Sakariyas 6
6
Sakariyas e Nalag Ufat Karwai
1Ay nalag kyangay fiya ufat karwai nu kasure siginans buknga duwak bugsul tansu. 2Taguna fag karwai at tagguyud sik ngay kabayu maraska, ay at faduwak karwai at tagguyud sik ngay kabayu malayung, 3ay at fatuluk karwai at tagguyud sik ngay kabayu malagsi, ay at faufat karwai at tagguyud sik ngay kabayu gridrirukun. Kanya fagayu mabitsug tuwa. 4Ay nainto aw sa ka fag tagfabarita tagfasulitanan angku te, “Ku fun, nataw at masuwad ka fag ngay karwai?” 5Ay nabalus angku te, “Kanya ufat tagmara sas kiwang takadasug siginan tam Fun Diyus tagmagurang sas fagdaul daga. 6Ay ka fag ngay kabayu malayung nangadasug sa sik talun sas wala baliwa fag tigyangan. Ay ka fag ngay kabayu malagsi nangadasug sa sik talun sas fakayabian. Ay ka fag ngay kabayu ridrirukun, nangadasug sa sik talun sas siyun baliwa fag tigyangan.”
7Ay ka fag ngay kabayu at mabitsug, matarung nu glodloan sas fagdaul daga. Ay at tagfabarita nalong sanya fag ngay kabayu te, “Kin, asafungi wa sas fagdaul daga.” Ay nasafungan wa fiya sas fagdaul daga. 8Ay Yawi gbiya nu gelongan sa angku te, “Linggati ka fag ngay kabayu at kindasug sa sik talun sas wala baliwa fag tigyangan. Kanya tagfanabayan ku Falad sanya fag talun.”
Sik Sangbo sas Uswe
9Ay Yawi nalong angku te, 10“Buli Kelday, ay Tubiya, ay Yedaya at ngay famanyun fag ngay pilak ay gintu, ay nanlagi sas Sefanyas baguwama Usiya at bale. Kanya fag ufat at kinfoli siginans Babilunya at fakatabanan fag talun. 11Ka fag ngay pilak ay gintu faawati sik sangbo ay fasangboani sas Uswe sik fun taganyun. Uswe at tama Eusadak. 12-13Ay longi anya te, ‘Aw Yawi at Madaragang, glong aw te, “Sik taw at ngayan Sanga umke fagmabalanun ay gdog ban mawat ku bale. Ay kanya nanmagurang ay at ngay taw gfauseganan anya kata sik fun. Ay at taganyun umlindug sit day faglunggungan ay fag duwa umke fagmasadiun.”’ 14Ay ka fag sangbo fatsai ku bale. Kanya sik famaamatang sas Kelday,#6:14 Kelday: Sis Fangebriyu, Kelem. Tubiya, Yedaya, ay Usiya.#6:14 Usiya: Sis Fangebriyu, Ken. Usiya at tama Sefanyas.”
15Ay e ngay taw umdasug sas talun Israel siginan at ngayayu fag talun laman nantarabang nangawat Yawi bale. Ay nu mgurungan wa katanya, sumaful wam te, Yawi at Madaragang at nasugu angku sa ayu. Ay umgurungan wa fiya katanya nu maning tuwam fiya fiya Yawi tam Diyus.
Currently Selected:
Sakariyas 6: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines