I Korintho 11
11
1Muye wakunikisa nenga, ngati umu nenga kawili ninkisa Kristo.
2Leka niwalumba ndawa munikumbukila pa fyoha, ni mukamulila mawungu, ngati umu nikawapili. 3Koma nilonda mumanye kukita mutu wa ngosi ayi yoha ayii Kristo; leka mutu wa ndala ayii ngosi; leka mutu wa Kristo ayii Mulungu. 4Ngosi ayi yoha uyu asali pangi alweta, wona afwata kindu pa mutu, alekelela mutu wake lihamu. 5Koma ndala ayi yoha uyu asali pangi alweta pangali kwifwika pa mutu alekelela mutu wake lihamu: pakukita ayii telatela na uyu amoga. 6Pakuya wona ndala ayifwika lepa amogele ngani kawili: koma wona kuyii lihamu kwa ndala kumoga pangi kumoga nganila, ayifwike ngani. 7Pakuya ngosi nakulinganila lepa kwifwika pa mutu, pakukita ayii kihwanakiso nu kukwisika kwake Mulungu. 8Pakuya ngosi kipitile ndala lepa; leka ndala ngosi: 9pakuya ngosi nukupangika kwa ndala; leka ndala kwa ngosi: 10kwa ndawa iyi ndala ngatemi ni chengo pa mutu wake, kwa ndawa ya wamalaika. 11Koma nukuya ndala pangali ngosi, haka ngosi pangali ndala, mwa Bambo. 12Pakuya ngati umu ndala kipitile pa ngosi, mumu ngosi pa ndala kawili; koma fyoha kipitile pa Mulungu. 13Mupaule mwawene: ati kiyii kinofu kukita ndala ansalila Mulungu nakwifwika lepa? 14Si mapangiko gawene gawayigalisa? kukita, wona ngosi ayii ni mayunju matali, gandekelela lihamu? 15Koma wona ndala ayii ni mayunju matali, gayii kukwisika kwa yombe: pakukita mayunju gake gampelakiki kwa kwifwika. 16Koma wona mundu awoneka nyandomo, tenga tiyii lepa ni nkuwu wa ntundu uwu, haka makanisa ga Mulungu.
17Koma pakuwakila wiwi, niwalumba lepa, pakukita muhicha pamonga nukuya kutama wicho, koma kutama uwifu. 18Pakuya pakutumbula, apa muhicha pamonga pa kanisa, niyufwana kukita gayii mapatukano pa mwenga; ni lilundu lingi nikela. 19Pakuya kulinganile kuya pa mwenga mapatuliko, nausi wala walingika wanofu wamanyike pa mwenga. 20Mumu apa mukokanisana pamonga, ihotoleka lepa kulya kyakulya kya ndalilo kya Bambo: 21pakuya pakulya ayi yoha atola palongolo kyakulya kyake mwene; ni yungi ayii ni njala, na yungi agaliti. 22Kiki? muyilepe ni nyumba kwa kulila ni kunywela? pangi mulihepa kanisa lya Mulungu, ni kuwalekelela lihamu wala wayii nakyo lepa? Yanijowe kiki kwa mwenga? yaniwalumbe? niwalumba lepa. 23Pakuya nikayupiti pa Bambo kila nikawapili mwenga, kukita Bambo Yesu kilo kila akafumbuliki akatoliti nkate; 24leka apa akasengwisi, akametwili, nakajowiti, Uwu uyii mbili wangu pa mihalo ya mwenga: mukitaye iki kikumbukumbu kya nenga. 25Wiwi ntimbo kawili, panyuma pa kyakulya, kujowa, Ntimbo uwu uyii kilago kya hino pa mwasi wangu: mukitaye iki, payi poha yamunywe baho, pa kikumbukumbu kya nenga. 26Pakuya payi poha yamulye nkate uwu, ni kunywa pa ntimbo uwu, muwandisa kufwa kwake Bambo mpaka apa yaahiche. 27Kwa ndawa iyi ayi yoha uyu yalile nkate uwu ni kunywa pa ntimbo wa Bambo wangali kulinganila, yaaye ni nyimu ya mbili nu mwasi wa Bambo. 28Koma mundu ayilinganise mwene, na wiwi alye nkate uwu, na anywe pa ntimbo uwu. 29Pakuya uyu alya na anywa, ayilila na ayinywela lipaulo, wona alemiti kuuwalalila mbili wula. 30Kwa ndawa iyi wayii kwinu wingi wakulegaleka na wakulwala, wakuwalangika wagoniti. 31Koma wona tiyiwalalili, ngatipauliki lepa. 32Koma pala tipaulika, tiyambulika nu Bambo, nausi tikotoke kupaulika pamonga nu ndima. 33Mumu, walongo, apa muhicha pamonga kulya, mulindilane. 34Wona mundu awona njala, alyaye kwake; nausi musihicha pamonga kupaulika. Leka fyakusigala apa yanihiche yanifiwike pa mpambo.
Currently Selected:
I Korintho 11: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.