Luka 7
7
Isa ka sɔdasi kuntii ya bɔiden lakɛnɛya teme
Matiyu 8.5-13; Yohana 4.43-54
1Isa wɔlinin wo bɛ fɔla jama yɛ, a do vɛ taala ka se Kapɛlɛnamu so kɔnɔ. 2Lɔmu sɔdasi kuntii dɔ tɛɛ je, min diyanan bɔiden kɛnɛyanin tɛɛ tɛ haan fɔɔ a tɛɛ sa bolo le ma. 3Sɔdasi kuntii ka Isa mangan mɛn mingɛ, a ka Jahudiya kɛmɔba dɔlu lataa Isa ma, ko a yi na ka aa bɔiden lakɛnɛya. 4Kɛmɔbalu senin Isa ma, ai v'a madiyala kosɛvɛ, ai vɛɛ: «A bɛnnin i yi kɛ́ min madɛmɛn, 5kamasɔlɔn mɔ siboloma diyanin a yɛ bubale. Ale le na maa Aladalibon lɔla mɔ yɛ.»
6Wo fɔ, Isa vɛ taala ai fɛ. Ai masulunyanin bon na, sɔdasi kuntii k'a tɔvalu kelaya Isa ma ko ai yi taa a fɔ a yɛ, ko: «Ǹ Kuntii, i k'i jɛlɛ ɲagba. Hɔlɔ tɛ ǹ ne k'a fɔ i yi don ǹa bon na. 7Wo le n'a kɛla, ǹe gbu ma na i ma. I do vɛ kuma kelen fɔla dein, ǹa bɔiden yi kɛnɛyale. 8Kamasɔlɔn ǹe fana yi dɔ le ya fanga kɔlɔ, ado sɔdasilu yi ǹa fanga kɔlɔ. M̀'ɛ a fɔla min yɛ: ‹Taa!›, wo yi taale. Ǹe do v'a fɔla min yɛ: ‹Na!›, wo yi nale. M̀'ɛ a fɔla ǹa bɔiden yɛ: ‹Min kɛ!›, a yi wo kɛle.»
9Wo mɛn Isa bolo, a ka kawakoya kosɛvɛ. A do k'a ɲa tilimin jama la minu tɛɛ a kɔ, k'a fɔ ai yɛ, a vɛɛ: «Ǹ'a fɔ ài yɛ, m̀ ma limaniya min ɲɔɔzii ye ba bene hali Bani Isilankalu gbu tɛma.» 10Samakanlaseba wolu kɔseinin luu ma, ai ka bɔiden wo kɛnɛyanin ye.
Isa ka kavelen dɔ fuleni lawuli teme
11A lɔ ma mɛn wo kɔ, Isa ka taa se so dɔ la, min tɔɔ yi ko Nain. A kɔbiladennu ni jama ba tɛɛ a kɔ. 12A masulunyanin so donda la, a ka sokɔnɔmɔɔ siyama bɔtɔla ye, kavelen dɔ fuleni tɛɛ ai bolo. Kɛsamoso dɔ denkɛ kelenpesa le tɛɛ wo le. 13Mɔ Kuntii ka moso wo ye mingɛ, a hena k'a mina. A do vɛɛ a yɛ: «I kà kasi.» 14Wo fɔ Isa bolo, a k'i madon sutafen na k'a bolo tuu a la. Sutabalu do k'i lɔ. Isa vɛɛ: «Kavelen, ǹ'a fɔ i yɛ, i wuli!» 15Fuleni do v'i wulila k'i sii ka kuma damina. Wo kɛnin, Isa ka a don a ba bolo. 16Mɔɔ bɛ ka siyan wo lɔ ka Ala tanu, ai vɛɛ: «Kela ba dɔ v'i wuli mɔ tɛma!» Ai do vɛɛ kɔtunun: «Ala vɛ na bɔ aa mɔɔlu ma!» 17Samakan wo ka jɛzɛn Jude koovi ni a laminin bɛ lɔ ka bɛn Isa ma.
Yaya ka a kɔbiladennu lataa Isa ma teme
Matiyu 11.1-19
18Makolikɛba Yaya kɔbiladennu ka taa wo bɛ ɲafɔ a yɛ. 19Wo kɛ, a ka ai lɔ mɔɔ fila kili k'ai lataa mɔ Kuntii ma, ko ai y'a maɲininga, ko: «Jalasa ile le wo tii le min ka kan ka na, niwotɛ m'i mɔɔ gbɛlɛ makɔnɔ?»
20Mɔɔ fila wolu senin Isa ma, ai k'a maɲininga, ai vɛɛ: «Makolikɛba Yaya le na mɔ lanala i ma. A vɛɛ ko m'i maɲininga, ko: ‹Jalasa ile le wo tii le min ka kan ka na, niwotɛ m'i mɔɔ gbɛlɛ makɔnɔ?› » 21Wo waate kelen nɔ, Isa ka mɔɔ siyama lakɛnɛya k'ai bɔ aiya jangalolu ni aiya tɔlɔyalu lɔ, ka jinajuulu gbɛn k'ai bɔ mɔɔlu lɔ, ani ka ɲagbɛ siyama ɲa laka. 22Wo lɔ, Isa ka keladen wolu javi, a vɛɛ: «Ài na min yena, ani ài na min mɛnna, ài yi taa wo fɔ Yaya yɛ: Ɲagbɛlu ɲa la vɛ ka, namalanilu vɛ taama kobɛn, kunatɔlu la vɛ sɛnɛya, tologbɛlɛnnu tolo la vɛ ka, fulenilu la vɛ wuli ka bɔ saya lɔ, ani Samakan Kein la vɛ se fandannilu ma. 23Ni mɔɔ mɔɔ kunnɔ ma tɛɛ ka bɛn m̀ ma, duwawuden ne wo tii le.»
24Yaya ya keladennu ka bɔ je mingɛ, Isa ka kuma damina jama yɛ ka bɛn Yaya ma, a vɛɛ: «Ài na taala ka mindɛ ye fuwa lɔ? Ài na kaa le yena, fɔɲɛ yi min lamaamaala? Wo tɛ dɛ! 25Ài na taala ka mindɛ ye wo lɔ? Faani kein tii? Mɔɔ minu yi faani keinnu bilala ai kanna, k'ai sii banaya lɔ, wolu yi yena masakɛlu ya bonnu le la. 26Ài na taala ka mindɛ ye wo lɔ? Jalasa ài ma taa ka kela dɔ ye? Ǹ'a fɔ ài yɛ, kela le a le. A do buɲanin kela le feu! 27Yaya ya ko sɛvɛnin kitabu kɔnɔ, ko:
‹Ǹe Ala vɛɛ ǹ kɛtɔ ǹa keladen lataala i ɲa, min kɛtɔ siya lɔbɛnna i yɛ.›
28Ǹ'a fɔ ài yɛ, mɔɔ tɛ mosolu ya densɔlɔnnin nɔ min buɲanin ka timin Yaya la. Wo bɛ n'a kɛ, hali mɔɔ bɛ lɔ dɔɔmandani min fɛ yi Ala ya masaya la, wo tii buɲanin vɛ Yaya le.»
29 #
Matiyu 21.32; Luka 3.12. (Mɔɔ minu bɛ tɛɛ je, niisɔɔnminabalu bɛlɛbɛlɛ, wolu ka kuma wo mɛn k'a fɔ ko jo yi Ala fɛ, kamasɔlɔn ai ka diɲa ai makoko ma Yaya bolo. 30Kɛɛ do, Falisilu ni seliya kalanmɔɔlu k'i ban Ala ya kolatɛɛnin ma ka bɛn ai ma, kamasɔlɔn ai k'i ban ai makoko ma Yaya bolo.)
31Isa ka to kumala, a vɛɛ: «Ǹ'i bi mɔɔlu la jene ma? Ai kɛnin di? 32Ai bɔnin dennilu la minu siinin ɲanatɛɛla bala lɔ, ai v'a fɔla i ɲɔɔ yɛ, ai vɛɛ:
‹Mɔ na tolon kɛla ài yɛ ka fule fɔ,
kɛɛ ài do ma dɔn kɛ.
Mɔ na saya dɔɔni lala ài yɛ,
ài do ma kasi.›
33Kamasɔlɔn Makolikɛba Yaya ka na mingɛ, a tɛɛ tɛ bulu dɔnna, a tɛɛ tɛ gbɛ minna. Wo le n'a kɛla, ài y'a fɔla ko jinatɔ le a le. 34Mɔɔnivin Tanin fana vɛ na. Ale do yi dɔnni kɛla k'i min. Wo le y'a kɛla, ài y'a fɔla ko nooma ni gbɛtɔ le a le. Ko a yi niisɔɔnminabalu ni julumbutɔlu le kɛla a tɔva le. 35Wo bɛ n'a kɛ, mɔɔ min yi taamana Ala ya hangilimaya lɔ, wo tii kɛkolu bɛ kɛtɔ a jiyala ko a yi siya bɛlɛ le kɔkan.»
Isa ka moso julumbutɔ makoto teme
36Falisi kɛ́ dɔ ka Isa kili ko a yi taa a fɛlɔ dɔnnikɛya lɔ. Isa do ka taa aa bon na k'i sii ka dɔnni damina. 37#Matiyu 26.7; Malɛkɛ 14.3; Yohana 12.3.Wo k'a talan moso dɔ tɛɛ so wo kɔnɔ, min tɛɛ julumbutɔ le. Wo k'a mɛn mingɛ ko Isa yi dɔnnikɛya lɔ Falisi kɛ́ ya bon na, a ka na baabɔlɔn ne, min ladannin kawa kein ne. A lafanin tɛɛ tulu sumadiyanin daagbɛlɛn na. 38A v'i madonna Isa la a kɔma, k'i lɔ a sen fɛ, a vɛ kasila ka Isa sennu maɲiin a ɲaji le. Wo kɛ, a k'a sennu matɛ a kunsi la, ka ban k'ai masumu, ani k'ai mamun tulu sumadiyanin ne.
39Falisi kɛ́ min ka Isa kili je, wo ka wo ye k'a fɔ a kɔnɔ, a vɛɛ: «Ni kɛ́ min tɛɛ kɛ kela bɛlɛbɛlɛ le, a tɛɛ moso min suu lɔnne min y'a bolo tuula a la yi ne, kamasɔlɔn julumbutɔ le.»
40Wo lɔ, Isa vɛɛ a yɛ: «Simɔn, ǹ'a fɛ ǹ'i kuma dɔ fɔ i yɛ.»
Simɔn k'a javi, a vɛɛ: «Kalanmɔɔ, a fɔ.»
41Isa vɛɛ: «Kɛ́ dɔ ya julu tɛɛ mɔɔ fila la. A kelen ta bɛnnin tɛɛ wɔligbɛ gbana kɛmɛ loolu (500) le ma. A tɔ kelen ta bɛnnin tɛɛ wɔligbɛ gbana biloolu (50) le ma. 42Wɔlitii k'a ye mingɛ ko ai mɔɔ fila tɛ se aa jululu salala, a k'ai lɔkoto. A yi di? Ai mɔɔ fila lɔ, jene kɛtɔ kɛ́ wo kanula bɛlɛbɛlɛ kɛ?»
43Simɔn k'a javi, a vɛɛ: «M̀ miliya lɔ, aa julu walanin tɛɛ min na.»
Isa vɛɛ a yɛ: «I tuɲa.»
44Wo fɔ Isa bolo, a k'i kɔdon k'i ɲa kaa moso lɔ. A do vɛɛ Simɔn yɛ: «I ma moso min ye? Ǹ na donna iya bon na mingɛ, i ma ji di m̀ ma ko ǹ'i ǹ sen mako. A do na ǹ sennu maɲiinna a ɲaji le, k'ai matɛ a kunsi le. 45Ile ma ǹ sumu ǹ tama lɔ foli boloma, kɛɛ ka ta ǹ don ma jan, ale ma ǹ sennu masumu boloka. 46I ma tulu kɛ ǹ kun nɔ, kɛɛ a do na tulu sumadiyanin munna ǹ sennu ma. 47Wo lɔ saa, ǹ'a fɔ i yɛ, moso min ya julumbu siyama bɛ lɔ vɛ koto ka bɛn aa kanundeya wala jate ma. Kɛɛ do, ni a dɔni lɔ ka koto mɔɔ min yɛ, wo tii ya kanundeya dɔɔyatɔle fana.»
48Wo kɔ, Isa vɛɛ moso yɛ: «Iya julumbulu lɔ vɛ koto.»
49Mɔɔ minu tɛɛ dɔnnila Isa fɛ je, ai v'a fɔla i ɲɔɔ yɛ, ai vɛɛ: «Mɔɔ suu mindɛ le min ne, min yi mɔɔlu ya julumbulu lɔkotola?»
50Ado Isa vɛɛ moso yɛ: «Iya limaniya v'i lakisi. Taa hɛlɛ lɔ.»
Currently Selected:
Luka 7: MBT2023
Highlight
Share
Copy
Want to have your highlights saved across all your devices? Sign up or sign in
Manya Bible Translation, © SIM International, 2023
