Luhzaz 14
14
Yezsuz Ya Goanz Pujchaej Ndang Foak Ux Ndae
1Miz Vaenz Cednoiq ux, Yezsuz mwz rownz goanz puj saeq dij goanz puj Fahliqsaiq ux jinkaeuj, daengzle zoq caqsiq lez dix. 2Zwz naeh, doqnaj Yezsuz miz goanz puj chaej ux baenz sowh chaej ndang foak naeh. 3Yezsuz daj sowh lauxswz aeu Sw Dij Sen zau daenh naeh daj dij goanz Fahliqsaiq hax: "Vaenz Cednoiq hawj ya chaej vah?" 4Paenqdix mboq goak. Yezsuz fowz goanz puj chaej naeh, ya aen chaej dix ndae, yaix dix daeq ni. 5Yaq daeuq daj paenqdix hax: "Vaenz Cednoiq, lug zaiz su rux dij moaz su doak bae ndaw mboq, su mboq cenq laeg dix kwnj maz maj?" 6Paenqdix dih hoakrawz yaeng mboq miz.
Laek Aeu Hoakri Hoak Dwx
7 Yezsuz leztaen puj qiag rownz goanz dij goanz puj Fahliqsaiq naeh lowg gaj pyaegzongz naengh, dix zoq aeu bixliq daj paenqdix hax: 8"Daenh qingj mawz mwz hoak qiag raep loz zwzrawz, laek naengh pyaegzongz, yaj puj qiag goanz qingj mawz naeh miz puj najta naengz dwx nyeuz mawz. 9Goanz qingj mawz naeh rux zowz goanz najta dwx nyeuz mawz naeh maz daj mawz hax: ‘Vanz mawz aeu aen naeh hawj dix naengh.’ Sowh gaunaeh, mawz zoq najyaij, dauh bae tangzongz naengh. 10Daenh qingj mawz zwzrawz, naengh tangzongz, taj goanz qingj mawz naeh maz daj mawz hax: ‘Dungzbownh, mwz baihnow naengh.’ Sowh gaunaeh mawz yuq doqnaj daengz zongz zux miz najta. 11Gawz aeu hoakri hoak dwx, gawz toj ndaej hoak ix mboqyaq; gawz aeu hoakri hoak ix, gawz toj ndaej hoak dwx mboqyaq."
12 Yezsuz daeuq daj goanz qingj dix naeh hax: "Mawz hoak byaeuz rux hoak ngaiz qingj daenh jin zwzrawz, laek qingj dungzbownh mawz, bihnongx ndiang mawz, bihnongx mawz, rownz haenzhenz sowh puj baenzsaq naeh, yaj paenqdix daeuq qingj mawz bae jin, paenqdix daeuq boiz mawz. 13Mawz qingj daenh maz jin zwzrawz, qingj sowh puj baenzluk naeh, qingj puj mboq miz qen ka naeh, qingj puj ka'ndiak, qingj puj ta'mbud. 14Paenqdix yowngh aeu gaeng mbaiq mawz mboq miz, taj taeng vaenz sowh puj gaemz hax mboq miz naeh daeuq zaeu zwzrawz, dij Sen toj miz gaenq aeu mbaiq mawz mboqyaq. Baenzzaqnaeh mawz zoq faengz yah."
Aen Bixliq Goanz Qingj Qiag Dwx Taeuq Naeh
15Sowh puj daj Yezsuz zaemh zongz naeh miz goanz ux biak suq kauq naeh yaq, zoq daj Yezsuz hax: "Sowh dij goanz mwznaj ndaej yuq goh dij Sen jinkaeuj naeh faengz yah!" 16Yezsuz daj dix hax: "Miz goanz ux hoak kaeujpyaek lai taeuq, qingj puj qiag goanz raengh taeuq. 17Baenz naengh zongz maz, dix nemz puj koij dix bae daj sowh puj dix qingj naeh hax: ‘Maz ndeh, gaj yowngh gaj hoak ndae eh.’ 18Gaj sowh puj dix qingj naeh goanz ux lej hax gaemz ux, goanz nduq hax: ‘Gux swx oax raeh ux, baenz mwz lez mbaed ux zuxbaenz, mboq ndaej mwz ej, vanz mawz haxdoq zaeujrownz mawz gux mboq ndaej mwz eh.’ 19Goanz mawq hax: ‘Gux swx sip do moaz, baenz bae ciq mbaed'ux zuxbaenz, vanz mawz haxdoq zaeujrownz mawz gux mboq ndaej mwz eh.’ 20Goanz mawq hax: ‘Gux hiamq aeu mez, mboq ndaej mwz eh.’ 21Goanz puj koij gaengnaeh dauh maz dih zaeuj dix, aeu suq kauq naeh haxdoq zaeuj dix, zaeujrownz zoq rik, daj puj koij dix hax: ‘Bae ndaw chaenh, hangz dwx hangz ix, zowz puj baenzluk, puj mboq miz qen ka, puj ta'mbud, puj ka'ndiak maz.’ 22Yaq puj koij dauh maz, hax: ‘Zaeuj aj, gux haeuz biak mawz bae hoak, gaj zongz naengz naengh mboq daem.’ 23Zaeuj zoq daj puj koij hax: ‘Mawz og ndaw chaenh bae, bae ka loh long, ka loh ix, laeg dij goanz maz, naengh daengz rownz gux daem nauq. 24Gux haxdoq su, sowh puj mbaednduq gux daz qingj naeh, goanz rawz goj mboq ndaej jimz kaeujpyaek gux.’"
Sowh Puj Zawx Hoak Cohsaenz Yezsuz Naeh Hoj Hoakzaqnaeh Hoak
25Miz yowngh boangx goanz daj Yezsuz zaemh mwz, Yezsuz ueq bae daj paenqdix hax: 26"Jixzawh gawz maz dih gux inxnaeh, mboq ngaiq gux nyeuz bohmeh hoakri, mijmez hoakri, lug hoakri, bihnongx zaiz hoakri, bihnongx nyingz hoakri, aen mingh hoakri, zoq mboq ndaej hoak cohsaenz gux. 27Gawz mboq baz maexngamzchaz hoakri nowngz gux, mboq venq cholaeng gux tai, gawz goj zoq mboq ndaej hoak cohsaenz gux. 28Gaenqsu miz saek goanz daengj rownz sung mboq suanq daekgoanq mux? Gawz goj suanq daekgoanq, lez bae gajrawz jenz, lez miz mboq miz jenz daengj. 29Jixzawh qix dej dix yaq, daengj daengz aen mboq baenz, gawz leztaen gawz goj kosaemj dix, hax: 30‘Goanz naeh naengz hax daengj rownz sung wzngah! Dix qix gaj dej dix yaq haeuz hoak mwz naj mboq baenz.’ 31Su ciq nwh, rux miz saek laux hongz mboq nwh ndae'ndowq daekgoanq zoq bae daj laux hongz ndai dungzsaeuh mux? Dix toj nwh ndae'ndowq daekgoanq, lez aeu fanh goanz bin ux bae daj laux lingz song fanh goanz bin naeh dungzsaeuh baenz mbaeuq. 32Jixzawh dix nwh ingj baenz mboq ndaej, dix toj sowh gau baihdaenh naengz yuq gvae naeh, zoq nemz dij goanz bae daj baihdaenh vanz dungzhoj. 33Baenzzaqnaeh, boangx su gawz gojndae, jixzawh mboq viangh gaenq hoakri nauq, zoq mboq ndaej hoak cohsaenz gux.
Sowh Gow Mboq Ndaengq Naeh
34"Gow zawh gaenq ndae, gaj jixzawh gow mboq ndaengq, naengz rux aeu gaeng hawj dix daeuq ndaengq mux? 35Sowh gow mboq ndaengq naeh, aeu dwk ndaw naz goj mboq baenz, aeu dwk ndaw pwnq goj mboq baenz, aeu viangh bae baihnog daengzhwx. Miz mbawchu rux biak, zoq caqsiq biak!"
Currently Selected:
Luhzaz 14: ZHN
Highlight
Share
Copy
Want to have your highlights saved across all your devices? Sign up or sign in
© 2023, Peace Publishing Co. All rights reserved.
