यूह 5

जल कुण्डमी लुलो मान्स निको भया

1तइ पछा यहुदिको काजबार थ्यो, रे येशू यरुशलेम सहरमि गया। 2यरुशलेम सहरमि भेडा नाउँ भया ढोका नजिकै पाँच पाखो भया दलानले घेर्या एक जल कुण्ड रइछ, जइलाइ हिब्रु भासामि बेथस्दा भणिन्छ। 3ताँ अनेक रोगि बिमारी अर्थात-काना, डुणा लुला पडिरइथ्या। (तिनन पानी कइ बेला छचल्किन्छ भणबर पखिरइथ्या। 4क्याकि परमप्रभुका एक दुतले बेला-बेलामि जल-कुण्डमी ओलीबर पानी हलाइ दिन्थ्या, रे पानी छचल्किया पछा जो पइल्ली पानी भितर पसन्थ्यो, जसाइ रोगले ग्रस्त भयालगइ त्यो निको होइजान्थ्यो।)

5ताँ अठ्तिस बर्ष बठेइ बिरामी भया एक जाना मान्स थ्यो। 6येशूले तइलाइ ताँ पडिरया धेक्यो, लामो समय बठेइ त्यो यइ दसामि रइछ भणि जाणिबर येशूले तइलाइ भण्यो, “कि तु निको हुन चाहन्छइ?”

7तइ रोगिले येशूलाइ भण्यो, “हजुर, जइ बेला पानी छचल्किन्छ मलाइ जल-कुण्डमी लइजान्या मेरो कोइ मान्स आथिन, म जाना-जानाइ म भण्ना पइल्ली अर्खो मान्स पानिमि ओलिजान्छ।”

8येशूले तइलाइ भण्यो, “उठ रे आफ्नो बिस्त्तरा उठाइबर हिट।” 9उतन्जेइ त्यो मान्स निको भयो, रे आफ्नो बिस्तरा बोकिबर उ हिटियो। त्यो दिन बिश्राम दिन थ्यो। 10तबइकिलाइ निको बनाया तइ मान्सलाइ यहुदिले भण्यो, “यो त बिश्राम दिन हो, मोशाको कानुन अन्सार तुलाइ बिस्तरा बोक्दु ठीक आथिन।”

11तइले तिननलाइ जबाफ दियो, “जइले मलाइ निको बनायो उनइले भण्यो, ‘आफ्नो बिस्तरा बोकिबर हिट।’”

12तिननले तइलाइ सोध्यो, “तुलाइ बिस्तरा बोकिबर हिट भण्न्या मान्सको हो?” 13तर निको भया तइ मान्सले उन को हुन भणि पछेण्या थेइन, क्याकि तइ ठाउँमि भिड भया हुनाले येशू ताँ बठेइ निइय्या।

14तइ पछा येशूले तइलाइ मन्दिरको आगनमी भेटीबर भण्यो, “हेर, तु निको होइरइछइ। आजी पाप जन अरेइ, रे तुमि आजी बड्ता खराबी आइ जन पडउ।” 15उइलाइ निको बनाउन्या त येशू रइछन भणबर तइ मान्सले गइबर यहुदि अगुवानलाइ भणिदियो।

परमेश्वरका चेला बठेइ जीवन

16तइका लाग्दा यहुदि अगुवानले येशूलाइ खेदो अद्द पस्या, क्याकि उनले यो काम बिश्राम दिनमि अरिराइथ्यो। 17तब येशूले तिननलाइ भण्यो, “परमेश्वर, मेरो पिताले दिना दिन काम अरिराइछन, रे म लगइ काम अद्दइ लाछु।” 18तबइकिलाइ यहुदि अगुवानले येशूलाइ माद्दाइ आजी बड्ता कोशिस अद्द पस्या, क्याकि उनले बिश्राम दिन तोड्या काम मान्तर होइन, तर आफइलाइ परमेश्वरको बराबर माणिबर उनले परमेश्वरलाइ आफनाइ पिता भणिराइथ्यो।

19येशूले तिननलाइ भण्यो, “साँच्चि, म तमनलाइ भण्नउ, चेलो आफइले केइ अद्द सक्दैन, तर पिताले जी अर्या धेकन्छ तेइ मान्तर अरन्छ, क्याकि पिताले जी अरन्छ, म मान्सको चेलो लगइ तसोइ अद्दउ। 20क्याकि पिताले चेलोलाइ प्रेम अरन्छ, रे उन आफइले अर्या सब काम चेलोलाइ धेकाउनाहान। यिन भण्ना महान काम उनले चेलोलाइ धेकाउनाहान रे तमन अचम्म माण्न्या हौ। 21क्याकि जसेरि पिताले मर्यालाइ उठाउनाहान रे तिननलाइ जीवन दिनाहान, तसेरि चेलो लगइ जइलाइ मन अरन्छ, तइलाइ जीवन दिन्छ। 22-23क्याकि जसेरि मान्सनले पिता परमेश्वरलाइ आदर अद्दाहन, तेसरी तिनन मलाइ अथवा चेलोलाइ लगइ आदर अरुन, पिता परमेश्वरले म चेलोलाइ न्याय अद्द्या सब अधिकार दिइराइछ। यदि कसइले मलाइ आदर दिनइन भण्या, तइले पिता परमेश्वरको आदर अद्दैन, जइले मलाइ पठाया हो।”

24“साँच्चि, म तमनलाइ भण्नउ, जइले मेरा बचन सुणन्छ, रे मलाइ पठाउन्यामि बिश्वास अरन्छ, तइसित अनन्त जीवन छ। तइले दण्ड पाउन्या आथिन, तर अनन्त मृत्यु बठेइ बचिबर नयाँ जीवनमी प्रवेश अरिसक्या छन। 25साँच्चि, म तमनलाइ भण्नउ, त्यो समय आउनाछ, रे त्यो समय अइलइ हो, जब मर्याले परमेश्वरका चेलोको डाको सुण्नाहान, रे जो सुण्न्या छन तिनन सब सदाइ बाँच्या छन। 26क्याकि जसेरि पिता आफइमी जीवन छ, उसेरी उनले चेलोलाइ लगइ आफइमी जीवनको स्रोत हुन्या अधिकार दिइराइछ। 27रे क्याकि म, मान्सको चेलो हु, पिता परमेश्वरले मलाइ सब मान्सनको न्याय अद्द्या अधिकार दिराइछ।”

28“यइमि अचम्म जन माण, क्याकि समय आउनाछ, जइ बेला सब मर्या मान्सनले मान्सको चेलोको डाको सुण्या छन, 29रे बाइर निकलिबर आउन्याहुन: सुकर्म अद्द्या मर्या बठेइ जिउना भइबर अनन्त जीवन पाउन्या छन, रे कुकर्म अद्दया जिउना भइबर दण्ड पाउन्या छन।

30म आफइ केइ अद्द सक्दैन। मइले मान्सनको न्याय तसोइ अद्दउ जसो पिताले मलाइ उनरो न्याय अद्दाइ भण्या छ, रे मेरो न्याय ठीक माणिन्छ, क्याकि म आफ्नो इच्छा खोज्जइन, तर मलाइ पठाउन्याको इच्छा खोज्जउ।

31यदि मइले आफना बारेमि गवाही दिया भण्या मेरो गवाही सत्य हुनइन। 32एक छन जो मेरा पिता हुन उनले लगइ मेरा बारेमि गवाही दिन्याहान, रे म जाँण्नउ, कि मेरा बारेमि उन जी गवाही दिनाहान, त्यो गवाही सत्य माणिन्छ।”

33“तमनले यूहन्ना वाँ सोद्दाइ पठाया, रे उइले सत्यको गवाही दिइराइछ। 34मइले ग्रहण अद्द्या गवाही मान्सको होइन, तर तमरो उद्दार होलो भणबर म यिन गवाही भण्नउ। 35यूहन्ना बल्या रे चम्कन्या बत्ति जसोइथ्यो, रे तमन उइको प्रकासमि थोकाइ समय लगइ आनन्द मनाउनाइ राजि भया। 36तर मसित जी गवाही छ, त्यो यूहन्ना भण्ना ठुलो छ। क्याकि जइ काम पुरा अद्दाइ पिताले मलाइ दिइराइछ, तिन काम म अद्दाछु, तिनइले मेरा बारेमि गवाही दिइराइछ कि पिताले मलाइ पठाया हो। 37मलाइ पठाउन्या पिता आफइले मेरा बारेमि गवाही दिइराइछ। न तमन उनरो डाको सुण्या हौ रे न त तमनले उनलाइ आम्ने-साम्ने धेकिराइछौ। 38उनरो शिक्षा तमनमि रनइन, क्याकि तमन ममि बिश्वास अद्दान, जइलाइ परमेश्वरले पठाइराइछ। 39तमन पबित्र सास्त्रमि पढन्छौ, क्याकि ताँ अनन्त जीवन पाइन्छ भणि तमन सोच्नन्छौ। मेरा बारेमि गवाही दिन्या तिनइ पबित्र सास्त्र हुन, 40तर तमन अनन्त जीवन पाउनाइ मेरा वाँ आउनाइ इन्कार अरन्छौ।”

41“म मान्स बठेइ महिमाको आस अद्दैन, 42तमन आफ्ना मनले परमेश्वरलाइ प्रेम अद्दान भणि मलाइ था छ। 43म आफ्ना पिता परमेश्वरको अधिकार लेइबर आया छु रे तमन मलाइ स्वीकार अद्दान। तर आफनोइ अधिकार लेइबर आउन्यालाइ तमनले स्वीकार अरन्छौ। 44तमन ममि बिश्वास अद्द सक्दानु, क्याकि तमन एक-अर्खा बठेइ प्रसंसा लिन्छौ, रे तमन एक मान्तर परमेश्वरको प्रसंसा पाउनाइलाइ कोशिस अद्दान। 45यो जन सम्ज्या, कि म पिता अगाडी तमलाइ दोस लाउनाछु। मोशा, जइमि तमनले आफ्नो आसा राख्याछौ, उनले तमनमि दोस लाउन्या छ। 46क्याकि तमनले मोशालाइ बिश्वास अर्या भया मलाइ लगइ बिश्वास अद्देइथ्या, क्याकि उइले मेरा बारेमि लेखिराइथ्यो। 47क्याकि तमन मोशाले लेख्या कानुनमी बिश्वास अद्दानु, पइ तमन पक्‍का रुपले यइमि लगइ बिश्वास अद्दया आथिन कि म कि भण्नाछु।”

Currently Selected:

यूह 5: DTYNT

Highlight

Copy