Sakariyas 8
8
Diyus at Fatuyanan te, “Mamanyun ban Aw Taw Erusalem”
1-2Yawi at Madaragang nalong yay fiya sas Sakariyas te, “Kesug aw taw Siyun. Katvngvdan nu kesug aw, mason nu kadotama aw at ngay fabarangyan. 3Umfoli kyay sas Siyun, at masuwad te, fulan Erusalem, ay nanbanwan aw sanya. Ay Erusalem gfangayan ban aw te, ‘Matuyan fag Fulan’ ay ku muyud gfangayan ban aw te, ‘Mafilian fag Muyud.’ 4Ay at ngay fufuwama tagsuwanan katvngvdan nu kagurang gdog yay umlunggung sas fulan Erusalem at ngay faglanuwan. 5Ay at ngay sisiyan tagawyan umkapnu sa sangay faglanuwan.”
6Ay Yawi at Madaragang nalong yangay te, “Ku ngay taw at kinsawad mamatangan te, mayon wa long nu mgurungan katanya, ay roro we mayon sa angku. 7Nanfalangfe aw ku ngay taw at kintaban sa sangay talun sas fakamenitan ay sas fakayabian. 8Fafoli aw ka fag ngay taw sas fulan Erusalem ay gfabanwan sanya. Ay fangayan kyay te, ku ngay taw, ay aw wan at matuyan ay at kasakan fag Diyus.”
9Ay Yawi at Madaragang nalong yay fiya te, “Ka fag ngay foyungan ebi fag ngay taglong nafoyung wan gina gdog kawat ku bale at fagmatungkudan. Ay katsi nadungug yay am fiya. Fatvngvdi ay amatanganan laman gfafatabu tuwam nu kawat am ku bale. 10Ebi gina gyud gfasigad kawat ku bale, we fansali sa sangay taw ay sat ngay balan nafagbulunan, ay nus nganday malimu wan, anway nafabarangyanan aw sanya at ngay taw. 11Ay roro katsi, aw wan, Yawi at Madaragang, nalong te, dakwa ban gdog gfagbulun katanya sa ayu at kinsawad. 12Mabayan am gfantanuman. Ay ay ngay tanum wat ubas umke buwadan, ay e kabul tuwa siginan ay gamasun, ay umke damug yangay. Kanya fagayu mon kwa sa ayu at kinsawad. 13Am fag ngay taw Uda ay taw Israel, dewa tibak talun gfalingun ayu, aw, gfalangfe aktuwa ayu. Ay am wa ban tagfadasug ku fanarabangun sa ka fag ngay taw. Nu katanya, dangay am kalimu; fatvngvdi tuwa ay amatanganan.”
14Ay Yawi at Madaragang nalong yay fiya te, “Ebi gina ay ngay aguyangan nafalimatan angku, nafasadanan kwa nanfauri ayu ay dakwa kafanyu. 15Ay roro katsi gdog kyangay nangafanyu fulan Erusalem ay talun Uda. Nu katanya, dangay am kalimu. 16Katatuyi ay fagbulun: Longi tuwa at matuyan sa ay ngay iba. Ay sa ay fagfasinean fanlonganan fagbuluni tuwa at masine ay at matuyan laman fagayu manabayan. 17Lag am e fasadanan mauri sa ay ngay iba, ay lag am gfatvngvd nu gelongan am kamuwagan, anway takatanya fagayu kalimata akway.”
18-19Ay Yawi at Madaragang nalong yangay fiya sas Sakariyas te, “Nu gdarangin am at yud gfangon sis faufat, ay falima, ay fafitu, ay fasafuluk magdanun, kanya sik mauseganan fag lungud sa sangay taw Uda. Nu katanya, fefanambaguni tuwa fagmatuyanun ay fagmanabayanun. 20Ngayuk taw at kumdasug sas fulan Erusalem siginan tibak fulan. 21At ngay taw siginan sik fulan lumo sa sik fulan ay lumong te, ‘Glo wami laman nandarangin ay nanseg ami sas Yawi at Madaragang. Ay am sigon aloi wa emi!’
22“Ngayu ban fag taw siginan at madaragang fag ngay talun at lumo sas fulan Erusalem laman nandarangin ay nanseg sa angku. 23Ginanya fag menit, safuluk taw tagsiginans tibak talun at yud kata at sadi at fanlong umkakbang sa sadik taw Uda ay lumong te, ‘Kaumsig ami nangalo ayu, teway nadungug ami te, Diyus tagufud tuwa ayu.’ ”
Currently Selected:
Sakariyas 8: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines