Sakariyas 12
12
E Famin wa ban Fulan Erusalem at ngay Fabarangyan
1Katatuy Yawi at longan sas talun Israel baliwa, “Aw wan Yawi at naawat banwa ay daga. Ay aw yangay tagfon leleg sas taw. 2Ay fulan Erusalem nanfakata aw sik safa fangaranug, ay kanya ban tagfaranug sa sangay talun at ngay taw tagsafungan anya. Ay nu nanfabarangyan fulan Erusalem, nanfabarangyan yangay anggan tibak fulan sis Uda. 3Ginanya ban fag menit, fulan Erusalem nanfakata aw sik batu mabiyat. Ay nus ngandaginan fag talun at murug ka fag batu mabiyat umke fanlonganan dawdaw. Ay fagayu talun sas fagdaul daga umful laman nanfabarangyan fulan Erusalem. 4Ay roro nanfalimuwanan aw at ngay kabayu ay nanfasuwayanan at ngay tagkabayuwan. Aw wan Yawi, at nalong te, tumanud akwa fiya taw Uda, ay roro nanfe yud aw glag at ngay kabayu tagsiginans tibak talun. 5Ay at ngay tagmagurang sis talun Uda mamatangan te, ‘Matvngvd tuwa at ngay tagbanwan sas fulan Erusalem teway Yawi at Madaragang at Diyus.’
6“Ginanya ban fag menit, at ngay tagmagurang sis talun Uda nanfakata aw sik tagdararungan fag afuy gigang si sik fabugsulan ngay kayu ay ate sik tagdararungan fag salung sis wa nagutan. Ay gfamin wan tibak talun at ngay taw tagsafungan anya. Ay roro taw Erusalem di mfaurianan. 7Taguna ku fagnanfababoun tibak fulan sis Uda, laman Dabid at kadagdagan at kamasinean ay taw Erusalem di lumabi sa tibak fulan sis Uda. 8Ginanya ban fag menit, Yawi tumarabang taw Erusalem laman dewa at mafanalo sanya kamabitsug tuwa Dabid. Ay at kadagdagan kata sik Diyus, ay kata Yawi at tagfabarita tagfangguna anya. 9Ay ginanya ban fag menit, gfamin aw fagayu talun at nanfabarangyan sas fulan Erusalem.
10“Ay mon aw sas Dabid at kadagdagan ay sa sangay taw Erusalem sik tagfangafanyu fag falad ay mafandarangin. Ay kanya lumag angku at nabangko, ay kata sik daduwa nu guyway gina at unga fag sadi inkate ay ate sik unga turungana. 11Ay ginanya ban fag menit, taw Erusalem nu gfanguywayan katvngvd yangay gina Adad-Rimun#12:11 Adad-Rimun: Undain sik fagsegan. sis datag Migidu nu karasras. 12-14Fagayu talanan sas talun Israel manguywayan: Dabid at kadagdagan fag ngay talanan, Natan at kadagdagan fag ngay talanan, Lebi at kadagdagan fag ngay talanan, ay Simi at kadagdagan fag ngay talanan, ay at tibak talanan. Ay sumadsamanan manguywayan at ngay mangama ay at ngay mangena.”
Currently Selected:
Sakariyas 12: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines