2 Wakorintho 4
4
Mali ya Roho kele nyungu za ulongo
1Kwa kukala utumishi ughu tanaghupatile kwa undu ghwa mbazi ya Mlungu sitifwighagha ngolo. 2Taghamenya madeo ghose ghawase gha waya, sitighendagha kwa mikalo ango kuvurugha Ilagho lya Mlungu, ela kwa kughora ilya fulo mwazi takukasa hambiri ya Mlungu kwa kudea kila mundu kumumanya ngoloni. 3Nao ikakala Injili iyi tiichilagha yaviso, yaviso tu kwa walye welaghaya. 4Mlungu wa ughu urumengu niye awadea kukala vifondo wa akili awa siwedumusagha, eri siwaone mlangazi ghwa Injili ya ubwaa ghwa Kristo, uyu ewo wa ifwani lya Mlungu. 5Kwani isi sitikuchilagha isi wenyi, tamuchila Jesu Kristo kukala Bwana, na isi wenyi kukala nisi wasunyi wenyu kwa undu ghwa Jesu. 6Kwani Mlungu niye aghorire, “Mlangazi ghujelangaza kizeni”, naye walangaza akili zetu kutiletela mlangazi ghomanya ubwaa ghwa Mlungu kele ushu ghwa Kristo.
7Ela isi tio na mali iyi ya kiroho sa nyungu, yaonyeza kamba Mlungu niye ewo na ndighi na si isi. 8Tasirimiso kwa kila ngila, ela sitifwanyilofwanyilo; tapata wasi ghwa ngolo, ela sitifwighagha ngolo; 9tatiriro, ela sitisowagha uwaruri, tadaho tigwe, ela sitiulagho. 10Ngelo zose kele muli tatwala kifwa cha Kristo eri umana ghwa Kristo naghose ghuonekane kele mili yetu. 11Ngelo zose tio moyo tio kifweni kwa undu ghwa Kristo, eri umana ghwa Jesu naghose ghuonekane kele mili yetu yefwa. 12Kwa hung'u kifwa chio chikedea kazi kwetu, ela umana ghuo nenyo.
13Mawandiko gha Kuela ghaghora, “Neluo na idumusi kwa hung'u nikaghora,” Isi natose kwa kukala tio na ngolo ilya yenyi ya idumusi taghora; 14tikemanya kamba Uyu amzusile Bwana Jesu ujetizusa natose ngila mojori na Jesu na kutiika hambiri yake ngila mojori nenyo. 15Malagho agha ghose ni kwa undu ghwenyu eri mbazi ijuzilike kwa kujuzilika kwa mtalo ghwenyu, na makaso ghajule kwa ubwaa ghwa Mlungu.
Kukala Kele idumusi
16Kwa undu ughu lyingi sitifwighagha ngolo. Hata ngera sani mili yetu yekuoleni, ela kiroho tendedeo uishi kila ijua. 17Kwani matiriro agha ghawanguwe ni gha ngelo tu, ghetipatilagha malagho mabwaa gha ubwaa ghuisagha ghose. 18Kwani sitilolagha agha gheonekagha tu, ela talola na ghalye sigheonekagha. Kwani agha gheonekagha ni gha ngelo, ela ghalye sigheonekagha ni gha kale na kale.
Currently Selected:
2 Wakorintho 4: SAGALLANT
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Kenya, 1993