I Korintho 10
10
1Pakukita nilonda lepa, walongo, muye wangali kumanya kukita wakadadi witu woha wakayili pasi pa lifundi, na woha wakalutiti pagati pa nyanja; 2na woha wakabatasiki mwa Musa pa lifundi, ni pa nyanja; 3na woha walili kyakulya kikilakila kya roho; 4na woha wakanywili kyakunywa kikilakila: pakuya wanywaga pa liganga lila lya roho ili likawakisiti: leka liganga lila likayili Kristo. 5Leka na wingi wa awa Mulungu akawaganiti lepa; pakukita wakagwisiki pa mapululu. 6Leka ifi fikayili fiwalalilo fitu, nausi tisinyonyela fiwifu, umu wakanyonywili. 7Haka musiya wakugwilakimbo fifwilifwili ngati wangi wa awa; umu yilembekili, Nsafi wakatemi pasi kulya na kunywa, na wakayimiti kuhina. 8Haka tisifikita fiyaka, ngati wangi wa awa wakafikiti, na wakagwili pa ligono limonga maelfu makumi gawili na gadatu. 9Haka tisingesela Bambo, umu wangi wa awa wakangesiti, ni wakayanangiki na mayoka. 10Kawili musiniongoneka, umu wangi wakaniongonakili, na wakatagiki na wakuyananga. 11Leka ifi fikawagwilili kwa ndingo wa kiwalalilo; ni fikalembiki kutipela luhala, kwa tenga fikachili fyakumalakila fya miaka. 12Mumu uyu ahola kukita ayima alole wicho asigwa. 13Pawaka ligeseko likatolili mwenga, lema lya ntundu wa wandu: koma Mulungu wakukeleka, uyu yawaleke lepa mwenga kugeseka kulutila iki muhotola; koma pamonga na ligeseko yakite maluto gake kawili, nausi muhotole kugatwika.
14Kwa iki, wakuganika, mukimbilaye kugwilakimbo fifwilifwili. 15Nilongela ngati kwa wene luhala; mupaule iki nijowesa. 16Ntimbo wa kihomo uwu tiupela kihomo, si kuku kuhasangana kwa mwasi wa Kristo? Nkate uwu tiumetula, si kuku kuhasangana kwa mbili wa Kristo? 17pakuwona kukita tenga, tiyii wa mahele, tiyii nkate umonga, mbili umonga. 18Mulolaye Israel kwa ndingo wa nyama: si awa walyaga nyambiko wahasangana na mathbahu? 19Kiki mumu nijowa? kukita kindu kyakulekaleka nyambiko kwa kifwilifwili kiyii kindu, pangi kifwilifwili kiyii kindu? 20Koma nijowa kukita fila wa Mihuku walekelela nyambiko, walekelela madaimon, nukuya Mulungu: ni nilonda lepe kukita muhasangana nu madaimon. 21Muhotola lepa kunywa ntimbo wa Bambo, ni ntimbo wa madaimon: muhotola lepa kuhasangana nu mesa ya Bambo, nu mesa ya madaimon kawili. 22Pangi tindekelela Bambo wifu? ati tiyii wa makakala kundutila yombe?
23Fyoha fiyitikalika; koma fyoha nukulinganila. Fyoha fiyitikalika; koma nukuya fyoha fijengela. 24Mundu asilondalonda kyake mwene, koma kya yungi. 25Kiyi kyoha kihemeleka pa chengo kya nyama, mulyaye pangali kukota kandu ndawa ya chengo kya pa mwoyo; 26pakuya ndima uyii wake Bambo, ni mafwilaniso gake. 27Wona yumonga wa awa wangakela awakemelesa mwenga, ni mulonda kubita; kiyi kyoha kila kiwikiki palongolo pinu mulyaye, pangali kukota kandu ndawa ya chengo kya pa mwoyo. 28Koma wona mundu ajowa kwa mwenga, Iki kikalekaliki nyambiko, musilya, ndawa ya uyu akajowiti, ni ndawa ya chengo kya pa mwoyo; 29chengo kya pa mwoyo, nijowa, si kya wenga wamwene, koma kya yungi yula; pakuya kwa kiki ukamba wangu upaulika ni chengo kya pa mwoyo wa yungi? 30Wona nihasangana pa neema, ndawa kiki nipisika mbifu kwa iki nikisengusila? 31Mumu pangi mulya, pangi munywa, pangi kiyi kyoha mukita, mukitaye fyoha kwa kukwisika kwake Mulungu. 32Musiwakuwasa haka waYehudi, haka waGriki, haka kanisa lya Mulungu: 33ngati umu nenga kawili niwaganiseye woha pa fyoha, nukulondalonda lepa mbendo kwa namwene, koma wa wingi, nausi wayokoleke.
Currently Selected:
I Korintho 10: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.