Sakariyas 9
9
Yawi Nanfauri at ngay Talun Tagfabarangyan sas Talun Israel
1Yawi glag tuwa fagayu taw, glabi yay Israel fag fulan taw. Nu katanya, Yawi nalong te, “Nanfauri aw fulan Kadrak ay fulan Damasku.
2“Nanfauri akyangay fulan Kamat at makbang Kadrak ay Damasku, anggan fulan Tiru ay fulan Sidun, dewa glabi tiba nu masafulan fag ngay taw tagbanwan sanya. 3Taw Tiru naawat sik ngay alad matvngvd ay nafaful ngayuk pilak ay gintu kata wa nu gfabugsul daga. 4Ay roro mul aw at ngay nanuranan ay mukas aw at ngay fagmabalanun sasad dagat. Ay at fulan matas wan.
5“Ay ngay taw tagbanwan sis fulan Askelun lumag ay umlimu. Ay ngay taw tagbanwan sis fulan Gasa ay fulan Ekrun katvngvdan nu mdaylan gbidbilusun wan anway malyam wa ban at fagsegun. Ay at fun sis Gasa umkate wa ban, ay wa ban e gbanwan sis Askelun. 6Ay sas Asdud nus nga sinu wa fag sugfun taw tagbanwan sanya. Taw Filistiyu at faglabiun sa tibak fulan gfamin akwa ban. 7Ay wa ban kon karni at ke taguk anggan at fagsalagun fag ngay fakonun. Ay at sawad fagayu tumap aw te, ku ngay taw wan, kata sik fulan siginans talun Uda. Ay anggan taw Ekrun tumap akyangay te, ku ngay taw, kata taw Yebus. 8Nanfatvngvdun aw ku bale siginan at ngay fabarangyan. Ay we nandog nanfauri ku ngay taw teway gulit kway anya.”
Fulan Erusalem at Fun Takadasug
9Yawi nalong te, “Am tagbanwan sis Siyun, at masuwad te, fulan Erusalem,#9:9 tagbanwan sis Siyun, at masuwad te, fulan Erusalem: Sis Fangebriyu, Siyun at unga fag mangena ... Erusalem at unga fag mangena. fangurowani ay useganani wa fiya teway ay fun kadasug wan. Kanya matuyan tuwa ay madaragang. Gsaful tuwa gfababaun, ay nu kadasug gsakay si sik asnu lawis. 10Ay gfatuwas kwa ban nu gbarangyan sis Israel ay sis Uda;#9:10 Israel ay Uda: Sis Fangebriyu, Efraim ay Erusalem: Efraim, at masuwad, fagdaul talun Israel at fagmagurangan ay Erusalem fagdaul talun Uda at fagmagurangan. mul at ngay famabarangyan fag ngay karwai ay at ngay kabayu. Ay at famabarangyan fag ngay busuy lumifung akwan. Takadasug fag fun nanfanabayan sa sangay talun. Ay kanya nanmagurang ban siginan sik dagat anggan sa sadi yak dagat, ay siginans Safa Iyupratis ay anggan sas fungfung daga.”
Yawi Tagfalfas at Kintaban fag ngay Taw Israel
11Yawi nalong sa sangay taw Israel te, “Fafoli aw at ngay kintaban ebi. Kanya kata sik ngay taw at nafatong sasad tabyu yud e safa. Fafoli aw ka fag ngay taw teway ebi nafatuyanan aw sa ayu ay nafatvngvd sa sik taguk ay ngay naanyun fag ngay balan. 12Am at ngay kintaban at ke fagsegun at malfas, afolii wa sa ay ngay talun nus nganday at yud e gsalag ayu. Ay katsi glong aw ayu te, at nalyam si ayu fafoli aw sa ayu at kayuwan duwa ginan. 13Ay taw Uda gfakata aw sik busuy ay taw Israel gfakata aw sik bangko. Ay tagsis Siyun fag ngay taw gfakata aw sik sundalu at fiso, ay nanfamin at ngay taw Gresiya.”
Yawi Tumarabang Taw Israel
14Ay Yawi nangasure sis tungud at ngay taw fagngayuwan. Ay at busuy gdamlag ayu daw kata sik fangkilat. Ay Fun Yawi muyup at fagbudyungan, ay umdasug gasfuwan sik bagyu siginans siyun baliwa fag tigyangan. 15Ay Yawi at Madaragang nanfatvngvdun tuwa at ngay taw. Ay at ngay fabarangyan famalang fag ngay batu mansiyadan way. Ay ka fag ngay taw nanfangon ay nanginum guseganan sat nababoan. Ay manguroan kata sik ngay takaranug. Ay nu mapsugan siginan at nainum kata sik taya at mapnu taguk fanramsig sa sangay suluk fagyagoan. 16-17Ginanya fag menit, Yawi, Israel at Diyus, nanfalangfe tuwa anya fagayu kata at ngay tupa. Ay masine nu kalag sit talun. At kamasinean katvngvd sik batu mafanud tagadganyangan sit sangbo. Ay ngayu ban at ngay wat ubas ay tiba yak fananumun tagfabitsug sat ngay baguwama.
Currently Selected:
Sakariyas 9: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines