Sakariyas 7
7
Fagbuluni sat Masine ay sat Matuyan
1Ebi sis faufat menit, Kisleb fag magdanun (fasiyamk magdanun), sis faufat banwa Daryus nu gmagurang, Yawi naelongan sas Sakariyas. 2-3Nu nalong ebi gina taw Betel nasugu Sareser, ay Regem-Melek, ay anggan at ngay kaiban te, “Longi sa sangay taganyun sas Yawi bale ay anggan sa sangay taglong te, ‘Intoi sas Yawi te, go nangamatangan yay ami em ngay asalanan ay nanfe lungud ami gyud gfangon laman gdarangin sis falimak magdanun laman nangamatangan Yawi bale naarasrasan, kata ebi ginan fag ngay banwa em nafagbulun.’ ” 4Ay katatuy Yawi at Madaragang at longan sas Sakariyas te, 5“Longi sas fagayu taw Israel anggan sa sangay taganyun te, ‘Nu nangabalu am ay nanfe lungud gyud gfangon laman gdarangin kayu falima ay fafituk magdanun sis fa-70k banwa nu si aba wam nafagbulun sa angku. 6Ay nu gfangon am ay ginum, ay fagfausegananun ayu way mandi.’ ” 7Katanya yangay ku longan ebi sa sangay taglong, gina fulan Erusalem e fagekwaun ay gina ngayu at ngay taw sat ngaba dayu fag ngay fulan, anggan sas Nigib ay sas tagbudbugsulanun fag lungud talun sas fakayabian.#7:7 tagbudbugsulanun fag lungud talun sas fakayabian: Sis Fangebriyu, Sefela.
8-9Ay Yawi nalong yangay fiya sas Sakariyas te, “Katatuy ku longan sa ku ngay taw: ‘Am, fagbuluni tuwa sat masine ay sat matuyan sa ay ngay iba. Ay falagi ay fagmasineun ay ay fakafanyuun sa ay ngay iba. 10Dangay am gfalingun at ngay burangday fag mangena, ay at ngay ulila, ay at ngay taw siginan tibak talun, ay anggan at ngay yud e kwa. Dangay am gfasadanan mauri sa ay ngay iba.’
11“Ay roro kanya wa nadungugan ku longan. Ay wa nfalbak ay nafamayud way. 12Nafaning way gugat at fasadan ay wa gafanud ngani sa ku Suguwan siginan ku Falad at nalong ebi sa ku ngay taglong. Nu katanya, Aw Yawi at Madaragang, kadotama aw dawdaw. 13Anway kanya wa nadungugan ku longan, anggan aw kwa gbalus dewa gdarangin. 14Kata aw sik tagmara tagbaribungan nafasaruwayan anya sa sangay talun at yud e nagbatangan. Ay naubun wan at masine at fagbanwanan, ay we natvngvdan ay taba wa te, we gbanwan.”
Currently Selected:
Sakariyas 7: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines