2 Wakorintho 3
3
Watumishi wa Ilagano Iwishi
1Ado tendedyowa kukukasa isi wenyi sena? Ango tanashaile barua zetimanyisa kwenyu, ango zifumagha kwenyu selyi wazima washayagha? 2Inyo wenyi ninyo barua yetu tiiwandike ngoloni kwetu, idimagha kumanyo na kushomo ni wandu wose. 3Nenyo mwaonekana kukala barua ya Kristo iyi isi tiihawane. Barua iyi siyiwandiko kwa wino anduangi, ela kwa Roho wa Mlungu ewo moyo; nayo siiwandiko ighulu ya kibalabala cha iwe, ela kele ngolo za wandu.
4Taghora hung'u kwa kukala tana chekoserea kwa Mlungu kwa ngila ya Kristo. 5Si kughamba tadima isi wenyi kudea kindu chingi, ela kudima kwetu kwafuma kwa Mlungu. 6Iye niye atidimisagha isi kukala watumishi wa Ilagano Iwishi, ilyi si Ilagano lyiwandiko kungi, ela ni Ilagano lya Roho. Kwani Sheria iwandiko yanaletagha kifwa, ela ya Roho yahawana umana.
7Ndamu ikakala Sheria iwandiko kele vibalabala va mawe iletagha kifwa, yanajile na ubwaa hata Waisraeli wakalemo ni kuzighana ushu ghwa Musa kwa undu ghwa ubwaa ghwake gholuo ghoitagha, 8aho sighuchumbagha ubwaa ghufumagha kele Roho! 9Ikakala koluo na ubwaa kwa ghulya ghuletile kutaghanyo, sikukalagha na ubwaa kuchumba kwa ghulya ghuletagha ukizi. 10Kwa fulo, kwakala, ghulya gholuo na ubwaa ghwasowa ubwaa ghwake, kwa undu ghwa ubwaa ghwa ghulya ghuichumbagha. 11Kwani ikakala chilya cheita chejile na ubwaa, chilya chetula ni suti chije na ubwaa ghuchumbagha.
12Ndamu kwa kukala tio na ikosereo ilyi, sitiwesi wogha ghungi. 13Isi sitio sa Musa anduangi, uyu eluo kefunga ushu ghwake na kitambaa eri Waisraeli siwaone kunangananga kwa ushu ghwake kukedua. 14Ela hata sani akili zawe zanafungilo; kwa kukala hata lelo ilyi Ilagano lya Kale lyashomo akili zawe zafungika; kwani ni kwa ngila ya Kristo mundu adima kufungulo ichi kitambaa. 15Fulo hata lelo, ngelo Sheria ya Musa yashomo ichi kitambaa chabula akili zawe, 16ela ilyi mundu amughalukila Bwana, kitambaa chafunyo. 17Bwana ni Roho na andu kuo na Roho wa Bwana kuo uhuru. 18Nesi itose tikekala sitefungilo ushu, tilangaze sa kilole ubwaa ghwa Bwana, tighalulo tikale sa iye tikejuzilika ubwaa. Iyi ni kazi ya Bwana ewo Roho.
Currently Selected:
2 Wakorintho 3: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993