Ekuma á ɓateki 1
1
Mɔkɔ á tekisia á ɓateki ndea Yéso, Měma á kanga ɓojeɗe
1Moko Tɛɔphílɔ, Suɓi á ɓuku#1.1 Ɔna Lók 1.4. Ɓuku á Ekuma á Ɓateki ndea Yéso ande gbútuka á Mbino-Ánjá ndea Lóka. nɛmɔ á k'ama mosá-mosá, ɗéɗundu nyɔngɔ bui nde Yéso ɗákpangi gea í na goisaga í, 2na ka ɓî age osungiaga k'ésa ndɔ Mokonga ɗantáisi na koba. Mosá á táia akɛ, ɗáɛsɔmbu ɓateki nɛkɛ, áɔ̌ɔkusaga ka ɓukpɛkpɛ á Měma á kanga ɓojeɗe. 3Mbusa á kukuwa akɛ, yɛ sasakɛ áɔ̌sɛnɛkɛa na mphangiɔ ɗanga-ɗanga ka engekisa te, a phɔ́tɔ koenda. Ɗáɛsɛnɛkɛi k'ésa nkama gena (40), áǒngoɗeaga nyɔngɔ á koɓoamɛ ndea Mokonga. 4Esa moci, ɓî ɗáoeaga kimoci na ɓɔ, áɔ̌ɔkusaga#Ɔna Lók 24.49 ɓe: «Ɓókotókɛmbɛ ka Yɛusalɛ́ma, ɓondeagani ndiu mɔkɔ nde Abɛ anɔɔku, nndɔ ɗénóngoɗi. 5Nga, Yoáni ɗéɓatisi ɓaɓêki na iɓo, ɓenu gǎkɛ mbusa á esa ábɔa, Mokonga anoɓatisande na Měma akɛ#Ɔna Mat 3.11; Mkɔ 1.8; Lók 3.16; Yoá 1.33.»
Yéso atái na koba
6Cɔ, ɓî ɓateki ɗáɓádondanigi na Yéso, ɓáomúsia gea: «Mɔkɔta, ka mbenɔ nde unge ǒsikisiande Ɓaisilaɛ́li#Ɔna Amo 9.11-12; Lók 19.11 koɓoamɛ nɛɓɔ?» 7Yéso áǒsikisia te: «Nna nyɔngɔ nɛnu úba á esa na matú nde Abɛ ɗáangi ka kɔkɔta nɛkɛ#Ɔna Mkɔ 13.32 sasakɛ. 8Ɓoɓande ndiu na ɓukpɛkpɛ mbenɔ nde Měma á kanga ɓojeɗe adidande gǔ anu. Ɓoɓande phɔtɔ ɓaɗigimisi á nyɔngɔ nɛmɔ ka Yɛusalɛ́ma, Yudɛ́a bui, Samalía na ka sungiaga á mokonda#Ɔna Mat 28.19; Mkɔ 16.15; Lók 24.47-48.»
9Mbusa á yɔnga akɛ ɓó, Mokonga áontáisisa Yéso na koba. Ɓateki na ɓá phɔ́tɔ kɔɛnjia na koba, egugu áomɓómba, ɓákámɔnɛ ye#Ɔna Mkɔ 16.19; Lók 24.50-51. 10Na ɓá phɔ́tɔ otúmia iso aɓɔ na koba, kuɓî Yéso ɗáotáia, mɔngɔ moci, ɓakpa ɓaɓɛ na ɓáɔ́li bɔngɔ ábu, ɓáɔ̌sɛnɛkɛa, cɛɗɛ! 11Ɓáǒngoɗea te: «Ɓato á ka Galiláya, nyɔngɔ sina nde ɓomamei wani, na ɓɔɔnjia na koba? Yéso, mmbé Mokonga ɗántókisi ka nkíndí anu, áontáisa na koba, ajande goto tɔ ɓíndɔ ɓɔmɔni n'aotáia na koba.»
Ɓateki ɓansɔmbu mpɛnɛ á Yúda Isikaliɔ́ta
12Cɔ, ɓateki ndea Yéso ɓáotóka ka mamba á Mijɛitúni ɓáoja na Yɛusalɛ́ma. Mamba ndɔ ɗátú bíbí na Yɛusalɛ́ma ɓea kilɔmɛ́tɛɛ moci#Ɔna Mkɔ 11.1. Cɔ, ɓateki ɓáodida mamba, ɓáoja na Yɛusalɛ́ma. 13Ɓî ɓájú ye ka Yɛusalɛ́ma, ɓáoɗápha suɓi éndu á gǔ ɔma nde ɗáɓáodondanaga. Ɓunde ɗáɓátú wa, ɓáungee: «Pɛ́tɛɛ, Yoáni, Yakɔ́ɓɔ na Andeé. Philípɔ na Tɔmá. Batɔlɔmáyɔ na Matáyɔ. Yakɔ́ɓɔ muna Alpháyɔ, Simɔ́ni mmbé ɗáokáɓa tokisa á nji nɛɓɔ ka kɔkɔɓɛ, na Yúda muna Yakɔ́ɓɔ#Ɔna Mat 10.2-4; Mkɔ 3.16-19; Lók 6.14-16.» 14Ɓɔbu, na měma moci, ɗáɓá na moíngi á dondanaga k'ɛ́mɛmi. Ɗáɓáɔmɛma kimoci na Malía amakɛ na Yéso, ɓana-amakɛ na Yéso, na ɓake ɓuangbo.
15K'ésa ndɔ, ɓaɓêki nde ɗáɓádondanigi, ɗáɓátú ɓea ɓakpa mia moci nkama-iɓɛ (120). Mpɔ, Pɛ́tɛɛ áoma sɔsɔɓɛ aɓɔ, áǒgeae: 16«Ɓaya, atókeni nyɔngɔ nde Měma á kanga ɓojeɗe ɗáyɔngi suɓi á Ɓuku á Mokonga átɔtɔkɛanɛ. Měma ndɔ ɗáyɔngi phɔ́ mosá suɓi á moamɛ Daúdi ka phɔa Yúda#Ɔna Jab 41.10. Yúda ɗátú nsɔndɔi ndea ɓakpa ndɔ ɗáɓándungi Yéso. 17Cɔ, Yúda ɗátú ka ɓesu, ɗájúkani phɔtɔ na ɓesu k'ékuma.
18Yɛ, ɗátɔí oɗo ka somba í na imɔna nde ɗátɔí ka ɓojeɗe. Áogua wa n'atúmanigi, sɔphɔ akɛ áobomoka, suɓa akɛ bui áokpûkana. 19Ɓato á ka Yɛusalɛ́ma ɓɔbu ɗáɓáúbi nyɔngɔ ndɔɔ. Kaɓondɔ, ɓáosua ina á oɗo ndɔ ka ɛyɔngi nɛɓɔ ‹Akɛɛ-dámu›. Ande gea te: ‹Oɗo á magia#Ɔna Mat 27.3-8.›
20Nga ɓáɗundu suɓi á Jabúi ɓe:
‹Ambe endu nɛkɛ áɓɛ esimɔ,
nkpa kaikɛmbɛ kau.›
Ɓáɗundu phɔtɔ,
‹Ambe nkpa ɓaangbo ájigɛ n'ekuma nɛkɛ#Ɔna Jab 69.26—109.8.›
21Cɔ, kaɓondɔ, akeni ka ɓakpa ndɔ, ɓénsɔmbɔɛ nkpa moci, mmbé ɗátú na ɓesu mbenɔ bui nde ɗéɓeotamba na Mɔkɔta Yéso, 22kpanga ka oɓatisɔ ndea Yoáni, na ka sungiaga ɓî Mokonga ɗántáisi Yéso na koba#Ɔna Mat 3.16; Mkɔ 1.9; Lók 3.21. Nga, akeni áɓɛ nɗigimisi á nyɔngɔ á jujúka á Yéso ka kukuwa.»
23Wa, ɓáǒbisa ɓakpa ɓaɓɛ. Ina á moci ande Yɔsɛ́phu mmbé ɓáɔmɔphana Balisába Yúsitɔ. Mmbé ɓa ko baɓɛ áoɓá Matiási. 24Mpɔ, ɓáɔmɛma Mokonga ɓe: «Oɓɛ Mɔkɔta, múbi-měma á ɓakpa ɓɔbu, ósophangia phɔ́, ani mmbé ɔnsɔmbu sɔsɔɓɛ á ɓakpa nde ɓá ɓaɓɛ. 25Yɛ, áɓɛ nteki nɛkɔ, phɔtɔ mpɛnɛ á Yúda mmbé age k'ɔ́ma nɛkɛ nnde ankeni.» 26Mpɔ, ɓáɔɓɛta ɓana-mɛlɔɛ ka úba ani mmbé, Mɔkɔta ansɔmbu. Ɓana-mɛlɔɛ ɓáonguia Matiási, áoɓá sɔsɔɓɛ á ɓateki ɓuangbo nkama na moci (11).
Currently Selected:
Ekuma á ɓateki 1: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
