Johannes 13
13
Dit 13. Capitel.
1Voar dit Poaskfääst, üs Jesus wust, dat sin Tid kjemmen wiär, dat hi üt dös Warld tö di Vader gung skuld, alliksa üs hi sin Einen hed lew hed, sa behöld hi jam lew bet tö sin Jend.
2En eter di Någdert, diär di Düwel et Judas, Simons Seen, Iskariot al ön-t Hart iwen hed, dat hi höm forrat,
3Wust Jesus, dat di Vader höm Alles ön sin Hunden iwen hed, en dat hi van Gott kjemmen wiär, en tö Gott ging.
4Stönd hi van di Indjsmiäl âp, leid sin Kloader of, en noom en Skort, en boand en om sik.
5Diärna goat hi Weter ön en Bak, en begent di Lirlings jår Fet tö tauin, en drügget-s of me di lennen Skort, diär hi ombünden hed.
6Diär kâm hi tö Simon Petrus; en disallew sprok tö höm: Herr! skudt dü mi di Fet taue?
7Jesus swåret en sprok tö höm: Wat ik dö, dit weest dü nü ek; dü skedt et eterst erfår.
8Diär sprok Petrus tö höm: Oldermoar skedt dü mi di Fet taue. Jesus swåret höm: Wan ik di ek taue, da heest dü niin Dil ön mi.
9Petrus said tö höm: Herr! ekalining di Fet, mar uk di Hunden en di Haud.
10Jesus swåret höm: Hokken tauet es, di heed nöndt üders nödig, üs di Fet tö tauin; for hi es hilental rīn. En I sen rīn, mar ek altermål.
11For hi wust nog, hokken sin Forräder ud wild; diärom said hi: I sen ek altermål rīn.
12Diär hi nü jår Fet tauet hed, noom hi sin Kloader, en säät sik weder diäl, en said jit jen Lop: Weet I, wat ik ju dön hå?
13I nääm mi Meister en Herr, en diärön si I rogt, for ik sen dit uk.
14Wan nü ik, ju Herr en Meister, ju di Fet tauet hå; sa skel I uk ju önderarküder di Fet taue.
15En Voarbild hå ik ju iwen, omdat I dö, alliküs ik bi ju dön ha.
16Forwår, forwår, ik si ju: Di Knegt es ek gurter üs sin Herr; nog es en Apostel gurter üs di, diär höm stjürt heed.
17Wan I sok Dingen weet, selig sen I, wan I dit dö.
18Ik si dit ek van ju al. Ik weet, welk ik ütkwoart ha. Mar dit ske, omdat di Skreft tö folling komt: Di diär min Broad et, trat mi me sin Fet.
19Nü si ik dit ju, jer dat et ske, omdat, wan-t sken es, dat I liiw, dat ik et sen.
20Forwår, forwår, ik si ju: Hokken di apnemt, wan ik Jen stjür, di nemt mi âp; en hokken mi apnemt, di nemt höm âp, diär mi stjürt heed.
21Diär Jesus dit said hed, wåd hi bedrüwwet ön sin Geist; en tjügt en said: Wårelk, wårelk, ik si ju: Jen van ju wel mi forreed.
22Da lukket di Lirlings arküder ön, en ja twiwelt, van hokken hi sprok.
23En diär wiär jen mung sin Lirlings, diär tö Stål seet, en sik lennet ön Jesus sin Brest, welk hi lew hed.
24Simon Petrus winket höm, dat hi-t ütforske skuld, hokken dit dag wiär, van welk hi dit said.
25For disallew boog sik aur tö Jesus sin Brest, en said tö höm: Hokken es dit?
26Jesus swåret: Hat es di, foar welk ik di Beet iindüppe, en di höm iiw. En hi düppet di Beet iin, en jåw di Iudas, Simons Seen, Iskariot.
27En nå di Beet foar di Satan ön höm. Diär sprok Jesus tö höm: Wat dü dädst, dit död bald.
28Mar Nemmen van danen, diär tö Stål seet, wust, hurtö hi höm dit said.
29Sommen ment, wīl Judas di Pung heed, dat Jesus sprok tö höm: Kope, wat wü nödig ha tö dit Fääst; of, dat hi ön di Armen wat jåw.
30Üs hi nü di Beet nommen hed, ging hi bald üt. En hat wiär Nagt.
31En diär hi ütgingen wiär, sprok Jesus: Nü es di Menskenseen forklåret, en Gott es forklåret ön höm.
32Es Gott forklåret ön höm, da wel Gott höm uk forklåre ön höm sallew, en wel höm bald forklåre.
33Lew Biärner, ik sen jit en litj Skür bi ju. I skel mi sjuk, en üs ik tö di Juden said, hur ik hengung, diär kjen I ek henkom.
34En nü si ik ju: En ni Gebot iiw ik ju, dat I ju önder arküder lew ha, alliküs ik ju hå lew hed, om dat I uk arküder lew hå.
35Diärbi wel Arkjen kään, dat I min Lirlings sen, wan I Leewde tö arküder hå.
36Simon Petrus said tö höm: Herr! hur geist dü hen? Jesus swåret höm: Hur ik hengung, kjenst dü mi döt mål ek fölge; mar dü wedt mi ederst fölge.
37Petrus sprok tö höm: Herr! Hurom kjen ik di döt mal ek fölge? Ik wel min Lewent foar di let.
38Jesus swåret höm: Skudt dü din Lewent foar mi let? Wårelk, wårelk, ik si di: Di Hoân wel ek krä, bet dü mi tri mol benånet heest.
Currently Selected:
Johannes 13: NFNT
Highlight
Share
Copy
Want to have your highlights saved across all your devices? Sign up or sign in
Translated by Peter Michael Clemens (1804-1870)
