Mǒhtûlû̌hǎhtûsa 35
35
Phaya̤kò getîkhî sô̌ dǒ Wî̤̌betelǎ
1Yî̤khôtô̤̌ Cǒmaradû̌ hî̌ Phaya̤kò kû̌, “Hǎhtò̌cû̌mò̌ dǒ Wî̤̌betelǎ dě cû̌ô̌ lô̌khô bǎnu, dě cû̌tèhtò̌ma̤htò̌ ta̤lṳhtò̌wǎ̤ kû̌ lǒ̤ dǒ lǎ̤cabahtò̌ kû̌ he tôwǎ̤, ma̤titèhî̌dě he mî̌ Cǒmaradû̌ dǒ a ô̌lṳ̌htò̌ bǎ na bǎ na hǎhtò̌cû̌ ô̌û̌ nawè̤̌ PhaĚtò̌ alǎ̤ akhanu hǒ.”#Mǒhtûlû̌hǎhtûsa 27:43, 28:11-22
2Pô̤̌nudě Phaya̤kò hî̌ ahǐphû̌phòphû̌ kû̌ kòyò dǒ a ô̌plǒ kû̌ lû̌û nu tokhlǒ kû̌, “Wîkèbò lô̌khô cǒmara ashǔshawa̤ ata̤yô̤ dǒ sî phî̌ǐ nutokhlǒ, ma̤mṳ̂̌plî sînǎ̤ dě sô̌htò̌ tèplè̌ lô̌khô sîjehǐyò̤̌ dǒ aplîbûsǔlǔ nutokhlǒ nî̌. 3Htopědě pa cû̌ dǒ Wî̤̌betelǎ tǎ, dě he gǔ cû̌ bǎ ta̤tèhtò̌nǐ̤ ta̤lṳ̌htò̌wǎ̤ kû̌ lǒ̤ dǒ lǎ̤cabahtò̌ kû̌ Cǒmaradû̌ aya bǎnu pě, a mî̌ bǎ he tṳ̌bǎ kû̌ ta̤gû̌ta̤gè̌ akhanu a hî̌bǎ kû̌ he dě he cû̌tǒ̤ bǎtètè̌ bǎbǎ a cû̌cukhacu kû̌ he.” 4Pô̤̌nudě lǒ̤bò cǒmara ta̤yô̤ ashǔshawa̤ dǒ asî phî̌ǐ nutokhlǒ kû̌ lǒ̤bò asî sèhtò̌ nò̌sè tokhlǒnu, a ǐ bò kû̌ Phaya̤kò, dě Phaya̤kò lǔlò̤bòkè bǎ Wî̤̌shake sǒmṳ̌dû̌ nutômṳ̌ alǎ̤. 5A ma̤hto pô̤̌nudě asî hǎhtò̌cû̌ akha, Cǒmaradû̌ ma̤ gònò̤̌gèglè ǐshabò kòyò ô̌ lô̌khô bǎ wî̤̌ ô̌ te̤we̤lû̌bò bǎnu akû tokhlǒ akhû̌akhî, kòyò gû̌ lṳ̂bǔ pe kû̌ asî nô̌kò tôpwǎ̤꤮ tô̤̌.
6Phaya̤kò kû̌ kòyò lǒ̤bò dǒ a ô̌ kû̌ lû̌û nutokhlǒ cû̌tǒ̤ lô̌khô dǒ Wî̤̌lǔsa, bǎ Khanagǎnu. Wî̤̌lǔsǎ nî̌ kòyò kaǎ pô̤̌ ami̤ kû̌ Wî̤̌betelǎ. 7Dě a cû̌tèhtò̌ma̤htò̌ měkè ta̤lṳhtò̌wǎ̤ kû̌ lǒ̤ bǎnu dě a kaǎ gûlǎ̤ nutûkû ami̤ kû̌ Betelǎ a Cǒmaradû̌. Ma̤titèhî̌dě bǎ Phaya̤kò hǎhtò̌khlè̌kè awè̤̌ PhaĚtò̌ lǎ̤ akhanu Cǒmaradû̌ dǔlṳ̌ lû̌û kû̌ anǎ̤ bǎnu tôkû.#Mǒhtûlû̌hǎhtûsa 28:19
8Yî̤khôtô̤̌, Mǒ̤tabûra mî̌ Mǒ̤ribè̌kha apwa̤ma̤ta̤phû̌ a sikè hǒ dě kòyò lǔlò̤kè yǎ bǎ sǒmṳ̌dû̌lǎ̤ Wî̤̌betelǎ lô̤̌kò gǎlǒ̤to̤kû nutôkû. Pô̤̌nudě kòyò kaǎ gûlǎ̤ nutôkû ami̤ kû̌ È̌lûbakhǔ. (È̌lûbakhǔ yô̤̌sǎyô̤̌mû mî̌ ta̤hǎta̤wô asǒmṳ̌dû̌.)
9Phaya̤kò ô̌ dǒ Pada aragǎkû dě a getǒ̤ htoyî̤ akhanu, Cǒmaradû̌ dǔlṳ̌ pô̤̌sô̌ anǎ̤ kû̌ a ginǐ̤plǎ tôplǎ, dě a ǐshowî̤ lû̌û.#Hû̌she 12:4 10Dě Cǒmaradû̌ hî̌ lû̌û kû̌, “Khònò̤̌, nami̤ kû̌ Khûya̤kò hò̌. Bǎbǎkǎlè pô̤̌ he hî̌ hto nanu, kòyò bǎ kaǎ pe nami̤ kû̌ Khûya̤kò tô̤̌. Kòyò bǎ kaǎ nami̤ kû̌ KhûIsôrěla pě.” Dě a pô̤kè lû̌mi̤ kû̌ KhûIsôrěla.#Mǒhtûlû̌hǎhtûsa 32:28; Khwǐ ginǐ̤bǎ tôbǎ 17:34
11Dě Cǒmaradû̌ hî̌ pô̤̌ lû̌û kû̌, “He mî̌ Cǒmara dǒ apô̤aphǎ tôpwa̤, phû̌ô̌wô̤̌li̤ô̌dû̌ lô̌khô dě ô̌wô̤̌ô̌dû̌htò̌ pû lô̌khô nî̌. He gǔ nohtûhtò̌ nakhlinalè tokhlǒ kû̌ khlilèphû̌dû̌ tôcǒ kû̌ khlilèphû̌ dû̌wî̤ khlilèphû̌ tokhlǒ pě.#Mǒhtûlû̌hǎhtûsa 28:3-8 Dǒ nakhlinalè akla tokhlǒnu, a gǔ htûhtò̌ tû̌ khwǐcôphǎ tokhlǒ pě. 12Hǎkhû̌ dǒ he ǐ kû̌ PhaAbraha kû̌ PhaIsè̌ nî̌ he ǐ kû̌ na hǒ. Dě hǎkhû̌nu he gǔ ǐlò̤ pô̤̌ kû̌ nakhlinalè lò̤tutṳ̌ dǒ nakò nutokhlǒ pěpě.” 13Cǒmaradû̌ hî̌bǎ hto kû̌ Phaya̤kò dě a gehtò̌ sô̌ bǎ a hî̌bǎǐ lû̌û nutôkû hǒ.
14Phaya̤kò dôihtǒ lǒ̤dû̌htǔ bǎ Cǒmaradû̌ lǎ̤hî̌bǎ ǐ lû̌ nutôkû, htodě a lò̌lò̤ sîpî̌shishǐyô̤̌ kû̌ htǒshi dǒ lǒ̤nu akhû̌ dǒ ta̤bè̌plò̌shǐhtò̌ lǒ̤ nutômè ayanu.#Mǒhtûlû̌hǎhtûsa 28:18-19 15Phaya̤kò kaǎ gesô̌ gûlǎ̤ dǒ Cǒmaradû̌ hî̌bǎlò̤ yǎ nutôkû ami̤ kû̌ Wî̤̌betelǎ, (Betelǎ amûasǎ mî̌ Cǒmaradû̌ ahǐ).
PhaIsè̌ kû̌ Mǒ̤rakhîlǎ ata̤si awe̤akè
16Htodě asî hǎhtò̌cû̌kè kû̌ Wî̤̌betelǎ bǎnu. Dě a cû̌tǒ̤ phǔ kû̌ Wî̤̌Ěphrata akhanu Mǒ̤rakhîlǎ sahtò̌ hǐphusha dě a shajî̌jû̌ lû̌û. 17Bǎ a phû̌ô̌lò̤ dě a shajî̌jû̌ mè̤̌ca lû̌ akhanu, pwa̤kè̌ǐma̤ǐ phû̌ô̌ nutôpwa̤ hî̌ lû̌û kû̌, “Ǐsha tǎ̤mǎ̤, ma̤titèhî̌dě na phû̌ô̌ nṳ̌pô̤̌ phû̌pwa̤khû tôpwa̤ hǒ.” 18Mǒ̤rakhîlǎ glè̌ si tètè̤̌ akhanu, a kaǎ aphû̌ kû̌ Khûbèò̌nǐ̤, bǎbǎkǎlè apha kaǎ lû̌mi̤ kû̌ Khûbîyame̤. (Bèò̌nǐ̤ yô̤̌sǎyô̤̌mû mî̌ phû̌khû dǒ he bǎ sǎplǎ̤sǎyṳ, bǎbǎkǎlè Bîjame̤ yô̤̌sǎyô̤̌mû mî̌ phû̌khû dǒ ahtû he cǔtômû.)
19Htodě Mǒ̤rakhîlǎ sikè dě kòyò lǔlò̤ lû̌û bǎ klè̌ lǎ̤cû̌ dǒ Wî̤̌ěphrata amè̤̌kû̌ Wî̤̌bè̌telehe nutôkû. 20Dě Phaya̤kò dôihtǒô̌ nṳ̌ ta̤sî̌yahtò̌ lǒ̤dû̌htǔ tômè bǎ Mǒ̤rakhîlǎ lṳ̌khû̌ nu, dě lṳ̌dû̌htǔnu tômè mî̌ a htû Mǒ̤rakhîlǎ alṳ̌khû̌ ata̤ma̤mǎnǎ tǒ̤khònò̤̌.
21Phaya̤kò#35:21 Phaya̤kò kû̌ PhaIsôrěla mî̌ tôpwa̤ nô̤̌ pwǎ. cû̌selě pô̤̌ klè̌ dě a cû̌ma̤htò̌ hǐphû̌ tokhlǒ dǒ Mǐkadǎ Ěda ahǐphû̌htò̌yô̤̌ lǎ̤ô̌pô̤̌ kè̌cû̌ a lô̤̌kò tôkhô.
Phaya̤kò kû̌ aphû̌pwa̤khû tokhlǒ
22Phaya̤kò ô̌ bǎ gûlǎ̤nu tôkû akha, Khûrǔbe genṳ̌ hǎmôô̌ kû̌ apha amanô̌ Mǒ̤bǐlaha dě ta̤we̤ta̤kènu dǒnô̌kòdě Phaya̤kò ganǎ̤de. Phaya̤kònu aphû̌pwa̤khû ô̌ shǐsò̌ginǐ̤.#Mǒhtûlû̌hǎhtûsa 47:4 23Phaya̤kò kû̌ Mǒ̤le̤a aphû̌wè̤̌pwǎ̤ mî̌ Khûrǔbe, htodě Khûsumeû, KhûLe̤wǐ, KhûYǔda, KhûIsakharô kû̌ Khûsabǔlû sî tokhlǒ hǒ.#Mǒhtûlû̌hǎhtûsa 46:8-15; Hǎplǎge 1:2-4 24Mǒ̤rakhîlǎ aphû̌pwa̤khû tokhlǒ mî̌ Khûyṳ̂tǎ kû̌ Khûbîyame̤. 25Mǒ̤rakhîlǎ ajû̌mǒ̤ Mǒ̤bǐlaha aphû̌pwa̤khû tokhlǒ mî̌ Khûda kû̌ Khûnatali. 26Mǒ̤le̤a ajû̌mǒ̤ Mǒ̤sǐlapa aphû̌pwa̤khû tokhlǒ mî̌ Khûgǎ kû̌ Khûasharô.
Lǒ̤bò asî tokhlǒ numî̌ Phaya̤kò aphû̌pwa̤khû tokhlǒhǒ, dě a ô̌phijǎlò̤bò lô̌khô dǒ Pada Aragǎkû.
PhaIsè̌ sikè
27Phaya̤kò getǒ̤sô̌ dǒ apha PhaIsè̌ lǎ̤ô̌ǐ Mè̤mare gûlǎ̤, dǒ a ô̌phǔ kû̌ Wî̤̌kǐriya Araba dǒ kòyò kaǎ pô̤̌ lû̌û kû̌ Wî̤̌hebrû nutôwî̤̌. Wî̤̌ nutôwî̤̌ mî̌ PhaAbraha kû̌ PhaIsè̌ cû̌ô̌ ma̤pô̤̌ shǐtèmè̤ wî̤̌ nuhǒ.#Mǒhtûlû̌hǎhtûsa 13:18 28PhaIsè̌ ô̌htûpwa̤ aně tôya̤ kû̌ shilǐ̤sô̌. 29A ô̌htûpwa̤ mǒ̤pwǎ̤ dakrô̌ dě a sikè. Dě aphû̌ PhaĚtò̌ kû̌ Phaya̤kò lǔǐ kè lû̌û.
Currently Selected:
Mǒhtûlû̌hǎhtûsa 35: KXF
Highlight
Share
Copy
Want to have your highlights saved across all your devices? Sign up or sign in
Wycliffe USA
