-batul. Mar yang Antua maksud tu, katong musti satu hati deng Antua (Yohanis 6:56), macang deng makanang yang katong makang deng aer yang katong minong yang jadi satu deng katong pung badang. dia seng bisa hidop tarus-tarus deng Allah. 54Mar sapa yang makang Beta pung badang deng minong Beta pung dara, dia su mulai hidop tarus-tarus deng Allah. La waktu dunya ni su mau abis, Beta nanti kasi hidop dia kombali. 55Tagal, Beta pung badang deng Beta pung dara ni jua makanang deng minomang yang batul. 56Sapa yang makang Beta pung badang deng minong Beta pung dara, dia tu su satu hati deng Beta la Beta jua su satu hati deng dia. 57Beta pung Bapa yang utus Beta datang ka dunya ni yang kasi hidop par samua yang hidop. La Beta pung hidop ni asal dari Antua. Jadi bagitu lai deng sapa yang makang Beta pung badang, dia nanti hidop tagal dia pung hidop tu, akang asal dari Beta. 58Beta ni Roti yang turung dari sorga. Beta seng sama deng roti yang kamong pung tete-nene moyang makang tu. Dong makang roti tu mar dong mati. Mar sapa yang makang Roti ni nanti hidop tarus-tarus.”

59Yesus bilang samua ni par orang banya tu waktu Antua kasi balajar dong di orang Yahudi pung tampa sombayang di kota Kapernaum.

Orang banya yang iko Yesus pi kasi tinggal Antua

6:60-71

60Waktu orang banya yang iko Yesus dengar Antua pung ajarang tu, banya dari dong yang bilang kata, “Antua pung ajarang ni talalu barát. Sapa yang bisa tarima akang?”

61Yesus sandiri tau kalo dong ada bamulu di balakang-balakang soal Antua pung ajarang tu. Tagal itu Antua bilang par dong, “He, mangapa kong kamong bamulu dengar Beta bilang bagitu? 62Kalo Beta baru bilang bagitu sa kamong su seng sanang, la bagemana lai kalo kamong lia Ana Manusia ni nai ka sorga kombali? 63Allah pung Roh tu yang biking manusia hidop tarus-tarus deng Antua. Manusia seng bisa harap dia pung kuat sandiri par biking dia hidop tarus-tarus. Apa yang Beta su bilang tu, akang asal dari Allah pung Roh deng bisa biking kamong hidop tarus-tarus deng Allah. 64Mar ada dari kamong ni yang seng parcaya Beta.”

Yesus bilang bagitu tagal dari kamuka-kamuka lai Antua su tau sapa-sapa yang seng parcaya Antua deng sapa tu yang nanti jual Antua.

65La Antua bilang par dong kata, “Tagal itu kong Beta parna bilang par kamong kata seng satu orang lai yang bisa datang par Beta kalo Beta pung Bapa seng bawa dia par Beta.”

66Mulai dari oras tu, orang banya yang iko Yesus tu bale balakang kasi tinggal Antua deng seng mau iko Antua lai. 67Tagal itu, Yesus tanya Antua pung murid sapulu dua orang tu kata, “Jang sampe kamong lai mau pi kasi tinggal Beta?”

68Mar Simon Petrus bilang par Antua, “Sio Tuhan e! Katong mau pi par sapa lai? Cuma Tuhan sandiri sa yang bisa kasi tau bagemana katong bisa hidop tarus-tarus deng Allah. 69Katong parcaya deng tau batul-batul kalo Bapa ni Orang yang kudus yang Allah utus datang ka dunya.”

70La Yesus bilang par dong, “Memang Beta sandiri yang pili kamong sapulu dua ni, mar ada satu dari kamong ni yang nanti iko Setang pung Raja pung mau.”

71Yang Yesus maksud tu Simon Iskariot#6:71 Iskariot ni bukang fam. Ada yang bilang kalo ini ni nama tampa di propinsi Yudea pung sabala salatang, nama Kariot. Jadi, Simon Iskariot tu pung arti, ‘Simon dari kampong Kariot’. pung ana laki-laki nama Yudas. Yudas ni yang nanti jual Yesus, biar kata dia ni satu dari Antua pung sapulu dua murid tu.

Currently Selected:

Yohanis 6: ABMA

Highlight

Copy