I Korintho 12
12
1Leka panani pa fya roho, walongo, nilonda lepa muye wangali kumanya. 2Mumanya kukita apa mukayili wa Mihuku mukatoliki kwa fifwilifwili fyangajowa, umu mulongokesili. 3Mumu niwamanyisa mwenga kukita pawaka mundu wakutawila ni Roho wa Mulungu ajowa, Yesu alapalakisi; na pawaka mundu ahotola kujowa, Yesu ayii Bambo, 4lema pa Roho Mbalafu.
5Gayii mapatuliko ga fya neema, koma Roho yuyulayula. 6Ni mapatuliko gakutumakila, ni Bambo yuyulayula. Ni mapatuliko gakuhenga lihengo, koma Mulungu yuyulayula, uyu ahenga fyoha pa woha. 7Leka kwa ayi yoha kukapeliwi kwilasa kwa Roho kwa kunogelana. 8Pakuya kwa yumonga kukapeliwi pa Roho lilowe lya luhala; na kwa yungi lilowe lya kupata kumanya, kwa ndingo wa Roho yuyulayula: 9kwa yungi kiyitakiso, pa Roho yuyulayula; na kwa yungi fya neema fya kulamisa, pa Roho yumonga; 10na kwa yungi makitiko ga mbafu; na kwa yungi kulweta; na kwa yungi kusihagula roho: kwa yungi misafi ya njowelo; na kwa yungi kukokosa njowelo; 11koma fyoha ifi afikita Roho yumonga yuyulayula, kugawila ayi yoha umu alondela.
12Pakuya ngati umu mbili uyii umonga, na uyii nafyo fipingili fingi, na fipingili fya mbili, pakuya fingi, fiyii mbili umonga; wiwi Kristo nuyombe. 13Pakuya pa Roho yumonga tikabatasiki mwa mbili umonga, pangi waYehudi, pangi waGriki, pangi wawanda, pangi wakamba; na tawoha tinywesiki pa Roho yumonga. 14Ndawa mbili nukuya kipingili kimonga, leka fingi. 15Wona kigulu yakijowe, Pakukita nenga nukuya kiwoko, nukuya kya mbili; nukuya wiwi nukuya kya mbili. 16Na wona likutu yalijowe, Pakukita nenga nukuya lya liho, nukuya lya mbili kawili; nukuya wiwi nukuya lya mbili. 17Wona mbili wa mfilimila ukayili liho, kuyii kuliku kuyufwana? Wona wa mfilimila ukayili wakuyufwana, kuyii kuliku kunusa? 18Koma hino Mulungu akawikili fipingili kimonga‐kimonga pa mbili, ngati umu kinganisiki. 19Leka wona kikayili kipingili kimonga kyakape, kuliku mbili? 20Koma hino fiyii fipingili fingi, leka mbili umonga. 21Ni liho nakuhotola kukijowela kiwoko, Nikulonda lepa: pangi kawili mutu kwa magulu, niwalonda lepa. 22Lepa, kulutila iki, fipingili fya mbili fila fiwoniki ngati fya ulegalefu filondeka: 23na fila fya mbili, ifi tifiwalanga kuya fyangali liginiko, fifi tipela liginiko lyakulutila; ni fyanganiambisa fya tenga fipata kuniambisika kulutila; 24leka fyakuniambila fya tenga filonda lepa kandu: koma Mulungu akawunganisi mbili pamonga, kupela kila kyakulepelela liginiko lyakuyoloka; 25nausi gasiya mapatukano pa mbili; koma kukita fipingili fiholehole kingi ni kiyini. 26Na wona kipingili kimonga kiwona lihumbuso, fipingili fyoha fihumbusika pamonga nakyo; pangi kipingili kikwisika, fipingili fyoha fihekelela pamonga nakyo. 27Leka mwenga muyii mbili wa Kristo, ni fipingili kiyi kyoha pa lilundu lyake. 28Leka wangi Mulungu akawawikiti pa kanisa, pakutumbula maapostolo, pakawili wakulweta, pakadatu walimu, panyuma pake mbafu, kawili fya neema fya kulamisa, fya kutangatila, fya malango, misafi misafi ya njowelo. 29Wila woha maapostolo? wila woha wakulweta? wila woha walimu? wila woha wa mbafu? 30wila woha wayii nafyo fya neema fya kulamisa? wila woha walongela ni njowelo? wila woha wakokosa? 31Koma mulonde‐londe fya neema fikulungu. Ni niwalasa ndila yinofu kulutila.
Currently Selected:
I Korintho 12: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.