Mareko 15

15 A PAKANA.

1Ma ba malana, diat a kum tenapinapet gala ma ra kum takana ma ra kum tenatimtimu, ma diat a kum tara nakakon rap, diat pirapiri ugai, ma diat kerepa Iesu, ma ben igen‐uai, ma diat kipi korom Pilato. 2Ma Pilato i tiri tana, lena, ui ma a nudiat Kig u ra kum tara Iudaia ni? Ma i urunioat tana, lenkumi, A ligtatuna ma u piri. 3Ma ra kum tenapinapet gala diat takuna i u ra magoro na lig. 4Ma Pilato i tiri tana balet, lenkumi, Pa u pira balu duk ta lig ni? Boboi, magoro a lig diat takuna ui uni? 5Ma Iesu pa i pira balu ta lig ta diat; ma Pilato i kakaian uni.

6Ma ba di pami a witamai kuma, Pilato i ā pet na makirana i papāra te ko diat diat ki u ra ruma na boboto korom diat a tara na kaia, ia ba diat tikanwalipai. 7Ma ra muana a iana Baraba i tana u ra ruma na boboto, di dotai ugai ma diat a kum tara diat pet na rakan pilaka diat, ma diat ā um doko a tara ba diat pet na rakan pilaka. 8Ma diat a tara na kaia diat wan korom i ma diat arig i in peti balet lenkuma i ā petpeti ut korom diat. 9Ma Pilato i tiri ta diat, lenkumi, Muat nemi ba ag papara korom muat a Kig a nu ra tara Iudaia?

10Kuma i nunurai, diat a kum tenapinapet gala diat taramaruai ia u ra wetabua ku. 11Ma diat a kum tenapinapet gala diat wakupkupi a tara na kaia diat arig i in madek‐uai korom diat Baraba ku. 12Ma Pilato i tiri diat balet ma piri ta diat, Awa duk ag peti korom ia kuma muat watugi a Kig a nu ra tara Iudaia? 13Ma diat wewatai balet, lena, un akwatai u ra kabai. 14Ma Pilato i tiri ta diat, urawa bakai, awa a makirana pikoina i ā petai? Ma diat pet a gati a nudiat wewatai, lena, Un akwati u ra kabai. 15Ma Pilato i pala‐uai Baraba korom diat, kuma i ligna wamanatug a baladiat a kum tara na‐kaia, ma ba i raputa mun Iesu ma ra kum wewe, i tarata ia korom diat, diat a akwati u ra kabai.

16Ma ra kum tenawineum diat ben igen‐ua Iesu, u ra ruma na Tadaru nakakon; ma diat ben ugai kai a tenawineum rap. 17Ma diat wakopi ma ra malu tarina, ma ba diat wiri a parik u ra diwai taloklokono, diat wapariktai a lorina uni; 18Ma diat wewatai koromi ma diat lena, Epoi, a Kig a nu ra tara Iudaia! 19Ma diat rapui a lorina ma ra wuwuru ma diat kari, ma diat tutudug nana ma papet na tatauru koromi. 20Ma ba i rap a nudiat tatauru, diat pa‐uai koni a malu tarina, ma diat wakopi balet ma ra nuna malu ku. Ma diat ben‐igen‐uai diat a akwati u ra kabai.

21Ma ra muana i wan taka u ra bual a iana Simona a te Kurena ia, (a tamadiara Alesano ma Rufo) ma diat lig‐lurapa ia diat a weuru, ma in loi a nuna kabai. 22Ma diat waben Iesu u ra pakana bual a iana Kolkota, a pipilaina, A bual na lora. 23Ma diat tari tana a waine di welotoi ma ra muro, in inimi; ma pa i inimi. 24Ma diat akwati u ra kabai, ma diat palau diat u ra nuna kum malu, ma diat wirimadigi u ra nudiat tiniba taktakai ku. 25Ma diat akwat i u ra kabai u ra tulna pakana bug kuma. 26Ma diat timui u na te a timtimu u ra lig diat takuna i uni, lenkumi,

A KIG A NU RA KUM TARA I UDAIA.

27Ma diat akwata bulug ruadi a tenawerara u ra ru kabai; ra u ra woat na limana ma ra u maira na limana. 28Ma ra kum tara diat wanwan diat tatauru korom i, ma diat lilia a matadiat nana, ma lena, 29Epoi! ui ba u waregpai a ruma na lotu ma u pamta balet un ta tul a bug ku, 30Un walaunpa ui, ma un pari ko ra kabai. 31Lenkuma bulug diat a kum tenapinapet gala, ma diat a kum tenatimtimu, diat tatauru uni, ma lena, I walaunpa diat a tara; i kana walaun ia ut. 32In pari ko ra kabai a Karisito, a Kig a nu ra kum tara Isarelu, ba dat a bobo i ma dat nuru tauni. Ma diara bulug di akwat ugai di tul, diara pira ululi korom i.

33Ma ba nom na pakana bug i wan pat, a boboto i pulubati a wanua rap i tuk u ra limadi ma watdi a pakana bug kuma. 34Ma u ra limadi ma watdi a pakana bug Iesu i kulkulai u na te, lenkumi, Eloi, Eloi, lama sabakatani? a pipilaina kumi, A Nug Nara, A Nug Nara, Lelawai kuma u talbegua iau uni? 35Ma ta magan u diat a tara diat turu matiti, ba diat walogoroi, diat lena, Wenam! i wata Ilaita. 36Ma te ko diat i kala, ma i rakanpai ta karunamat ma i puktai ma ra vinika, ma pakitai u ra wewuru, ma tari tana ba in inimi, ma i lena, Madeki; dat a boboi, ba Ilaita in wanurin ma rakan‐a‐parita i. 37Ma ba Iesu i kulkulai u na te, i tapula ma ut. 38Ma ra malu na binabat u ra ruma na lotu i rarat‐a‐weranapai taka na te ma i tuk u na pia. 39Ma ba a Tadaru na wineum ia ba i turu matiti nana, i boboi Iesu i tapula lenkuma, i piri, lena, A ligtatuna na tun Nara a muana bi. 40Ma ra kum tebuan bulug diat turu ma diat boboi taka u ra welwelik: ra pa diat Maria a te Makatala, ma Maria kai a nadiara Iakobo liklik ma Iosa, ma Salome; 41Diat kuma, diat weuru mai ma taramlu korom i ba i tana u Kalilaia; ma magoro bulug a kum tebuan diat weuru mai u Ierusalema.

42Ma ba i malurap u ra bug tinaga, a bug kuma i muka ta ra Bug Tabu. 43Iosefa a te Arimataia i wan urin, a Tadaru nakakon ma ra pet palig ia, ma ia bulug i tana walagai kup ta matanitu a nun Nara; i wan pai burut korom Pilato, ma i arig koni a minatin Iesu. 44Ma Pilato i laklakon a balana ba Iesu i mat kaka lenkuma; ma i watai a Tadaru na wineum, ma tiri tana, ba i mat duk ba pate. 45Ma ba i nunurai ko ra Tadaru na wineum, i taratai a minatina tan Iosefa. 46Ma ia, i kulpai a malu lino, ma ba i lo a paritai a minatin Iesu ko ra kabai i pului ma ra malu lino, ma i waineptai u ra mata‐na‐minat ia ba di buri u ra papara wat; ma i bulbati a mata ra mata‐na‐minat ma ra wat gala. 47Ma Maria a te Makatala ma Maria kai a nana Iose diara boboi a bual di wainepta ia uni.

Currently Selected:

Mareko 15: RAI

Highlight

Copy