Sakariyas 10
10
Yawi Kafanyu tuwa Taw Uda ay Taw Israel
1Gina ay ngay tanum gfantugbungan, eti moyan sas Yawi teway kanya at naawat ngay linyabu. Ay kanya tagfamoyan sa sangay taw ay anggan sa sangay tanuman sa sangaba talun.
2At matuyan, wa mafanud ka fag ngay fagsegan ay anggan ka fag ngay tagfatuganan. Kanya gsalan way nu gfe masuwad ngay taginfanan. Ay we fanambagun nu gfabitsug ngay taw at amatanganan. Katanya taw Israel fagnasaruwayanun kata sik ngay tupa, ay gatakan teway we gmagurang.
3Yawi nalong te, “Mason nu kadotama aw sa sangay tagmagurang ku ngay taw. Nanfauri kwa fiya anya. Aw wan tagfatvngvdun ku taw Uda kata nu gfatvngvdun aw ku ngay tupa. Kanya nanfakata aw sik ngay kabayu tagbabo sas fagbarangyanan. 4Siginan ban taw Uda at ngay tagmagurang katvngvd tagsisad suluk fag ngay batu, ay sik turuk bale, ay sik famabarangyan fag busuy. 5Ay taw Uda umke fagmasadiun ay umkata sik mabitsug fag ngay sundalu ay mabo at ngay fabarangyan anggan wa mansiyadan kata sik lifak sa sangaba dalan. Ka fag ngay taw mafafabarangyan anway gufud aw anya, ay mabo wa fiya at ngay tagkabayuwan.
6“Nanfabitsug aw taw Uda ay nanfalangfe aw taw Israel. Ay fafoli aw sa at ngay talun teway kafanyu aw anya. Anway aw wan Yawi, ay aw wan at Diyus, at malus at ngay darangin teway katsi dakdi kalimata anya kata ebi. 7Ay taw Israel umkata sik mabitsug fag ngay sundalu. Ay guseganan kata nainum fangaranug. Ay at ngay fufu mamatang ban at nababoan ay guseganan sa ku nafagbulun. 8Gumewan aw ay nanfaful aw ku ngay taw. Ay nanfalfas aw anya ay umkayu yangay ban fiya kata ebi. 9Ay dewa aw nafasaruwayan ku ngay taw sa tibak talun, kanya gamatang tuwa gugat angku. Ay gleleg tuwa anggan at ngay unga, ay umfoli yangay ban sa at ngay fulan. 10Ay nanfauli aw anya siginans talun Iptu ay talun Asirya, ay nanfabanwan aw anya sas fulan Gilyad ay talun Lebanun anggan wa umkapnu. 11Ay kanya dumife sat malumbak fag dagat ay roro umtuwas tuwa nu glumbak. Ay anggan Safa Nilu umlanggang wan. Ay talun Asirya at fagfalabiun umbaba wan ay talun Iptu at fagmadaragangun malyam wan. 12Ay nanfabitsug aw ku ngay taw teway kanya ku ngay taw wan, ay maning tuwa angku. Aw wan Yawi tagelongan.”
Currently Selected:
Sakariyas 10: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines