Maariko 14

Ekiina kya okwita Yeesu

(Mataayo 26:1-5; Ruuka 22:1-2; Yowana 11:45-53)

1꞉Gyariga gisigaaye nsiku ebhiri era, ibhe insikukuru ya Ipaasaka,#14:1 Ipaasaka. Ringira riingʼana rinu mu-Mangʼana Amakomeeye. na eya emikaate ginu gitatunduuye. Abhashengesi abhakuru na abheeyigisha bha ebhiraagiro bhya Musa ꞉bhaariga mbaagara injira ya okugwata Yeesu bhwiyibhise, insonga bhamwite. 2꞉Bhaariga mbaaika ati, “Isige okubha mu-kabhaga ka insikukuru, inkungu yaasiga okubha-wo mu-bhaanu.”

Omugasi kaasukira Yeesu amafuta

(Mataayo 26:6-13; Yowana 12:1-8)

3Akabhaga kayo Yeesu ꞉aariga ari mw-igunguri rya Bhetaaniya, mu-nyumba ya Simooni unu kara ꞉aariga ari mugenge. Bhunu ꞉aariga ari kw-igari ˆnaarya, ˆnaaja mugasi wumwi ari na inchupa irimo amafuta amarange ga bhugusi bhunene muno. Omugasi uyo ˆnaafundukura inchupa iyo, ˆnaasukira Yeesu ku-mutwe amafuta gayo okumukorera ekibharo. 4Abhaanu abhandi bhanu ꞉bhaariga bhari mu-nyumba iyo, mbabhiiyirwa mu-mitima gyebhwe. Mbaamba okwaika ati, “Bhamura! Kubhaki omugasi unu kaanyamura amafuta ganu kutyo? 5Amafuta ganu gakagusiibhwe dinaari magana gasatu,#14:5 Gakagusiibhwe dinaari magana gasatu. Ni ndiyo ya omukosi wa emirimu ya mwaka mugima. ngisakira abhatobhu.” Mbeesigiinyirira muno omugasi uyo.

6Nawe, Yeesu ˆnaaika ati, “Mumusige. Ndora omumunyansha? Omugasi unu aankorera engʼana ejomu. 7Abhatobhu muri nabho nsiku gyone kutyo. Omutura okubhakorera amajomu mu-kabhaga koonekoone mukeenda. Nawe, mutaribha na anye nsiku gyone kutyo. 8Omugasi unu aakora rinu aatura. Aatangata okuyaka omubhiri gwani amafuta#14:8 Okuyaka omubhiri gwani amafuta. ꞉Yaariga iri ntungwa ya Abhayawudi okuyaka amafuta omufuuye. Okuriingʼaana na Maariko 16:1. ganu insonga gwituure-wo okubhiikwa. 9Kimari enibhabhwira ati, woonewoone anu Amangʼana Amajomu aga Nyamuwanga gariraasibhwa mu-kyaro kyone kutyo, riingʼana rinu aankorera ryone riritogorwaga, okuyiita omugasi unu.”

Yuuda Esikariyooti keekirisha okurya Yeesu injeejemo

(Mataayo 26:14-16; Ruuka 22:3-6)

10Niwe Yuuda Esikariyooti, owumwi wa abheeyigira ekumi na bhabhiri abha Yeesu bharya, ˆnaagenda ku-bhashengesi abhakuru, okwaikana nabho, amugure. 11Bhunu ꞉bhoonguuywe amangʼana gayo, mbajomerwa muno. Mbamuraga okumuyaana giiyera. Niwe Yuuda ˆnaamba okwagara omwanya omujomu gwa okurya Yeesu injeejemo amugure.

Yeesu kaarya Ipaasaka na abheeyigira bhaaye

(Mataayo 26:17-25; Ruuka 22:7-23; Yowana 13:21-30)

12Ku-rusuku rwa okwamba orwa insikukuru ya emikaate ginu gitatunduuye, orusuku ruyo nirwo iingʼondi ya Ipaasaka#14:12 Iingʼondi ya Ipaasaka. Ringira Iingʼondi mu-Mangʼana Amakomeeye. ꞉yeetwaga, abheeyigira mbabhuusha Yeesu ati, “Angu oweenda uriire aaki Ipaasaka, kigende kikukorere-yo ebhyokurya?”

13Niwe Yeesu ˆnaatuma bheeyigira bhabhiri, ˆnaabhabhwira ati, “Mugende mu-musi agati. Omuuja okunyookana na omurume wumwi eetwikirega ekituumo kya amanji, mumuseete enu kaagenda. 14Mu-nyumba inu areengire, mugende mubhwire omwene nyumba ati, ‘Omwiyigisha kaabhuusha ati, “Ekyumba kyani ekya abhagenyi kiri aaki? Eneenda okuriira-mo ebhyokurya bhya Ipaasaka na abheeyigira bhaani.” ’ 15Omuunu uyo kaaja okubheeresha ekyumba ekinene kinu kiroosirisiibhwe mu-nyumba ingerekeene. Mukiroosishe muyo ebhyokurya bhya Ipaasaka.” 16Abheeyigira bhayo mbeemuka, mbagenda mu-musi agati. Mbanyoora goone kutyo gari rwa kutyo Yeesu ꞉aariga abhabhwiriiye, mbakora ebhyokurya bhya Ipaasaka.#14:16 Ringira Obhungʼaanyi 12:3-11.

17Bhunu yaayikire keegoro, Yeesu ˆneengira mu-nyumba iyo, na abheeyigira bhaaye bharya ekumi na bhabhiri. 18Bhunu ꞉bhaariga mbarya, Yeesu ˆnaabhabhwira ati, “Enibhabhwira ekimari ati, owumwi weemwe unu kaarya na anye anu, kaaja okundya injeejemo.” 19Abheeyigira bhaaye mbaamba okusurumbara. Mbabhuusha Yeesu wumwiwumwi ati, “Toga nitari anye?”

20Yeesu ˆnaabhabhwira ati, “Ni wumwi weemwe, mw-ikumi na bhabhiri, unu kaakosha omukaate amwi na anye mu-rutubha. 21Omwana wa Adaamu kaaja okwitwa, rwa kutyo akaamiiywe mu-Makaamo Amataakatiifu. Nawe, ariko ekiwi omuunu unu araamugure! Nyakara omuunu uyo atakeebhuuywe.”

Riigari rya Raatabhugenyi

(Mataayo 26:26-30; Ruuka 22:14-23; 1 Abhakorinto 11:23-25)

22Bhunu ꞉bhaariga mbarya, Yeesu ˆnaagega omukaate, ˆnaakumya Nyamuwanga, ˆnaagubhuturabhutura, ˆnaayaana abheeyigira bhaaye, ˆnaabhabhwira ati, “Mugege, omukaate gunu nigwo omubhiri gwani.” 23Kimwi ˆnaagega ekikombe kya iidivaayi, ˆnaakumya Nyamuwanga, ˆnaabhayaana, mbabhabhushaanya mu-kikombe kiyo bhoone kutyo. 24ˆNaabhabhwira ati, “Iidivaayi iyo nigo amaanyinga gaani aga iimuuma.#14:24 Iimuuma. Ringira riingʼana rinu mu-Mangʼana Amakomeeye. Amaanyinga gaani agaaja okwitika ku-nsonga ya abhaanu bhaafu. 25Kimari enibhabhwira ati, nitarinywa kweki iidivaayi, okuyikira ku-rusuku runu nirinywa iidivaayi iinyaaya mu-bhukama bhwa Nyamuwanga.” 26Mbamara mbeemba orwimbo rwa okukumangya Nyamuwanga.#14:26 Orwimbo rwa okukumangya Nyamuwanga. Abhayawudi ꞉bhaariga mbeemba Ijabhuri 113–118 mu-nsikukuru ya Ipaasaka. Bhunu ꞉bhaamarire okwimba, mbeemuka, mbagenda mu-kiima kya Emijeyituuni.

Yeesu kaaraga ati Peetero kaaja okumwigaana

(Mataayo 26:31-35; Ruuka 22:31-34; Yowana 13:36-38)

27Bhunu ꞉bhaariga bhari ku-njira, Yeesu ˆnaabhwira abheeyigira bhaaye ati, “Reero mu-ngeta, emwe mwone kutyo omuuja okunyiiruka. Rwa kutyo ikaamirwe mu-Makaamo Amataakatiifu ati, ‘Niribhuma omureefi, na giingʼondi girinyaragana.’#14:27 Ringira Jaakariya 13:7. 28Nawe nikamara okusuuka, eniija okubhatangatira okuja Gariraaya.”

29Niwe Peetero ˆnaamubhwira ati, “Raabhe bhoone kutyo bhakakwiruka, anye nitakutura okukwiruka.” 30Yeesu ˆnaamusubhya ati, “Kimari enikubhwira ati, reero, ingeta inu, insarigooko ikyari okukookoroma kabhiri, owubha waanyiigaanire kasatu.” 31Nawe Peetero ˆnaagenderera okukomeeresha ˆnaaika ati, “Raabhe ni kufwa na awe, niikirisiishe okufwa, nitakukwigaana wuri!” Abheeyigira abhandi bhoone mbaaika kutyo.

Yeesu kaasaasaama Nyamuwanga mw-isambu rya Getisemane

(Mataayo 26:36-46; Ruuka 22:39-46)

32Mmbe, mbayika mw-isambu rinu eritogwa Getisemane. Yeesu ˆnaabhwira abheeyigira bhaaye ati, “Mwikare anu, mu-kabhaga kanu anye enigenda okusaasaama Nyamuwanga.” 33Mbagenda na Peetero, Yakobho na Yowana, ˆnaagenda nabho areera kutooto, ˆnaamba okutitibhara muno, ˆnaanyanka mu-mutima gwaye. 34ˆNaabhabhwira ati, “Omwoyo gwani gusurumbaaye muno eniiyungwa muna kufwa. Mwikare anu, mukyeshe obhwire.”

35Yeesu ˆnaafugera-wo imbere kutooto, ˆneefumbika ansi. ˆNaasaasaama ku-Nyamuwanga ati, ikabha kujomu ku-Nyamuwanga, asige okuturira mu-kabhaga ka ebhinyansho kayo. 36ˆNaaika ati, “Abha,” insonga yeende-ko, Raata, “Amangʼana goone kutyo agaturikana ku-awe. Enikusabha usige okuntusha ku-bhinyansho bhiyo.#14:36 Ku-bhinyansho bhiyo. Mu-Kiyunaani ikaamirwe ati, ekikombe kinu. Nawe itari kutyo anye eneenda, tari ukore kutyo awe omwene oweenda.”

37Bhunu ꞉aasubhire ku-bheeyigira bhaaye abhasatu bharya, ˆnaabhanyoora bhawongeeye ntiro. ˆNaabhuusha Peetero, “Simooni, uwongeeye? Waataamibhwa okukyesha nsa yimwi era?” 38Niwe ˆnaabhabhwira ati, “Mukyeshe obhwire musaasaame Nyamuwanga, mwasiga okwingira mu-masakyo. Omwoyo gwikirisiishe, nawe omubhiri gutakutura.”

39Yeesu ˆneemuka kweki, ˆnaagenda okusaasaama, ˆnaasubhira amangʼana garyagarya. 40Bhunu ꞉aasubhire orwa akabhiri, ˆnaanyoora abheeyigira bhaaye bhawongeeye ntiro, kwa okubha ꞉bhaariga bhari na ntiro nyafu muno. Bhunu ꞉aabharamusiishe, ꞉bhaariga bhatari na rya kumusubhya.

41Yeesu ˆnaasooka kweki okusaasaama orwa akasatu, ˆnaabhabhwira ati, “Emwe mukyawongeeye, mukyamuunyire? Mmbe woori amangʼana geesa. Akabhaga ka ebhinyansho bhyani kari ayeeyi. Mwitegeereshe, Omwana wa Adaamu kaatuurwa mu-mabhoko ga abhakosi bha ebhikayo. 42Mwimuke, kigende, kwa okubha omuunu unu kaaja okundya injeejemo angure, ari ayeeyi.”

Yeesu kaagwatwa

(Mataayo 26:47-56; Ruuka 22:47-53; Yowana 18:3-12)

43Bhunu Yeesu ꞉aariga akyaroma gayo, ayoayo Yuuda, owumwi wa abheeyigira ekumi na bhabhiri, ˆnaayika na esangi enene erya abhaanu, bhari na ebhiraawa na gindungu. Abhaanu bhayo ꞉bhaariga bhatumirwe na abhashengesi abhakuru, abheeyigisha bha ebhiraagiro bhya Musa na abhakaruka bha Abhayawudi.#14:43 Abhashengesi abhakuru, abheeyigisha bha ebhiraagiro bhya Musa na abhakaruka bha Abhayawudi. ꞉Bhaariga bhari bhaanu bha riibharaja riikuru erya Abhayawudi. 44Yuuda omuri wa injeejemo wurya, ꞉aariga abhayaaye ekimenyegesho, abhabhwiriiye ati, “Omuunu unu niraabhuusu,#14:44 Niraabhuusu. Okuriingʼaana na gintungwa gyebhwe egya okukeeshaanya. uyo niwe Yeesu. Mumugwate, mumusire mumwangariiye.”

45Bhunu Yuuda ꞉aayikire, ˆnaagenda ku-Yeesu, ˆnaaika ati, “Mwiyigisha!” Kimwi ˆnaamufumbeera ˆnaamubhuusu. 46Abhaanu bhayo mbagwata Yeesu. 47Niwe, omuunu wumwi mu-bhanu ꞉bhaariga bhari amwi na Yeesu, ˆnaasoosha ekiraawa kyaye mu-ruubhu, ˆnaabhuma omugaya wa omushengesi omukuru, ˆnaamusaawura-ko okutwi.

48Yeesu ˆnaabhwira abhaanu bhayo ati, “Kubhaki omuuja okungwata muri na ebhiraawa na gindungu muna omuuja okugwata mwifi? 49Ndora nsiku gyone kutyo naariga niri amwi na emwe, niiyigisha mw-ibhanja rya riiyekaru rya Nyamuwanga, nawe ꞉mutaangwatire. Nawe ganu goone kutyo agabha kutyo insonga ganu ꞉gaakaamirwe mu-Makaamo Amataakatiifu, gakuumire.”#14:49 Ringira Jaakariya 13:7; Maariko 14:27.

50Niwe abheeyigira bhaaye bhoone kutyo mbamusiga ayo, mbabhirima. 51꞉Aariga ariwo mumura wumwi eebhoyerega ingibho ya iikitaani ˆnaaseetaga Yeesu. Omumura uyo woone mbamugwata. 52Nawe, ˆnaabhataatika-ko mbasigara bhagwatiriiye ingibho, omwene ˆnaabhirima ari kinaabhi.

Peetero keegaana Yeesu

(Mataayo 26:57-68; Ruuka 22:54-55, 22:63-71; Yowana 18:13-14, 18:19-24)

53Niwe abhaanu bhayo mbasira Yeesu ku-mushengesi omukuru.#14:53 Ku-mushengesi omukuru. Ringira riingʼana Abhashengesi mu-Mangʼana Amakomeeye. Abhashengesi abhakuru, abhakaruka bha Abhayawudi na abheeyigisha bha ebhiraagiro bhya Musa, bhoone kutyo mbasangira ayo. 54Peetero ꞉aariga ariwo areera ˆnaaseetaga Yeesu. ˆNaagenda, ˆneengira mw-ibhanja rya iinyumba ya omushengesi omukuru, ˆneekara muyo amwi na abhariisi, ˆnaabhiraga omuriro.

55Abhashengesi abhakuru na riibharaja rya Abhayawudi#14:55 Riibharaja rya Abhayawudi. Ringira riingʼana rinu mu-Mangʼana Amakomeeye. ryone kutyo, ꞉bhaariga mbaagara amangʼana ga okubheeyeresha Yeesu, insonga bhanyoore ekya okumwitira, mbabhurwa. 56Abhaanu abhaafu mbamubheeyeresha, nawe amangʼana geebhwe ngataashaanya. 57Abhaanu abharebhe mbayambaara, mbamubheeyeresha. Mbaaika ati, 58“Eswe abheene ꞉kyoonguuywe omuunu unu ˆnaaika ati, ‘Anye eniija okukambura riiyekaru rya Nyamuwanga rinu ryumbakirwe na amabhoko ga abhaanu, nimare niryumbake kweki kw-ibhaga rya nsiku esatu era. Rinu ritaryumbakwa na abhaanu.’” 59Goone kutyo ganu ꞉bhaaikaga, ꞉gaariga ngataashaanya.

60Kimwi omushengesi omukuru ˆnaayambaara agati weebhwe, ˆnaabhuusha Yeesu ati, “Ndora utakusubhya engʼana ryoneryone ku-ganu abhaanu bhanu abhakusitaakya?” 61Nawe Yeesu ꞉ataasubhiishe ryoneryone. Omushengesi omukuru ˆnaagenderera okumubhuusha ati, “Angu, ni awe Kiriisitu, Omwana wa Nyamuwanga unu kaakumangibhwa?” 62Yeesu ˆnaamusubhya ati, “Ni anye. Na omuuja okurora Omwana wa Adaamu eekaaye orubhaara rwa ebhuryo orwa Nyamuwanga#14:62a Ringira Ijabhuri 110:1. owa amanaga goone kutyo, ˆnaaja ari ku-meere.”#14:62b Ringira Daniyeri 7:13.

63Niwe omushengesi omukuru ˆnaakarura gingibho gyaye, ˆnaaika ati, “Kikyagara kweki abharori abhandi? 64Mwoongwa abheene kutyo keerengekanya na Nyamuwanga! Woori, emwe omwaika kutiki?” Riibharaja ryone kutyo ndiramura ati eetwe.

65Niwe abhandi mbaamba okufubhurira Yeesu, mbamusibha obhusu, mbamubhuma ebhikundi, enu mbamubhwiraga ati, “Bharikisha niga unu aakubhuma!” Abhariisi bhanu ꞉bhaariga bhari ayo, mbamugega, mbamubhuma ebhisaanyi.

Peetero keegaana Yeesu

(Mataayo 26:69-75; Ruuka 22:56-62; Yowana 18:15-18, 18:25-27)

66Akabhaga kayo koone kutyo, Peetero ꞉aariga ari anja mw-ibhanja, emwaro wa ekyumba kinu Yeesu ꞉aariga ˆnaasitaakibhwa-mo. ˆNaaja mugasi wumwi mu-bhakosi bha emirimu abha omushengesi omukuru. 67ˆNaarora Peetero ˆnaabhiraga omuriro, ˆnaamumogorera ameeso, ˆnaamubhwira ati, “Awe woone waawuri amwi na Omunaajareeti wurya Yeesu.” 68Nawe Peetero ˆneegaana ˆnaaika ati, “Anye nitakumenya na kinu owaaika!” ˆNaasooka ayo ˆnaagenda ku-kishooko kya iinyumba iyo. Ayoayo, insarigooko niikookoroma.

69Omugasi wurya kweki ˆnaarora Peetero, ˆnaamba okubhwira abhaanu bhanu ꞉bhaariga bhayambaaye ayo ati, “Omuunu unu woone ari amwi nabho.” 70Nawe, Peetero ˆneegaana kweki.

Nkatura-wo kabhaga kafuyi, abhaanu bhanu ꞉bhaariga bhayambaaye ayo mbabhwira Peetero ati, “Kimari awe woone uri amwi na abhaanu bhayo, kwa okubha awe woone uri Mugariraaya.” 71Nawe, Peetero ˆnaamba okwifuma na okurayira, ˆnaaika ati, “Nitakumumenya omuunu unu omwaika!” 72Ayoayo, insarigooko niikookoroma orwa kabhiri. Niwe Peetero ˆnaayiita amangʼana ga Yeesu ganu ꞉aaikire ati, “Insarigooko ikyari okukookoroma kabhiri, owubha waanyiigaanire kasatu.” Bhunu Peetero ꞉eeganiirisiishe amangʼana gayo, ˆnaarira.

Currently Selected:

Maariko 14: kya

Highlight

Copy