Ekuma á ɓateki 2
2
Měma á kanga ɓojeɗe adidí gǔ á ɓaɓêki ndea Yéso
1K'ésa á jaí á Pɛntɛkɔ́tɛ#Ɔna Ɓlw 23.15-21; Tɔl 16.6-11, ɓaɓêki ndea Yéso ɓɔbu ɓáodondanaga k'ɔ́ma ímoci. 2Mɔngɔ moci, eongo áotóka na koba, ɓea sumbu akpɛ phɛɛ unge aɔɓɛta. Eongo ndɔ áotúma k'éndu bui nde ɓaɓêki ɗáɓáiki kau. 3Mpɔ ɓáɔɔna kema ɓea ɛɛmbɛ á nsa n'ɛ̌sɛnɛkɛi. Ɛɛmbɛ ndɔ áokatanaga, áoika gǔ aɓɔ moci-moci. 4Mpɔ, ɓɔbu ɓáotúma na Měma á kanga ɓojeɗe, ɓáokpanga yɔnga ka ɛyɔngi nɛngbo ɓíndɔ Měma aéteki gea, ɓáyɔngɛ.
5Cɔ, Ɓayúda ɓunde ɗáɓáomɓánga Mokonga, ɗáɓátóki ka nji ɗanga-ɗanga á ka mokonda, ɓáoɓá ka Yɛusalɛ́ma. 6Ɓî eongo ndɔ áɔ́kɛkani, usɛsɛ á ɓakpa ɓáodondanaga, ɓáotangaaga nga, nkpa moci-moci ɗáɔɓɔ́ka ɓaɓêki na ɓáɔyɔnga ka ɛyɔngi nɛkɛ á ɓɔkɔtɛana. 7Ɓáotangaaga, ɓáoyayama. Ɓáogea: «Ɓakpa nde ɓáɔyɔnga, ɓɔbu ɓáká phɔ́ ɓato á ka Galiláya? 8Cɔ, nkpa moci-moci sɔsɔɓɛ asu aɔ̌ɓɔka na ɓáɔyɔnga ka ɛyɔngi nɛkɛ á ɓɔkɔtɛana ka ɓo?
9Ɓakpa ɓuangbo ɓá sɔsɔɓɛ asu, ɓato á ka Páati, Ɓamɛ́di na Ɓaɛlámu, ɓundɔ ɓáiki ka Mɛsɔpɔtamía, Yudɛ́a na Kapadɔkía, Pɔntɔ na Asía, 10ɓuangbo ɓátóki phɔtɔ na Phuigía, Pamphilía, Mísii na phaeka á kenombe á Libía, bíbí á Kuɛ́nɛ. Ɓuangbo ɓátóki phɔtɔ na Lɔ́ma, 11ɓundɔ Ɓayúda, na ɓundɔ ɓáɓeeki esomba ndea Ɓayúda, na ɓato á ka Kɛɛ́tɛ na ɓato á ka Alabía. Cɔ, ɓɛɔɓɔ́ka na ɓáɔyɔnga ketangaɔ ndea Mokonga ka ɛyɔngi ndeasu ɗanga-ɗanga ka ɓo!» 12Ɓî ɓɔbu ɓátangaigi na yayama, ɓáɔyɔngaga sɔsɔɓɛ aɓɔ gea: «Kantíti á nyɔngɔ nde a ɓo?» 13Ɓuangbo ɓâ gǎkɛ ɔ̌tɛbɛaga ɓaɓêki gea: «Makana ɛ̌bɛɗi phɛɛ.»
Pɛ́tɛɛ aɔphɛa ka nkíndí á ɓakpa
14Mpɔ Pɛ́tɛɛ áǒmesia kimoci na ɓateki nkama na moci (11), áokpanga yɔnga k'ɛ́sɔ akpɛ gea: «Cɔ, ɓenu Ɓayúda na ɓenu ɓato á ka Yɛusalɛ́ma ɓɔbu, phéngani phɔ́ kecue anu, ɓɔ́ɔ́kɛ nyɔngɔ nde neonongoɗea. 15Makana káɛbɛɗi ɓakpa nde ɓíndɔ ɓookanisia nga, ɓî esa ásɛ, a phɔ́tɔ ka nji asasi. 16Cɔ, nnde ande gǎkɛ tɔtɔkɛana á nyɔngɔ nde Yɔɛ́li mɔtu-nyɔngɔ ndea Mokonga ɗáyɔngi.
17Mokonga ayɔngi ɓe:
‹Ka matú á sungiaga á mokonda, nɛɛmbisande Měma ani ka ɓakpa ɓɔbu,
Ɓaniki ɓǒko na ɓaseka nɛnu ɓáɔtɔande nyɔngɔ,
Ɓaganda nɛnu, ɓáɔnande mphaniɔ.
Ɓagbɛga nɛnu ɓáɗande na njeki.
18Eya, k'ésa ndɔ aɓande phɔtɔ ɓó ka ɓabɛɗanigi nɛmɔ ɓǒko na ɓake.
Nɛɛmbisande Měma ani ka ɓɔ, ɓáɔtɔande nyɔngɔ.
19Negeande ketangaɔ na koba k'égo,
nê phɔtɔ ogea mphangiɔ kusi á maní.
Magia, nsa n'eɓundu á maki aɓande ɓei.
20Maní agaikanande, áoínda,
Songe anjɛnjɛmanande ɓea magia,
mosá á esa á kiɗia á Mɔkɔta.
Esa ndɔ, aɓande esa ángbó, esa á ɓoombia.
21Nkpa buakɛ mmbé, aɔphaneande ina á Mɔkɔta, aamande ka měma#Ɔna Yɔɛ́li 3.1-5.›
22Cɔ, Ɓaisilaɛ́li ɓaya, ɔ́kani phɔ́ nyɔngɔ nde: Yéso ɓa Najalɛ́ti#Ɔna Mat 2.23; Lók 18.37, ande nkpa nde Mokonga ɗánsɔmbu ka úbisa anu base gea, ana ɓukpɛkpɛ á tɔtɔkisa á ketangaɔ ɗanga-ɗanga na mphangiɔ sɔsɔɓɛ anu ɓíndɔ ɓooúba sasanu. 23Mokonga ɗámbisi Yéso ka njaga anu ɓíndɔ ɗáúbikani na anga í kala. Ɓômbisa ka njaga á ɓakpa nde ɓákáomúba Mokonga#Ɔna Mat 27.35; Mkɔ 15.24; Lók 23.33; Yoá 19.18. Ɓakpa ndɔ, ɓáommowa ka kɔkɛaga akɛ ka moyangɔ. 24Mokonga â gǎkɛ onjujukisa ka kukuwa, áonkoɗaga ka kokae á kukuwa. Nga, kukuwa ɗákátú na ɓukpɛkpɛ#Ɔna Mat 28.5-6; Mkɔ 16.6; Lók 24.5 á tɔka akɛ. 25Nga, moamɛ Daúdi ɗáengekisi nyɔngɔ nɛkɛ gea:
‹Ɗɛ́ɔmɔna Mɔkɔta Mokonga mosá ani mbenɔ bubui,
ka nyɔngɔ nde, aka njaga ani á mǔku, ka gea kéemanɛgɛ.
26Ka nyɔngɔ índɔ unge měma ani ana maseye, nɛɔyɔnga na maseye,
goto nena nseɓeɔ gea, nyama ani aúmbiande.
27Ka nyɔngɔ nde, oɓɛ Mɔkɔta Mokonga, kómoɗeketɛku eme ka nji á ɓasí,
phɔtɔ, kómoɗeketɛku eme nto á kanga ɓojeɗe nɛkɔ néphoɛ.
28Ɗómophangi aphe á enda,
omotúmisande na maseye ɓî nɛɔnande keongi akɔ#Ɔna Jab 16.8-11.›
29Cɔ, ɓaya, ómoɗeketani phɔ́ nenoúbisɛ base nyɔngɔ ndea tatasu, Moamɛ Daúdi. Yɛ, ɗáku phɔtɔ, ɓáomúmba. Na ka kesande, bóta akɛ a phɔ́tɔ sɔsɔɓɛ asu#2.29 Ɔna 1 Ɓam 2.10. Wani ande mɔkɔta Daúdi.. 30Yɛ, ɗátú gǎkɛ mɔtu-nyɔngɔ ndea Mokonga, ɗáúbi gea, Mokonga ɗámɔku, ka nɔɛa akɛ esomba gea, ka ɓato á k'ékombo nɛkɛ moci, aɓande moamɛ ka mpɛnɛ akɛ#Ɔna Jab 132.11; 2 Sam 7.12-13. 31Daúdi ɗáɔni phɔ́ mosá nyɔngɔ á jujúka á Kiísito ka kukuwa. Ɗáɗundu gǎkɛ ɓe:
‹Ɗákánsagi, áikɛ ka nji á ɓasí.
Nyama akɛ ɗákáphoe.›
32Yéso ndɔ tɔ aámbé Mokonga ɗánjujúkisi ka kukuwa. Ɓesu ɓɔbu ɓende ɓaɗigimisi á nyɔngɔ ndɔɔ. 33Ɓî Mokonga antáisi na bisa akɛ ka njaga akɛ á mǔku, áoɓá na Měma á kanga ɓojeɗe nnde yɛ abakɛ ɗámɔku. Yéso aámbé aɛmbisi kema nde ɓɔɔ́ka na nnde ɓɔɔna ka ɓesu. 34Nga, nna Daúdi aámbé ɗátái na koba. Ɗáyɔngi ndiu sasakɛ gea:
‹Mɔkɔta Mokonga ɗángoɗi Mɔkɔta nɛmɔ gea,
ika nkɛkɛɔ á njaga ani á mǔku,
35na ka ɓî něbisande ɓaɓiɓia akɔ kusi á ecinji akɔ#Ɔna Jab 110.1.›
36Eya, ambe ɓenu Ɓaisilaɛ́li ɓɔbu, ɓóúbɛ base gea, Yéso mmbɔ ɗóɓɔnkɔkɛigi gǔ á moyangɔ, yɛ aámbé Mokonga ambisi, Mɔkɔta na Kiísito.»
37Ɓî ɓakpa ɗáɓáɔ́ki nyɔngɔ ndɔ, áǒsumba ka měma. Ɓáomúsia Pɛ́tɛɛ na ɓateki ɓuangbo te: «Ɓaya, ɓegeande ɓo?» 38Mpɔ, Pɛ́tɛɛ áǒsikisia te: «Kětiani tambea anu ájeɗe, ɓánoɓatisɛ moci-moci ka ina á Yéso Kiísito gea te, Mokonga áímɛ ɓojeɗe nɛnu, mpɔ ɓoɓande na ɓokambia á Měma á kanga ɓojeɗe. 39Nga, mɔkɔ ndea Mokonga a ka ɓenu, ɓaniki nɛnu na ɓɔbu ɓunde ɓá ɗanga na ɓɔbu ɓunde Mɔkɔta nɛsu Mokonga aɛɓɔphanande.»
40Pɛ́tɛɛ â goto otútuisa ɓoabi nɛngbo ásii, áɔ̌phɛa na gbagisaga aɓɔ ka měma ɓe: «Óamisani n'ɛɓɔkɔti ájeɗe ndee.» 41Cɔ, ɓakpa nde ɗáɓáɓeeki nyɔngɔ ndea Pɛ́tɛɛ, ɓáǒɓatisa. K'ésa ndɔ tɔ, ɓakpa ɓea ɛlɛphu isaɔ (3.000), ɓáǒyamea ka nkíndí á ɓaɓêki.
Tambea á ɓateki á k'ama mosá-mosá
42Ɓaɓêki ndɔ ɗáɓátú na moíngi ka ɔ́ka ɓɔphɛi ndea ɓateki, ɓáoika ka komunamema, ɓáoeaga kimoci, na mɛma á Mokonga phɔtɔ kimoci. 43Cɔ, ɓaɓêki ɓɔbu ɗáɓáomɓánga Mokonga, ka nyɔngɔ nde, ɗáɔtɔtɔkisa ketangaɔ na mphangiɔ ɗanga-ɗanga ka njaga á ɓateki. 44Ɓaɓêki ɓɔbu ɗáɓátú tɔ kimoci, ɓáogabeanaga nkumba nɛɓɔ bui ngǔngu aɓɔ. 45Nga, ɗáɓáosombisaga nkumba ɗanga-ɗanga, na osaa nɛɓɔ, ɓáokatisanaga imɔna í sɔsɔɓɛ aɓɔ ka tɔtɔkisa siki nde nkpa na nkpa ɗátú ně. 46Esa bui ɗáɓáodondanaga k'éndu á Mokonga na měma mo. Báoeaga kimoci k'éndu ɗanga-ɗanga. Ɗáɓáoeaga kimoci na maseye na měma édidisa. 47Ɓaɓêki ɗáɓáombeba Mokonga, ɓakpa ɓɔbu ɓáǒkonda. Mɔkɔta Mokonga áoyamea ɓunde aéamisi ka měma ka nkíndí á ɓaɓêki.
Currently Selected:
Ekuma á ɓateki 2: KMW
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
