Shıǵıw 6
6
1Sonda Jaratqan Iye Muwsaǵa:
– Endi sen faraonǵa ne isleytuǵınımdı kóreseń. Ol Meniń qúdiretli qolım sebepli Izrail xalqın azat etedi, hátte, qúdiretli qolım sebepli olardı ózi elinen quwıp shıǵaradı, – dedi.
Qudaydıń Muwsanı jáne shaqırıwı
2Quday Muwsaǵa jáne bılay dedi:
– Men – Jaratqan Iyemen. 3Ibrayımǵa, Ísaqqa hám Yaqıpqa Qúdireti kúshli Quday bolıp kórindim.#6:3 Jar 17:1-8; 28:1-5; 35:11-13. Biraq Men olarǵa Ózimdi Jaratqan Iye degen atım menen tanıtpadım. 4Ózleri kelgindi bolıp jasaǵan Qanan jerin olarǵa beriw ushın, Men olar menen kelisim dúzdim. 5Endi bolsa, mısırlılar qul qılǵan izraillılardıń nalaların esitip, kelisimimdi eske aldım. 6Solay etip, izraillılarǵa bılay de: «Men – Jaratqan Iyemen. Sizlerdi mısırlılardıń awır jumısınan azat etip, olardıń qullıǵınan alıp shıǵaman. Olardı qatań jazalayman, sizlerdi kúshli qolımdı sozıp, qutqarıp alaman. 7Sizlerdi Óz xalqım qılaman hám Ózim sizlerdiń Qudayıńız bolaman. Sonda sizler Meniń ózlerińizdi mısırlılardıń awır jumısınan azat qılǵan Qudayıńız Jaratqan Iye ekenimdi bilip alasızlar. 8Sizlerdi Ibrayım, Ísaq hám Yaqıpqa beremen dep Ózim ant ishken jerge aparaman. Ol jerdi sizlerge múlik etip beremen. Men – Jaratqan Iyemen».
9Muwsa bul sózlerdi izraillılarǵa aytıp berdi. Biraq olar ruwxıy túskinlikte bolıp, awır qulshılıqta júrgenlikten, Muwsanı tıńlamadı. 10Sonda Jaratqan Iye Muwsaǵa:
11– Mısır patshası faraonǵa barıp: «Izraillılardıń jerińnen ketiwine ruxsat ber», – dep ayt, – dedi. 12Biraq Muwsa Jaratqan Iyege:
– Men sózge sheshen emespen. Sózimdi izraillılar tıńlamaǵanda, faraon qalay tıńlasın? – dedi.
13Degen menen, Jaratqan Iye Muwsa hám Xaron menen sóylesip, izraillılardı Mısır jerinen alıp shıǵıw ushın, izraillılarǵa hám Mısır patshası faraonǵa baylanıslı buyrıqlar berdi.
Muwsa hám Xaronnıń shejiresi
14Izraillılardıń áwlad basshıları mınalar edi: Izraildıń tuńǵısh ulı Rubenniń ulları: Xanox, Pallu, Xesron, Karmiy. Bular Rubenniń tiyreleri edi.
15Shimonnıń ulları: Emuel, Yamin, Ohad, Yaxin, Soxar hám qananlı bir hayaldan tuwılǵan ulı Shaul. Bular Shimonnıń tiyreleri edi.
16Urpaqları boyınsha, Lebiydiń ullarınıń atları mınalar edi: Gershon, Qohat hám Merariy. Lebiy bir júz otız jeti jıl ómir súrdi. 17Gershonnıń ulları: hár biri tiyre basshısı bolǵan Libniy menen Shimey. 18Qohattıń ulları: Amram, Ishar, Xebron hám Uzziel. Qohat bir júz otız úsh jıl ómir súrdi. 19Merariydiń ulları: Maxliy hám Mushiy. Shejiresi boyınsha, Lebiydiń tiyreleri usılar edi.
20Amram ákesiniń qarındası Ioxebedke úylenip, Ioxebed oǵan Xaron menen Muwsanı tuwıp berdi. Amram bir júz otız jeti jıl ómir súrdi. 21Ishardıń ulları: Qorax, Nefeg hám Zixriy. 22Uzzieldiń ulları: Mishael, Elsafan hám Sitriy.
23Xaron Naxshonnıń qarındası, Amminadabtıń qızı Elishebaǵa úylendi. Elisheba oǵan Nadab, Abihu, Elazar hám Itamardı tuwıp berdi. 24Qoraxtıń ulları: Assir, Elqana hám Abiasaf. Bular Qoraxtıń úrim-putaǵı edi. 25Xaronnıń ulı Elazar Putieldiń qızlarınıń birine úylendi. Hayalı onnan Pinexastı tuwdı. Tiyrelerge bólingen Lebiy urıwınıń áwlad basshıları usılar edi.
26Usı Muwsa menen Xaronǵa Jaratqan Iye: «Izraillılardı top-tobı menen Mısırdan alıp shıǵıńlar», – degen edi. 27Izraillılardı Mısırdan alıp shıǵıw ushın, Mısır patshası faraon menen sóyleskenler de usı Muwsa menen Xaron edi.
Jaratqan Iyeniń Muwsa menen Xaronǵa bergen buyrıǵı
28Jaratqan Iye Mısırda Muwsa menen sóyleskeninde, 29oǵan: «Men – Jaratqan Iyemen. Saǵan aytatuǵınlarımnıń hámmesin Mısır patshası faraonǵa jetkiz», – degen edi. 30Sonda Muwsa Jaratqan Iyeniń aldında Oǵan: «Men sózge sheshen emespen. Meni faraon tıńlaytuǵın ba edi?» – dep juwap bergen edi.
Currently Selected:
Shıǵıw 6: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022
