मत्ती 27

यहूदा इस्करियोतको आत्माहत्या

(लूका २३:१-५,१३-२५; यूह १८:२८-३८)

1परभातइ जब यहुदि मुख्य पुजारिन रे यहुदि मान्सनका अगुवानले येशूलाइ मृत्यु दण्ड दिन्या भणबर येशूलाइ आरोप लाउन्या सल्लाह अर्यो। 2तिननले येशूलाइ बादिबर लैया रे पिलातस हाकिमको राज महलमि न्याय अद्दाइलाइ लैया।

3तब उनलाइ पकडाउन्या यहूदाले येशूलाइ दण्ड आज्ञा भया जाणिबर पछ्ताउन पस्यो रे यहुदि मुख्य पुजारि रे यहुदि मान्सनका अगुवाका वाँ जाइबर चाँदीका तीस सिक्‍का फिर्ता अर्यो। 4रे भण्यो, “मइले निर्दोष मान्सलाइ माद्दाइलाइ धोका दिबर ठुलो पाप अर्या।” तर तिननले भण्यो, “हामलाइ कि मतलब आफइ जाण।”

5तब चाँदीका सिक्‍का मन्दिरका आगनमी खितिबर त्यो गयो, रे झुणिबर मर्यो।

6तर यहुदि मुख्य पुजारिले भण्यो, “हामरो कानुनले यो सिक्‍कालाइ मन्दिरको दान पेटिमी राख्दु अनुमति दीनइन क्याकि यो कसइलाइ माद्दया रगतको मोल हो।” 7तिननले आपसमी सल्लाह अरिबर तइ पैसाले परदेशिलाइ दफन अद्दाइ कुमालेको जमिन किन्यो। 8तबइकिलाइ त्यो जमिनलाइ आज सम्मलगइ रगतको जमिन भणिन्छ। 9तब यर्मिया अगमबक्ताले भण्याको बचन पुरा हुनाइलाइ इसो भयो। तिनले भण्यो, “उनकिलाइ इस्राएल देशका मान्सनले चाँदीका तीस सिक्‍का दिनाइलाइ सहमत भया, 10रे तिननले तइ सिक्‍काले कुमालेको जमिन किन्यो, जसो प्रभुले मलाइ भण्याथ्यो।”

पिलातस हाकिमले येशूलाइ प्रश्न सोध्यो

(मर्क १५:२-५; लूका २३:३-५; यूह १८:३३-३८)

11येशू हाकिमका अगाडी कल्लिया रे तिनले येशूलाइ सोध्यो, “कि तम यहुदिका राजा हौ?” येशूले जबाफ दियो, “जसो तम भण्नाछौ तसोइ हो।” 12पइ यहुदि मुख्य पुजारिन रे यहुदि मान्सनका अगुवाले उनलाइ दोस लायो तर उनले केइ जबाफ दिएइन। 13तब पिलातस हाकिमले उनलाइ भण्यो, “तेरा बिसयमि औरले इति आरोप लाइराइछ, कि तु सुण्नइनि?” 14तर येशूले केइ जबाफ दिएइन। याँ सम्मकि पिलातस हाकिम लगइ छक्‍क पण्या।

येशूलाइ छाड्डामि पिलातस असफल

(मर्क १५:६-१५; लूका २३:१३-१५; यूह १८:३९-१९:१६)

15हरेक बर्ष निस्तार काजबारका बेला पिलातस हाकिमले सदाइ एक कैदीलाइ छाड्डया रित थ्यो। 16तइ समयमि बरब्बा नाउँको एक कुख्यात कैदी थ्यो, 17जब मान्स जम्मा भया पिलातस हाकिमले तिनलाइ सोध्यो तमन कि चाहन्छौ? म तमरा निउति कइलाइ छाडि दिउ? बरब्बा कि ख्रीष्ट भणिन्या येशूलाइ? 18क्याकि यहुदि मुख्य पुजारिनले येशूलाइ रिसले सुम्पया हुन भण्न्या पिलातसलाइ थाथ्यो।

19पिलातस न्याय आसनमी बस्या बेला तिनरि स्वानिले इसो खबर पठायो कि तइ निर्दोष मान्सलाइ केइ जन अर्या, क्याकि आज सपनामि मइले तिनरा लाग्दा भौत दु:ख भोगेइ छु।

20यहुदि मुख्य पुजारि रे यहुदि मान्सनका अगुवाले बरब्बालाइ हामरा निउति छाड्डाइ माग अर, रे येशूलाइ मृत्यु दण्ड दिन्या माग अर भणीबर मान्सलाइ सूरेयो।

21हाकिमले आजी तिननलाइ सोध्यो, “यिन दुइ मध्ये कइलाइ छाडि दिउ?”

तर तिननले भण्यो, “बरब्बालाइ।”

22तब पिलातस हाकिमले तिननसित सोध्यो, “आब ख्रीष्ट भण्या येशूलाइ चाइ क्यारुँ पइ?”

तिन सबले भण्यो, “तइलाइ क्रुसमि मारीदिय।”

23पिलातस हाकिमले तिननलाइ भण्यो, “क्याकि? यइले कि कुकर्म अरिराइछ?” भिडले झिक कला हालिबर भण्न पस्या, “तइलाइ क्रुसमि मारीदिय।”

24पइ पछा केइ सिप नलाग्या धेकिबर खैलाबैला मच्चिन्छ भण्न्या डरले पिलातस हाकिमले पानी ल्याइबर भिडका अगाडीतिर आफ्ना हात धोइबर भण्यो, “यो तमरो दोस हो! म येइ मान्सका रगत बठेइ निर्दोष छु”। 25सबइ मान्सले जबाफ दियो, “हाम रे हामरो आफ्नो परिबारले उइको हत्याको दोस लिन्या हु।”

क्रुसमि टाँङदाइ सुम्पिया

26तब तिनले भिडलाइ सन्तुष्ट पड्डया इच्छाले तिनका निउति बरब्बालाइ छाडिदियो रे येशूलाइ कोर्रा लाइबर क्रुसमि माद्दाइ रोमी सिपाइलाइ सुम्पि दियो।

येशूको अपमान

(मर्क १५:१६-२०; यूह १९:२-३)

27तब हाकिमका सिपाइनले येशूलाइ हाकिमको महलको आगनमी लैया (जइलाइ प्रेटोरियन भण्नान), रे सिपाइनको एक ठुलो पल्टन उनरा अगाडी जम्मा अर्यो। 28तिननले उनलाइ लाल रङका लत्ता लाइबर उन एक राजा हुन भणीबर उनरो हासो अदद पास्या, 29तिननले काणा भया हाङ्गाको मुकुट बनाइबर खिसि काट्टाइ मुन्टामि लाइदियो, पइ उनरा दाइन हातमि निङालोकि लठ्ठी दिबर उनरा अगाडी घुडा टेकिबर उनलाइ इसो भणबर गिल्ला अर्यो, “यहुदि मान्सनका राजा अमर रया, सलाम!” 30तब तिननले बेला बेलामि निङालोले उनरा मुन्टामि हाण्यो, रे उनरो अपमान अद्दाइलाइ भौत बेर थुक्यो। 31उनरो खिसि काटीबर थग्गया, तिननले येशूका लत्ता फुकाइ दियो रे उनराइ लत्ता लाइदियो, रे उनलाइ क्रुसमि माद्दाइलाइ लैया।

क्रुसमि येशू

(मर्क १५:२१-३२; लूका २३:२६-४३; यूह १९:१७-२७)

32जाना जानाइ तिननले सिमोन नामको कुरेनि सहरको मान्स गाउँ बठेइ यरुशलेम सहरमि जान्नारया भेट्यो रे उइलाइ क्रुस उठाइबर तइ ठाउ सम्म लइजानाइ कर अर्यो। 33जब तिनन येशूलाइ गलगथा भण्न्या ठाउँमि लैया, जइलाइ खोपडिको ठाउ भणिन्छ। 34तब तिननले येशूलाइ गन्धरस नाउको औषधी मिसाया अंगुरको रस पिनाइलाइ दियो, तर उनले चाखिबर तइ पिन्या मन अरेन। 35तिननले उनलाइ क्रुसमि किला ठोकिबर टाङया पछा उनरा लत्तालाइ कइले कि लैजान्या भणबर चिट्ठा हाल्यो रे बाण्यो। 36तब तिनन ताइ बसिबर उनलाइ पहरा दिन पस्या। 37येशूका मुन्टाका मल्तिर “येशू यहुदिका राजा।” भण्न्या दोषपत्र टाङयाथ्यो। 38उनसित क्रुसमि दुइ जना डाँकुलाइ एकलाइ उनरा दाइन तिर रे अर्खालाइ बाँउतीर टाङयो। 39जो लगइ ताँ बठेइ हिटिबर गया उनले आफना मुन्टा हलाइबर इसो भण्नाइ खिसि काट्यो। 40रे भण्यो, “ओहो! तु मन्दिर भत्काउन्या रे तइलाइ तिन दिनमि बनाउन्या! आफलाइ बचा रे परमेश्वरको चेलो हइ भण्या क्रुस बठेइ ओलीबर आ।”

41तस्याइ यहुदि मुख्य पुजारिन रे मोशाको कानुन सिकाउन्यावाला रे यहुदि मान्सनका अगुवाले सङै खिसि काटीबर इसो भण्यो, 42“एइले औरलाइ त बचायो तर आफलाइ बचाउन सकेन। यो मान्स इस्राएल देशका ख्रीष्ट रे राजा हो, भण्या क्रुस बठेइ तलतिर ओलउ, रे हामले धेकु रे तममि बिश्वास अदद सकु।” 43येइले परमेश्वरसित भौत भरोसा अरन्थ्यो उनले येइलाइ चायो भण्या अइलइ छुटकारा दिउन क्याकि येइले म परमेश्वरको चेलो हु भण्थ्यो। 44जो डाँकु उनसित क्रुसमि टाङगीरइथ्या। उनले लगइ येशूको बेइजत अद्दाथ्या।

येशू मर्या

(मर्क १५:३३-४१; लूका २३:४४-४९; यूह १९:२८-३०)

45आब बार बजे बठेइ लगभग तीन बजे सम्म देस भरि अन्धकार भयो। 46तीन बजे तिर येशू ठुलो डाको छाडि इसो भण्न लाग्या इलोइ, इलोइ, लामा सबखथनी? अर्थात हे मेरा परमेश्वर, हे मेरा परमेश्वर तमले मलाइ क्याकि त्याग्या?

47जो मान्सन ताँ नजिक कल्लिय्या थ्या, तिननले यो सुण्यो रे नबुजिबर एक अर्खालाइ भण्न लाग्या, “सुण, यो त एलिया अगमबक्तालाइ आफ्ना मदत अद्दाइलाइ बोलाउन्नाछ!” 48पइ उतन्जेइ तिन मध्ये एक जनाले दगुणिबर एक स्पन्ज लेयो रे तइमि सिर्का भर्यो रे तइ एक निङालोमि राखि उनलाइ पिनाइ दियो। 49तर औरले भण्यो कि उइलाइ एक्लोइ छाडदिए, हाम लगइ हेद्दाउ काइ एलिया तइलाइ बचाउनाइ आउछ कि।

50येशूले आजी जोरले कल्ला हालिबर प्राण त्याग्यो।

51पइ मन्दिरको पर्दा टुप्पा बठेइ ठेक सम्म दुइ भाग होइबर चिरियो, रे पृथ्बी हल्लियो चट्टान लगइ फुट्या। 52पइ चिहान खोलिया, रे परमेश्वरका जनका मर्या शरीर आजी जिउना भया। 53तिनन चिहान बठेइ बाइर निकल्या रे येशू मर्या बठेइ जिउना भया पछा, तिनन पबित्र सहर भित्तर पस्या रे भौत मान्सनका वाँ धेकिया।

54जब सुबेदार रे उनसित येशूलाइ पहरा दिन्यावालनले भुइँचालो रे ताँ भाएका घटना धेक्यो तब भौत डराइबर इसो भण्यो साँच्चि यिन त परमेश्वरका चेलो रइछन। 55ताँ भौत स्वानिन थिन, जो गालील जिल्ला बठेइ येशूको सेवा अददाइ उनरा पछा-पछा लागेइ थिन। तिनन टाडा बठेइ यिन सब हेद्दा थिन। 56तिन मध्ये मग्दला गाउँकी मरियम, याकुब रे योसेफकि इजा मरियम रे जब्दियाका चेलाकि इजा थिन।

येशूलाइ गाडियो

(मर्क १५:४२-४७; लूका २३:५०-५६; यूह १९:३८-४२)

57आब साँज भया पछा योसेफ नाउँ भएका अरिमाथियाका एक जना धनि मान्स आया, तिन आफ लगइ येशूका शिष्या थ्या। 58पइ पिलातस हाकिमका वाँ जाइबर येशूको शरीर माग्यो। तब शरीर दिइयोस भणि पिलातस हाकिमले हुकुम अर्यो। 59पइ योसेफले तइ शरीर लइजाइबर एक सफा सुति कपडामि लपेट्यो, 60रे तइले तिनरो आफ्नोइ नयाँ चिहानमि राख्यो जइलाइ तिनले चट्टानमि खोपेर बनायाथ्यो तइ पछा एक ठुलो ढुङो घुरकाइबर चिहानका दारमि राखिबर तिन हिट्या 61ताँ मग्दला गाउँकी मरियम, अर्खि मरियम चिहानका अगाडी बसिरइथ्या।

येशूका चिहानको पहरा

62अर्खो दिन, तयारीको दिन थ्यो, यहुदि मुख्य पुजारिन रे फरिसि मान्सनको समुह पिलातस हाकिमलाइ भेटाइ गया। 63तिननले भण्यो, “हजुर, हामलाइ याद छ त्यो ठग जिउनोइ छ, उनले भण्याथ्यो, तीन दिन पछा म आजी जीउनो हुन्या हु।” 64तबइकिलाइ तेसरा दिन सम्म सिपाइनले त्यो चिहान सुरक्षित राखियोस भणि हुकुम दियो, यदि तमनले इसो अर्यानु भण्या तइका शिष्या आइबर उनरो लास चोरीबर लैजान्ना रे मान्सनलाइ भणन्या हुन, उन मर्या बठेइ जिउना भया छन, रे त्यो पछाको ठग पइलो ठग भण्ना झिक खराब होलो। 65पिलातस हाकिमले तिननलाइ भण्यो, “तमनसित और पहरेदार सिपाइ लैजा, तमन जा रे तइलाइ सकेसम्म सुरक्षित राख।” 66तिनन गया रे सुरक्षित राख्दाइ चिहानका मुखका ढुङामि छाप लायो ताकि कसइले तइ ढुङालाइ हटाउन जन सकउ। रे तिननले चिहान सुरक्षित राखदाइ केइ सिपाइनलाइ ताँ छाड्यो।

Currently Selected:

मत्ती 27: DTYNT

Highlight

Copy