Sakariyas 11
11
Diyus at Faurianan sas Talun Lebanun ay Fulan Basan
1Am fag ngay taw Lebanun, luwangi ay ngay sakbawan fulan laman afuy matas ay anggan ay ngay kayu sidru. 2Nus nga setaw sik ngay kayu sidru nu kayango dewa masine ay marabung, katanya yangay at ngay kayu sipris ay ensina sas fulan Basan. 3Ay ngay tagtanud tupa manguywayan teway inyango wan at marabung fag fagfasabsaban at ngay balan. Ay anggan ngay liyun mangunian teway nyango wan at fagbanwanan fag magubat sas Urdan.
Duwak Tagtanud Tupa
4Katatuy Yawi, ku Diyus, at longan:
“Faguti tuwa at fagfateun fag ngay tupa.#11:4 tupa: at masuwad te, taw Israel. 5At ngay tagbili ay at ngay tagfate ka fag ngay tupa wa nafaurianan. Ay at ngay tagfabili ka fag ngay tupa lumong te, ‘Segi Yawi! Mabalan akwan!’ Anggan at ngay tagtanud wa nfanyu at ngay tupa.
6“Aw wan Yawi, glong aw te, kwa ban kafanyu at ngay taw sas fagdaul daga. Ay ka fag ngay taw nanfaagbilug aw sat iba ay anggan sat fun. Kanya wan at tagfadasug faurianan sas fagdaul daga, ay dakwa gfalangfe.”
7Nu katanya, nafagut aw fagfateun fag ngay tupa laman sa sangay tagfesali tupa. Ay nabul aw duwak suwan; at sadi fangayan aw te, Fagmasineun, ay at sadi fangayan aw te, Fagmasadiun.
8Ay tuluk tagtanud tupa naayan kwan sik magdanun way. Kwa mabaris ay kanya sigon kadotama way angku. 9Ay nalong aw sa sangay tupa te, “Bunwa aw ay tagtanud. Fabayani wa nu kate tagakateun ay takafauri nu kafaurianan. Ay fagayu at sawad fabayani wa nu kodkonan at sadi faknul.”
10Ay nabul aw ka fag suwan at ke ngayan Fagmasineun ay nafud kwan sik famasaful te, Yawi wa nafe masuwad at fatuyanan sa sangay taw. 11Ay ginanya fag menit, wa nafe masuwad at fatuyanan. Ay at ngay tagfesali tupa nu gulit angku nasaful te, si ku ngay nafagbulun Yawi e fagalongunun. 12Ay nalong aw sa ka fag ngay taw te, “Nu gamatang am nu masine tuwa gsali ku nafagbulunan, foni angku at fansali ku nafagbulunan. Ay roro nu dway e fansali, ayu wan ay fansali.” Nu katanya, nafon angku 30k pilak at fansali sa ku nafagbulunan. 13Ay Yawi nalong angku te, “Suwadi ka fag pilak sas fagsuwadan singku sa ku bale.” Nu katanya, nabul aw ka fag 30k pilak, (at ngay taw ayupan kayunya at fansali sa ku nafagbulunan,) ay nasuwad aw sas Yawi bale sas fagsuwadan singku. 14Ay nafud aw at faduwak suwan at ke ngayan te Fagmasadiun, sik famasaful te, katsi taw Uda ay taw Israel we fagmasadiun.
15Ay Yawi gdog yay fiya nalong angku te, “Nanfalukanan o kata sik yud mafanud fag tagtanud tupa. 16Teway e faganansuguun aw sik tagmagurang sas talun Israel, ay kanya kata sik yud mafanud fag tagtanud. Ay ka fag tagtanud wa nantarabang dewa at ngay tupa gakateun, ay wa nansarap at nalyam, ay wa nanganu#11:16 nanganu: ay ate, nan-gamut. at ke famaga, ay wa gfafangon at ngay maniwang. Ay roro kon wadi at mataba fag ngay tupa at karni ay anggan at ngay sumyu. 17Mafanyu at kumdasug sa ka fag yud matuyan fag tagtanud. Nafabayan at ngay tupa! Sik fiso lumifung at take ay tumubuk at siyun fag mata, ay nu katanya, wa long ban e fanambagun at take ay at siyun fag mata.”
Currently Selected:
Sakariyas 11: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines