Shıǵıw 25
25
Muxaddes shatır ushın beriletuǵın qurbanlıqlar
1Jaratqan Iye Muwsaǵa bılay dedi:
2– Izraillılarǵa ayt, Maǵan názir alıp kelsin. Shın júregi menen bergen hár bir adamnıń názirin qabıl etińler. 3Olardan qabıl etetuǵın názirlerińiz mınalar: altın, gúmis, qola, 4júnnen iyirilgen qızǵısh kók, shım qızıl, qırmızı jipler hám hasıl zıǵır jibi, eshkiniń júni, 5qızılǵa boyalǵan qoshqar terisi, jumsaq teri hám akaciya aǵashı, 6shıralar ushın záytún mayı, maylaw rásimine arnalǵan may hám xosh iyisli tútetki ushın xosh iyisli zatlar, 7bas ruwxaniydiń efodına#25:7 Efod – bas ruwxaniydiń kiyimleriniń bir bólegi. Sózlikke qarań. hám qaltalı óńirshesine taǵılatuǵın oniks hám qımbatbaha taslar.
8Arasında jasawım ushın, izraillılar Maǵan arnap, Muxaddes mákan tayarlasın. 9Muxaddes shatırdı hám onıń buyımların Men saǵan kórsetken úlgige say qılıp isleńler.
Kelisim sandıǵına tiyisli kórsetpeler
10– Akaciya aǵashınan sandıq isleńler. Onıń uzınlıǵı eki yarım shıǵanaq, eni bir yarım shıǵanaq hám biyikligi bir yarım shıǵanaq bolsın. 11Sandıqtıń ishi-sırtın sap altın menen qaplat. Al ernegine altınnan jiyek saldır. 12Sandıq ushın tórt altın halqa quydırıp, tórt tuyaǵına ornattır: ekewi bir jaǵında, qalǵan ekewi ekinshi jaǵında bolsın. 13Sońınan akaciya aǵashınan sırıqlar isletip, olardı altın menen qaplat. 14Sandıqtı kóterip júriw ushın, sırıqlardı eki tárepindegi halqalardan ótkiz. 15Sırıqlar halqalardan ayırıp alınbay, hámme waqıt halqalarǵa kirgiziwli tursın. 16Men saǵan beretuǵın kelisim buyrıqları jazılǵan eki tastı sandıqtıń ishine salıp qoy.
17Sandıqtıń qaqpaǵın da sap altınnan islet. Qaqpaqtıń uzınlıǵı eki yarım shıǵanaq, eni bir yarım shıǵanaq bolsın. 18Qaqpaqtıń eki shetine altınnan eki kerub#25:18 Kerub – qanatlı ruwxıy barlıq. shókkishlep soqtır. 19Kerublardıń birewi qaqpaqtıń bir shetinde, al basqası ekinshi shetinde bolıp, olar qaqpaq penen bir tutas qılıp islensin. 20Kerublardıń joqarıǵa jayılǵan qanatları qaqpaqtı jawıp, júzleri bir-birine qarama-qarsı túrde qaqpaqqa qarap tursın. 21Qaqpaqtı sandıqtıń ústine, Men saǵan beretuǵın taslardı bolsa, sandıqtıń ishine qoy. 22Men seniń menen sol jerde, Kelisim sandıǵınıń ústindegi kerublar arasında, yaǵnıy qaqpaqtıń ústinde ushırasıp, izraillılar ushın saǵan buyrıqlar beremen.
Usınılǵan nanlar qoyılatuǵın stol
23– Akaciya aǵashınan bir stol islet. Onıń uzınlıǵı eki shıǵanaq, eni bir shıǵanaq, al biyikligi bir yarım shıǵanaq bolsın. 24Stoldı sap altın menen qaplatıp, ernegine altın jiyek saldır. 25Stoldıń átirapına tórt eli bolǵan qaptal isletip, onı altın jiyek penen qaplat. 26Stol ushın tórt altın halqa isletip, olardı stoldıń tórt múyeshindegi tórt tuyaqqa ornat. 27Stoldı kóterip alıp júriwge arnalǵan sırıqlar ótkiziletuǵın halqalar qaptallarǵa jaqın ornatılsın. 28Sırıqlardı akaciya aǵashınan isletip, olardı sap altın menen qaplat. Stoldı usı sırıqlar járdeminde kóteretuǵın bolsın. 29Jáne de, stol ushın sap altınnan tabaqlar, tútetki salatuǵın tostaǵanlar, ishimlik sadaqaları ushın gúzeler hám keseler islet. 30Meniń aldımdaǵı stolda bárqulla usınılǵan nanlar tursın.
Shıra qoyǵısh
31– Sap altınnan shıra qoyǵısh islet. Onıń ultanı, baldaǵı, shaqaları, gúlleri hám onıń gúlkeseleri menen gúltajları ózi menen bir tutas bolıp shókkishlep islensin. 32Shıra qoyǵıshtıń eki qaptalınan úsh-úshten, altı shaqa shıǵıp tursın. 33Shıǵıp turǵan hár bir shaqada badam gúline uqsas úsh gúl hám onıń gúlkeseleri menen gúltajları bolsın. 34Shıra qoyǵıshtıń baldaǵında badam gúline uqsas tórt gúl hám onıń gúlkeseleri menen gúltajları bolsın. 35Shıra qoyǵıshtan shıǵıp turatuǵın altı shaqanıń hár bir jubınıń astında úsh gúlkese izli-izinen dizilip tursın. 36Shıra qoyǵısh gúlkeseleri hám shaqaları menen bir tutas etip, sap altınnan shókkishlep islensin. 37Shıra qoyǵısh ushın jeti shıra islet. Shıralardı shıra qoyǵıshtıń aldı betine jaqtı túsirip turatuǵınday etip ornat. 38Piliklerdi tazalaytuǵın qısqıshlar menen ıdıslar da sap altınnan bolsın. 39Shıra qoyǵısh hám onıń barlıq buyımları bir talant#25:39 Bir talant – shama menen 34 kg. sap altınnan islensin. 40Abaylı bol, bulardıń hámmesin saǵan tawda kórsetilgen úlgiler boyınsha islet.
Currently Selected:
Shıǵıw 25: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
