ลก 17

ลอง เฌา เยซู วี มาโนว ดีแบ อัน

1เฌา เยซู วี ต็อห ดี เฆ ดีแบ อัน, “เซเซ อึณ ดี มึห แบน โมยว แบน โมยว, อี แตห ดูอี โบง นา ตู หมึอม. อึณ ยี มูห ดูอี อี กาซูห ดูอี โบง นา ตู หมึอม, อัน ดี ฌัม ดูก ตาง. 2เซ อึณ มึห ดูอี อู วี, โบง แตห ฆอน ดีแตด อู วี โบง นา ตู หมึอม, เซ อี เฮา ดึห มาว ปี กรีด อี คามูน อู โบ็ง, ปัก ฮอย ดี แมง อัน, บยัว อัน แคง อึม ลึก, แฮะ นับ, อึณ ตู หมึอม ดี อัน. เซ อี โบง ปาย ตี, อึณ ยี หมึอม หลึอม แตห อัน ปึอน ดี ดัว ดูก ดี ฆอน ตึอน. 3เบ โลว ซาดีก. เซ บีนอง เบ โบง หมาบ, เบ โลว มาโนว อัน. เซ อัน กาปลูะ น็อห, บอ เบ โลว บลัวะ แวน หมาบ อัน. 4เซ อัน ยี โบง หมาบ ดี แม อู ซีแง บู เฌณ, เซ อัน บอ ตัห ฌัม โดง กอย แม ปอ บู เฌณ ต็อห ดี แม, ‘โอว แฮะ กาปลูะ น็อห,’ แตห แม บอ บลัวะ แวน หมาบ อัน.”

5เฆ ดีแบ เฌา เยซู ต็อห ดี อัน, “เย หมาณ, แตห แม เฌา จอย เย แตห เย หณึม ซีคยา หลึอม คา อาต.”

6เฌา เยซู ต็อห ดี เฆ, “เซ น็อห หณึม เบ บอ ดาน กาอาง เดา เซียม อู เฆา, เบ ดี บอ ปึอน ต็อห ดี เฮ กาเปรียห นี, ‘แตห แม เลห แคง กาดาย ตี, วี ฮาว กอย แคง อึม ดึง,’ เซ แม ต็อห ปาย ตี, เฮ ตี ดี โทม โดบ ปี ต็อห แม.

7-10เซ แดเจณ โบง ฆาน ปี จัร ดา กาณา อัน โบง, เบ ทาง ดา กาณา อัน ดี วี ต็อห ‘ฆูง ตาง’ ดี แดเจณ อัน? อาว มูห ปาย ตี. อึณ มูห ฆาน ปี โลว โบง อัน. เซ เบ แฮะ ฮาว แท นา บอ ฮาว บัร มาบู เบ, เซ เบ แฮะ เวณ ฌัม แคง กาง, อาว มึห อาเซ กาแต เบ อี ดี ต็อห ดี แดเจณ อัน, ‘แตห แม ตัห อู เฌณ, ตัห ตูต ดี นี, โฮม โบม แม.’ เบ ยี นับ ดี ต็อห ดี แดเจณ เบ, ‘แตห แม จึอม โบม, ดัง ฮาบ อาดา โอว. แฮะ ฮอต, แตห แม วี กาปลูะ ครึง แม, อ็อห โบม เฆ ฮาบ, ดัว ดี โอว ดี อาต. เซ แม แฮะ ฮอต โบง โตต ดอน โมยว, บอ แม แฮะ ปึอน ดี โฮม โบม แม.’ ปาย ตี ดอน อี นับ ดี โบง. บอ เบ โลว เบลห น็อห เบ ปาย ตี. เบ ฮี ฮอต โบง ดอน โมยว ปี จัร เฌาพรา เบ โบง, เบ โลว ต็อห, ‘โอว มูห แดเจณ อาว อัห. โอว แฮะ โบง ฆาน แคะ ปี โลว โอว โบง.’”

ลอง ดูอี มึห เซา ดูะ

11อู ซีแง, ดอ ฮาว เฌา เยซู โดบ อึณเตณ โฮะ มืง เยรูซาแลม, อัน บอ ปวน ฮาว กาแต อืง ซามารี ฆาย อืง ฆาลีเล. 12วาย แฮะ ลึบ อัน แคง มืง อู มืง, อัน กาตูณ ดูอี อี มึห เซา ดูะ#17:12 ยอด อามาแท 8:2 ฆึร วี. เฆ ดูอี ตึอน, ดอ ซี กอย กาโต็ง เฆ ดี อัน, เฆ แฮะ ยึร อัน. 13เฆ บอ ดัด ตาง ต็อห, “อึย เฌา เยซู, อึย แม เฌา, เย หมาณ, แตห แม กาเว เย.”

14เฌา เยซู แฮะ ยึร โฆรห เฆ, อัน ต็อห ดี เฆ, “เบ โลว ฮาว ฌัม โดง กอย ดูอี อี หลู ดี เฌาพรา, แตห อัน ยอด เบ,” อัน แฮะ ฮอต ต็อห ปาย ตี, เฆ ฮาว อู เฌณ. ดอ ฮาว เฆ โดบ อึณเตณ, เซา ดูะ เฆ บอ หราย อู เฌณ.

15อึณ ยี มึห ดูอี อู วี, ดอ ยึร อัน, เซา อัน แฮะ หราย, อัน บอ วี เวณ, บอ อืบ เฌาพรา กาลาง โฆรห ตาง. 16อัน บอ ครึบเครา ดี อาต เฌา เยซู, กาลาง ฆูง ดาง ดี อัน. ดูอี ตึอน ยี มูห ดูอี อาโมยว ซามารี.

17เฌา เยซู ต็อห, “คา อาต โอว ทาง แฮะ มึห ฆึร วี ปี ปีหราย โอว เซา เฆ. ดูอี ดีม วี ตึอน, เฆ กอย นา เหมา?

18แดง ดูอี อู วี นี, อี มูห อาโมยว เฮา อาว มึห ปอ อู วี อี ซี อืบ เฌาพรา?” แฮะ ฮอต, อัน ต็อห ดี ดูอี ตี, 19“แตห แม ยีต, แตห แม เวณ กาง แม. โกบ แฮะ หณึม แม, แม แฮะ แกน.”

ลอง มืง ปี อึบ เฌาพรา

20เฆ ดา ซารา แคง พึง พารีแซ, เฆ ยี ดีหมอด เฌา เยซู ลอง อาคราว ดี ตัห อึบ เฌาพรา ดูอี แดง กาดาย. เฌา เยซู ต็อห ดี เฆ, “เซ เฌาพรา ตัห อึบ ดูอี แดง กาดาย, อึณ ตู มึห มาเซ ปี ปึอน ยึร ดูอี ดี งาย เฆ. 21อาว มึห อาเซ อี ปึอน ต็อห, ‘นี, มืง เฌาพรา กอย ดี นี.’ อึณ มืร ตู มึห อาเซ อี ต็อห ‘ยอด ดี นู, มืง เฌาพรา กอย ดี นู.’ โอว ยี แตห เบ นับ, อาคราว ดี อึบ เฌาพรา ดูอี แดง กาดาย, อัน แฮะ ตัห ฌัม, กอย ดี กาแต เบ.”

22แฮะ ฮอต ปัน ตี อัน วี ต็อห ดี เฆ ดีแบ อัน, “อึณ ดี บอ ฌัม อาคราว อัน, เบ ดี บอ กาปรา กาเซา ดี ยึร โอว อี แฮะ แบน ฆอน ดูอี คอ อู ซีแง. เบ ยี ตู ปึอน ยึร. 23อึณ ดี บอ มึห ดูอี ดี ต็อห ดี เบ, ‘ยอด นา นี, อัน กอย ดี นี. ยอด นา นู, อัน กอย ดี นู.’ แกวะ แตห เบ เลห ฮาว โดบ ปี กาลาง เฆ. 24อึณ ปี ปลัะ อึณเปลต. บลาง อัน เลห อู บลาก แคง เบลณ ฮาว ฌัม ปอ บลาก. ซีแง ปัน ดี วี ตัห โลง โอว แดง กาดาย, อึณ ดี บอ แบน ปาย ตี. 25คา อาต ดูอี อี แฮะ แบน ดูอี ยี โลว คัม ดูก แบน โมยว แบน โมยว. ดูอี ฌาด นี ตู รวห อัน, เฆ ดี แวน อัน.

26ดอ ฌัม อาคราว ปัน วี ตัห โอว อี แฮะ แบน ฆอน ดูอี โลง แดง กาดาย นี, อึณ ปี ดอ มูห ฌาด ดา อาโนว ดอ มึอน. 27ดอ มูห ฌาด อาโนว ตึอน, เฆ ดูอี โฮม ดาคึย. เฆ บอ ลาย ลาย, ลาย คัด, กอ ฌัม ซีแง ดอ ลึบ อาโนว แคง รึร ซังโพว ตาง ตึอน. แฮะ ฮอต อึม ตาง แฮะ ตัห ดอ ตู นัมโหลห เฆ, อึณปูน ดอน อี, แตห เฆ ยัม บอกาเฆลียด.

28อึณ บอ ปี ดอ มึอน, ดอ มูห ฌาด อาโลด ตึอน. เฆ ดูอี บอ โฮม บอ เดียง, เฆ มืร กาจึห กาย็อง, บอ ซัม โหงว, ซัม กาง. 29ยี ฌัม ซีแง เลห อาโลด แคง มืง โซวโดม ตึอน, อึณ บอ มึห ฆลาย เงา บอ ฆันดืก, เลห แคง ฆางหราว, แตห เฆ ดอน อี ยัม ดอ ตู นัมโหลห เฆ.

30ซีแง ดี บยัะ เฌาพรา ดูอี อี แฮะ แบน ฆอน ดูอี, แตห อัน วี ตัห โลง แดง กาดาย นี, อึณ ดี ปาย ตี. 31ซีแง อัน ตี, เซ ดูอี อู วี กอย นา แดง กาง อัน, เซ อัน วี โลง, แกวะ แตห อัน วี ลึบ ดึห โกรวกราม อัน แคง กาง. แตห อัน ฮาว เตา อู เฌณ. อึณ บอ ปาย ตี. เซ ดูอี อู วี กอย แคง มาน, แกวะ แตห อัน เวณ กาง อัน. แตห อัน ยี ฮาว เตา อู เฌณ. 32แตห เบ ยี โหลห อีบึณ อาโลด ตึอน. 33อาเซ ซี คยอด อาซาก อัน, อัน ดี ชึม อาซาก อัน. อาเซ ยี ตู โยว ดี ยัม, อัน ตู ชึม อาซาก อัน. 34โอว ต็อห ดี เบ, แคง หมึร ตี, อึณ ดี มึห ดูอี อา วี, เฆ ดี อีด แดง กาโช็ง อู โบ็ง. เฌาพรา ดี แตห อู วี โฮะ ฆางหราว. ปอ อู วี ยี กอย นา ปัน. 35อึณ ดี บอ มึห อีบึณ อา วี อี กรีด คามูน อู โปละ. เฌาพรา ดี ดึห อู วี, วี อูน ปอ อู วี.

36อึณ ดี บอ มึห อีมาย อา วี กอย แคง โดง นา. เฌาพรา ดี บอ ดึห อู วี, วี อูน ปอ อู วี.#17:36 บับ ดอ โฆว มัง โมยว อาว มึห กาบัก นี”

37เฆ ดูอี อี โทม โฆรห เฌา เยซู ตี บอ เฆ ดีแบ อัน วี ดีหมอด อัน ต็อห, “แม เฌา, ปัน เหมา อึณ ดี บอ แบน ปาย ตี ดอน โมยว?” อัน วี ต็อห ดี เฆ. “เซ อึณ มึห โดว อี ยัม, เฆ มาลังดา บอ กอย กาฌูะ โดง ตี โฮม.” เฌา เยซู ต็อห ปาย ตี ดี เฆ.

Currently Selected:

ลก 17: pce

Highlight

Copy