Ro i Som Muro 14
14
Pool hu Barnabas si lak findel i DeeƁwe ta Ikonyum
1Ta Ikonyum Pool hu Barnabas si wa ta mare i Ju fota ngga' ima si mana ti masani ta. Ta kyeli si findel ndere, ɗufal hyang ima a Ju, hu ima a Ju kwa si fa mwawei. 2Som i Ju ima si nggwes i fati mwawei, si shuk ɗufal ima a Ju kwa. Si hatat ti mulwat ames ya, si zan wei ti shunus. 3Ɓurti andi Pool hu Barnabas si yash ta ashwai fwet, ti mulut sin lak ti findel i Deembai. Deembai vo mas i muro maɗesi ta fisel i fasus masti ɗamam i shok na fo, hu i lum ti fo ya. 4Ɗufal i mashwai si matkarus, shini si vo fai i Ju, shini si vo fai i Som Muro i Yeso. 5Unai ɗufal ima a Ju kwa, hu Ju akul hu mbayai ames, si ɗak ti haisus ɓa si fa som muro i Yeso shum, si hwyaiyus ti afyai hwak.
6DeeƁwe kin som muro i Yeso si hali ya, unai si titalus. Si wis mbayai i ashwaha i Listra hu Derbe i ta' ti Likonya, si wa ashwaha i ɓwayai amet hwak. 7Ta kikyali si cu wei ti lak ti muro maɗesi.
Pool ta Listra
8Ta Listra maɗufal nin mata ima a gundung, tasi mwen tima si alus at kwa fweng. 9Shu mwal hal findel ima Pool yis laki. Unai Pool shus shishat hai, ɗingi mati fati mulut i wis ti cala, 10unai laiyus nyus, “Lukka fit, Teha mangra si sisai ama hai!” Ti hal ti mai, maɗufali nyan maɓwereng ta fit fur ɗa'at. 11Myan ima suɓut i ɗufal si ɗing aɗeng ima Pool masi, ra ti mat fo, si bom ti ambas ti alis i Likonya si ni, “Awei, ɓweha si ɗor na saa kanti ti lo'a' i ɗufal!” 12Si lai Barnabas ii Zeyus, Pool si laiyus ii Hames, ɓurti ayis mii mangkam i findeli. 13Makocok i harkyel Zeyus, ima puk ames mayus ta fai i ashwai, yes ti randwang hu mabuf i yitat i malem, shu ta fo i kwap i ashwai. Ma ɓweti suɓut ti ɗufal ɓa si tor kuna wa kyel i Pool hu Barnabas.
14Myan ima som muro, Barnabas hu Pool, si hal aɗeng ima ma wa, si gwyak arom ames ya ti futut, si rang ta suɓut i ɗufali ti tital sin raafo, sin nyai, 15“A ɗufal, ami kin hu maas ti aɗeng mai ya? Nin hwak a ɗufal fota hun. Ni kolu a muro maɗesi, ni ma laksu ɓa hu hon ɗamam i gbya', hu humkyel na kyel i DeeƁwe mapweti. Ayis ima mas fit hu fisha, hu yiir hu shak ɗamam ima si ta wii. 16Ai hwer, a yis hon ramam ɓa si zan fiselal ima si ɗingi ɗatus. 17Shak ta andi, hon haisus kaciwa' asum kwa. Yis kofu maɗesi, a yis faiyu foon ta fit, u kin cwaha amu ɓa u nung si myan ames hai, hu cu hu gwishil ti, u hya mulwat amu ti jakak.” 18Shak ta findelal mii yi, si shahus tor ti kuna wa kyel ames kwa.
19Unai shini Ju si yes ta Antyok hu Ikonyum, si wo hai i suɓut i ɗufali. Si hwyai Pool ti afyai, si kpukpongus si langtus ya ta takfai i ashwai, si ɗingi fota tuu motus. 20Ɗak ta takfai, som koltifai si shwai si nggarus ya, luk fit humkyel ta wii ashwai. Mwen ti ɓu yis hu Barnabas si wis Derbe.
Si Humkyel ta Antyok ta Sirya
21Takfai tima Pool hu Barnabas si mba muro maɗesi i DeeƁwe ta mbai ashwai, si wis som hyang ima si fa hai, ɓa si te ii som koltifai. Unai si humkyel ta Listra, hu Ikonyum, hu Antyok, 22sin fati som koltifai njeng, ɓa si ka' mwawei si fati mulut ima si mati. Si nyus, “A kpang kawo shum hyang timbe-timbe, ɗak ka lang ta kaitat i DeeƁwe.” 23Pool hu Barnabas si ben tabwa'a' ima ɓa si ɗing suɓut i som koltifai. Si fwal DeeƁwe tikul ta ka'ti fo ya tasi cwa hai, si kinus ta ra i Deembai ima si fa mulut si yis hai.
24Si sa ta ta' ti Pisidya ɗak si yes Pamfilya. 25Takfai tima si mba findel i DeeƁwe ta Pega, unai si ɗor si wa Atalya. 26Ta Atalya si lang kwang i ham, si humkyel ta Antyok, a nati ai si kinus ta ra maɗesi i DeeƁwe, ɓurti ro ima mwashi si mbit.
27Myan ima si ru, si suɓut som koltifai ta kyel andek shak, si lakus ngga' ima DeeƁwe mas ro ti sin ta, hu ngga' ima ɓu kwap ya ɓa Ramam si fa mwawei. 28Takfai ti andi, si yash ta kyeli fwet hu som koltifai yi.
Currently Selected:
Ro i Som Muro 14: AlisIRonNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2018
