Shıǵıw 22
22
Mal-múlik haqqında nızamlar
1– Eger kim de kim iri mal yamasa mayda mal urlap, onı soysa yamasa satıp jiberse, bir ógizdiń ornına bes ógiz, bir qoydıń ornına tórt qoy tólesin.
2Kim de kim túnde úyge urlıqqa túsip atırǵan urıǵa tap bolıp, onı urıp óltirse, tógilgen qan onıń moynına júklenbesin. 3Biraq eger waqıya quyash shıqqannan keyin bolsa, onda qan tókken adam ayıplı boladı. Urı urlaǵan nársesiniń qunın tolıq tólesin. Eger urınıń tóleytuǵın hesh nársesi bolmasa, urlaǵanların tólewi ushın, ol qul qılıp satılsın. 4Qara mal ma, eshek pe yamasa mayda mal ma, ne bolsa da, urlanǵan mal urınıń qolınan tiriley tabılsa, onda ol mal ushın eki ese qun tólesin.
5Eger kim de kim malların óz atızına yamasa júzim baǵına otlatıp qoyıp, mallarınıń basqa birewdiń atızına túsiwine jol qoysa, onda ol óz atızınıń yamasa baǵınıń eń jaqsı ónimlerinen tólesin.
6Eger birew ot jaǵıp, bul ottan tikenler alısıp ketip, bawlanǵan eginlerdi, atızdaǵı zúráátti yamasa pútkil egislikti jandırıp jiberse, onda ot jaqqan adam shıǵındı tolıq tólesin.
7Kim de kim qońsısına aqshasın yamasa zatların amanat etip berse, biraq sol nárseler qońsısınıń úyinen urlanıp, urı tabılsa, urı urlaǵan zatların eki ese etip tólesin. 8Al eger urı tabılmasa, úy iyesi qazılardıń aldına barıp, amanatqa qıyanet etpegenin aytıp ant ishsin. 9Qanday da bir dawlı nárse: iri mal, eshek, mayda mal, kiyim-kenshek, hár qanday joytılǵan nárse boyınsha: «Bul – meniki» degen talas bolsa, onda eki tárep máseleni qazılarǵa jetkizsin. Qazılar ayıplı dep tapqan adam qońsısına eki ese tólesin.
10Kim de kim qońsısına eshegin, iri malın, mayda malın yamasa qanday da bir malın amanat etip berse, sol mal ólip qalsa yamasa jaraqat alsa, ya bolmasa urlanıp, buǵan gúwa bolmasa, 11onda maldı amanatqa alǵan adam qońsısınıń malına qol tiygizbegenin aytıp, Jaratqan Iyeniń atı menen ant ishsin. Maldıń iyesi bunı qabıl etsin hám qońsısı hesh nárse tólemesin. 12Biraq alǵan adamnan sol mal urlanǵan bolsa, onda ol maldıń iyesine qun tólesin. 13Eger maldı bir jırtqısh haywan tilkimlep taslaǵan bolsa, onda baqqan adam tilkimlengen maldı dálil etip kórsetiwi tiyis hám sol mal ushın hesh nárse tólemesin.
14Eger kim de kim qońsısınan bir mal sorap alıp tursa, iyesi joqta mal jaraqat alsa yamasa ólip qalsa, alǵan adam mal ushın tolıq qun tólewi tiyis. 15Biraq iyesi maldıń qasında bolǵan bolsa, qarızǵa mal alǵan adam hesh nárse tólemesin. Al eger mal jallap alınǵan bolsa, onda jallanǵan bahası tóleniwi tiyis.
Jámiyetlik juwapkershilikler
16– Eger kim de kim atastırılmaǵan bir qızdı aldap, onıń menen jatsa, qız ushın qalıń mal berip, oǵan úyleniwi tiyis. 17Eger ákesi qızın sol adamǵa beriwge ırazı bolmasa, onda ol qızlarǵa beriletuǵın qalıń mal muǵdarın tólesin.
18Sıyqırshı hayaldı tiri qaldırmańlar.
19Haywan menen jınısıy qatnas jasaytuǵın adam sózsiz óltirilsin.
20Jaratqan Iyeden basqa qudaylarǵa qurbanlıq bergen adam joq qılınsın.
21Kelgindi adamǵa jábir berip, eziwshi bolmańlar. Sebebi sizler de Mısırda kelgindi boldıńlar.
22Jesirler menen jetimlerge jábir bermeńler. 23Eger jábir berseńiz, olar Maǵan jalbarınsa, olardıń nalaların sózsiz esitemen. 24Sonda Meniń ǵázebim lawlap, sizlerdi qılısh penen óltiremen. Aqıbetinde hayallarıńız jesir, al balalarıńız jetim bolıp qaladı.
25Meniń xalqımnan bir kámbaǵalǵa qarızǵa aqsha berseń, ósimge pul beriwshi sıyaqlı payız mindirme. 26Eger qońsıńnıń shapanın girewge alsań, onı quyash batpastan burın qaytarıp ber. 27Óytkeni sol shapan onıń jalǵız jamılatuǵın nársesi. Shapanı bolmasa, ol neni jamılıp uyıqlaydı? Solay etip, ol Maǵan jalbarınsa, onı esitemen. Sebebi Men miyrim-shápáátlimen.
28Qudayǵa til tiygizbeńler. Xalqıńızdıń basshıların ǵarǵamańlar.
29Qırmanıńızdıń hám juwazlarıńızdıń zúráátin Mennen ayap, Maǵan alıp keliwdi keshiktirmeńler. Tuńǵısh ullarıńızdı da Maǵan baǵıshlańlar. 30Iri mal hám mayda mallarıńız benen de solay isleńler. Olar jeti kún anasınıń janında qalsın, al segizinshi kúni olardı Maǵan berińler.
31Sizler Meniń muxaddes xalqım bolasızlar. Sonlıqtan dalada tilkimlenip taslanǵan haywandı jemeńler, onı iytlerge taslańlar.
Currently Selected:
Shıǵıw 22: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
