Sakariyas 4
4
Sakariyas e Nalag Fagfatungkudan Salung fag Gintu ay Duwak Kayu Ulibu
1Ay ka fag tagfabarita tagfasulitanan angku gdog yay fiya nfoli ay nafulo angku anway kata nu natiyug aw. 2Kanya ginto angku te, “Nataw am nalag?” Ay nabalus aw te, “Nalag aw sik fagfatungkudan salung at fangawat gintu, ay sit tungud e taya fagsuwadan sik langis ulibu. Ay sit ngaba tigyangan e fituk salung ay kayu at sadi e fituk tubu langis fagdalanan. 3Ay e duwak kayu ulibu gsumbalian, at sadi sit siyun ay at sadi sit wala.”
4Ay nainto aw sas tagfabarita tagfasulitanan angku te, “Ku fun, taw manga kanya?” Ay nabalus te, 5“Go sangay wo gsaful at masuwad?” Ay nabalus aw te, “Idya.” 6Ay nalong angku te, “Bagu aw malus am fagintoun, dungugani yap Yawi at Madaragang at longan ay longi sas Sirubabel te:
“Sirubabel, fafatabui o nu kawat o ku bale bunwa siginans taw at kabitsugan ay bunwa siginans taw at fagsafulun, siginan tuwa ku Falad.#4:6 Falad: ay ate, fagmadaragangun. 7Ay dewa kadaw sik bugsul tagfasalag emu, gfafadatag wo fiya. Ay umtabu ku bale, ay kaduge fatungkud at taguyan fag batu, at ngay taw muro te, Masine! Masine!”
8Nu katanya, Yawi nalong angku te, 9“Sirubabel at naawat ku bale at fagmatungkudan ay kanya yangay tagfatabu.” Ay nu mgurungan wa ban fiya katanya, sumaful am te, Yawi at Madaragang at nasugu angku sa ayu. 10Ay ngayuk taw tagfalingun teway ya gbiya at nafaawat ku bale. Ay roro at ngay taw museganan nu lumag Sirubabel nu gfatungkud taguyan at mafilian fag batu. Ay Yawi at tagfabarita nalong angku te, “Kanya fag fituk salung Yawi wa mata tagulit sas fagdaul daga.”
11Nainto aw sas tagfabarita te, “Nataw manga at masuwad ka fag duwak kayu ulibu tagsis siyun ay tagsis wala fagsuwadan salung? 12Ay nataw manga at masuwad ka fag duwak sanga ulibu sis tigyangan duwak gintu tubu fagdalanan langis at riruk kata gintu?” 13Ay nabalus angku te, “Go wo nasaful at ngay masuwad?” Ay nabalus aw anya te, “Idya.” 14Ay nafoyung angku te, “At masuwad, e duwak taw at nafili laman nanfagbulun sas Fun Diyus tagmagurang sas fagdaul daga.”
Currently Selected:
Sakariyas 4: TAWEAST
Highlight
Share
Compare
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
