San Marcos 8

Jesús la smac'lin lajunbahc' (4,000) ta tuhl

1Ta hich ora, te bin ut'il ay tsobolic soc mayuc bin ya swe'ic, te Jesús la yic' tal te jnopojeletic yu'un, hich la yalbe: 2Ya jna'be yo'bolil sba te ants-winiquetic como yoxebalix c'ahc'al a te sjoquinejonic soc mayuc bin ya swe'ic. 3Teme ma ba we'emic te ya jticon bahel ta snahic, ya xlaj yipic ta be, como ay namal talemic, xchi.

4Hich la sjaq'uic te jnopojeletic yu'un: ¿Ban c'an jtahtic pan li' ta jochol q'uinal te tic' ya xwe'ic a? xchihic.

5Joc'obotic yu'un te Jesús: ¿Jaypehch pan awich'ojic? xchi.

Hucpehch, xchihic.

6Ha yu'un te Jesús la spas ta mandar te yacuc shuhcan sbahic ta lum, la stsac te hucpehch pan, la yalbe wocol Dios yu'un, la xet'ticlan soc la yac'ticlambe te jnopojeletic yu'une, yu'un ya spucticlanic ta stojolic; hich la spucticlambeyic te ipal ants-winiquetique. 7Soc ay cha'oxcoht bic'tal chay yich'ojic. Te Jesús la ya'be bendición soc ha nix hich la yac' ta puhquel. 8Hich we'ic soc noj sch'uhtic; soc la stsobic te xeht'elul te hile, noj huqueb moch yu'un. 9Ay wan lajunbahc' (4,000) ta tuhl te mach'atic we'ique; hich la sticonlan bahel. 10Patil och ta barco soc te jnopojeletic yu'un, c'oht ta sq'uinal Dalmanuta.

La sc'an yilic seña

11Ay fariseohetic tal stijic ta c'op te Jesús, la sc'an yilic seña ta ch'ulchan, yu'un c'an stsajic a. 12Te Jesús la sjac' yo'tan yu'un, hich la yal: ¿Bin yu'un ya sc'an ya yilic seña te jcaj ts'umbalil ini? Jamal ya calbeyex, mayuc seña ya x'a'bot yilic te jcaj ts'umbalil ini, xchi. 13Hich la yihquitay hilel, cha'och ta barco, sohl bahel ta jehch ha'.

Te levadura yu'un te fariseohetic

14Te jnopojeletic ma ba la sna' la yich'ic bahel pan, jpehch nax yich'ojic ta barco.

15Ila me abahic, xchi te Jesús, canantaya abahic yu'un te levadura yu'un te fariseohetic soc te levadura yu'un te Herodes, xchi sc'oblalic.

16Talel c'axel hich la yalbe sbahic: Ha yu'un te mayuc pan la jquich'tic tal, xchihic yu'un.

17Na'bot yo'tanic yu'un te Jesús, hich la yalbe: ¿Bin yu'un yac atij abahic ta c'op yu'un te mayuc pan awich'ojic tale? ¿Yu'un bal ma xana'ic, yu'un bal ma ba c'ohem ta awo'tanic? ¿Yu'un bal tonoben to awo'tanic? 18Ay asitic pero ¿ma bal yacuc awilic q'uinal a? soc ay achiquinic pero ¿ma bal yacuc awa'iyic c'op a? ¿Yu'un bal ma xtal ta awo'tanic? 19Te c'alal la jxeht' te ho'pehch pan ta yohlil te lajunwinic yoxlajunbahc' (5,000) ta tuhl, ¿jayeb moch noj a te xeht'elul pan la atsobique? xchi.

Lahchayeb (12), xchihic.

20Haxan te hucpehch pan ta yohlil te lajunbahc' (4,000) ta tuhl, ¿jayeb moch noj a te xeht'elul pan la atsobic? xchi.

Huqueb, xchihic.

21¿Bin yu'unix a hiche te ma to xana'beyic scuentahil? xchi sc'oblalic.

Jtuhl ts'o'sit ta Betsaida

22C'ohtic ta Betsaida, la yiq'uic tal jtuhl ts'o'sit, la yalbeyic wocol te Jesús te yacuc spicbe. 23Te Jesús la snit bahel ta sc'ab te ts'o'sit, la yic' loq'uel ta ti'pueblo; la stuhbataybe sit, la scajambe sc'ab ta sba soc la spicbe sit, la sjoc'obe ya'iy teme ay bin ya yile. 24La shach sit, hich la yal: Ya quil winiquetic te hich yilel bin ut'il te'etic te yaquic ta behele, xchi. 25La scha'picbe xan te sit soc la ya'be yil q'uinal; hich lecub te site, namal soc jamal chican la yil spisil. 26Te Jesús la sticon ta sna, hich la yalbe: Ma me x'ochat ta tut pueblo, soc ma me ayuc bin yac awalbe te mach'atic tey ayic a,#8.26 Ay antiguo hunetic te ma ba ya yal: soc ma me ayuc... tey ayic a xchi sc'oblal.

Jamal la yal Pedro te ha Cristo te Jesús

27Te Jesús soc te jnopojeletic yu'un bahtic ta tut pueblohetic ta sq'uinal Cesarea yu'un Filipo. Yacalic ta behel a hich la sjoc'obe te jnopojeletic yu'une: ¿Mach'a ya scuyonic a te ants-winiquetique? xchi.

28La sjaq'uic: Ay ya scuyat ta Juan te J'ac'-ich'-ha'; ay yantic ya scuyat ta Elías; soc ay yantic ya scuyat ta jtuhl jalwanej, xchihic.

29Haxan te ha'exe, ¿mach'ahon yac awalic a? xchi te Jesús.

La sjac' te Pedro: Ha'at te Cristohat, xchi.

30Pero pasotic ta mandar yu'un Jesús te ma me ayuc mach'a ya yalbeyic ya'iy.

Jesús la yal te ya xlaj ta milel

31Te Jesús hahch snohptes te jnopojeletic yu'un te ya sc'an ya xc'ax bayel swocol te Nich'anil ay ta scuenta winic, soc te ya xp'ajot yu'un te mamaletic, te principal sacerdotehetic soc te escribanohetic, ya xlaj ta milel soc ya xcha'cuxaj tal ta yoxebal c'ahc'al. 32Hich la yalbe ya'iyic ta jamal. Ha yu'un te Pedro la yic' bahel ta jechc'al soc hahch scom. 33Pero te Jesús la sut sba soc la yil te yantic jnopojeletic, la scom ta c'op te Pedro, hich la yal: ¡Loc'an ta jtojol, Satanás! Como mayuc ta awo'tan te bintic scuenta Dios, ha nax te bintic scuenta winiquetic, la yut.

34Te Jesús la yic' tal te ants-winiquetic soc te jnopojeletic yu'une, hich la yalbe ya'iyic: Teme ay mach'a ya sc'an ya st'unon, ac'a sloq'ues sba ta yo'tan, ac'a scuch te cruz yu'un soc ac'a st'unon. 35Como te mach'a ya sc'an ya scanantay te scuxlejal, ya me sch'ay yu'un; yan te mach'a ya sch'ay scuxlejal ta jcuenta soc ta scuenta te lec yach'il c'op, ya me xcol yu'un. 36Como ¿bin ya sta a te mach'a ya yu'untay spisil bintic ay ta bahlumilal, teme ch'ayel ya xbaht te sch'uhlele? 37¿Bin ya xhu' ya yac' a te sch'uhlel te winique? 38Teme ay mach'a ya xq'uexaw ta jcuenta soc ta scuenta te jc'op ta yohlil te jcaj ts'umbalil ini te ha j'antsiwejetic soc jmulawiletic, ha nix hich te Nich'anil ay ta scuenta winic ya me xq'uexaw yu'un te c'alal ya xtal soc yutsilal te Stat soc te ch'ul a'batetique, xchi.

Currently Selected:

San Marcos 8: TZH

Highlight

Copy