Sakariyas 5
5
Sakariyas e Nalag sik Rirukan at Mafabilugan Nu Kalayug
1Ay nalag aw sik rirukan at mafabilugan nu kalayug. 2Ay at tagfabarita ginto angku te, “Nataw am nalag?” Ay nabalus aw te, “Sik rirukan mafabilugan kalayug. Nu ndain at kabaan 20k siyu ay at kadaulan 10k siyu.”
3Ay ka fag tagfabarita nalong angku te, “Sanya at marirukan sik ngay faurianan takadasug sas talun Israel. Ay sa sik day bilingan at rirukan fagayu takamul e mayan siginans talun Israel, ay sa yangay sik day bilingan at rirukan fagayu at nafatvngvd nu gelongan kamuwagan e mayan yangay. 4Yawi at Madaragang nalong te, ‘Gfadasug aw katanya fag faurianan sa takamul at bale ay anggan sas bale tagfatvngvd nu gelongan kamuwagan sa ku ngayan. Sanya way ban gugat sit bale yap ngay umrasras at bale.’ ”
Sakariyas e Nalag sik Mangena sad Sabi
5Ka fag tagfabarita at tagfasulitanan angku nsure yay fiya ay nalong te, “Linggati nu kin, taw nin takadasug?” 6Ay ginto aw te, “Inday?” Ay nabalus angku te, “Sik sabi.” Ay nalong yay fiya te, “Kanya sik fafaskudanan ngay taw at asalanan sas fagdaul talun Israel.”
7Ka fag sabi e suklub mabiyat. Ay nu nabul at suklub, manlag akdi sanya sik mangena malunggung. 8Ay ka fag tagfabarita nalong te, “Ka fag mangena sik fafaskudanan fagmauriun.” Ay kanya natun ka fag mangena sasad sabi ay nasuklub. 9Ay rodi tv e nalag akyay duwak mangena glayug kauba sis tagmara. At ngay fakfak kata manuk tagak at fakfak. Ay kanya naurug ka fag sabi ay nauba wan. 10Ay nainto aw sa ka fag tagfabarita tagfasulitanan angku te, “Dada ro nu guba ka fag sabi?” 11Ay nabalus angku te, “Sas talun Babilunya, nus nganday ban nu kawat at bale mandi. Ay nu ntabu wan nu kawat at bale, gfasakbo wan sanya ka fag sabi laman gseg sanya.”
Currently Selected:
Sakariyas 5: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines