I Korintho 14
14
1Mukise kiganano; leka mulonde‐londe fya roho, koma kulutila nausi mulwete. 2Pakuya uyu alongela ni njowelo alongela lepa na wandu koma Mulungu; pakuya pawaka mundu ayufwana; koma mwa roho alongela fyakuhyetu. 3Koma uyu alweta awalongelela wandu, kujengela, ni kukangamasa, ni kunyamasa. 4Uyu alongela ni njowelo ayijengela mwene wakape; leka uyu alweta alijengela kanisa. 5Leka nilonda mwenga mwawoha mulongele ni njowelo, koma mbanga mulwete: leka nkulungu ayii uyu alweta kulutila uyu alongela, lema akokosa, nausi kanisa lijengeke. 6Leka hino, walongo, wona niyicha kwinu ni kulongela ni njowelo, yaniwanogele mwenga kiki, lema niwalongelela kwa ndingo wa mafunukuliko, pangi wa kumanya, pangi wa kulweta, pangi wa mayigaliso? 7Haka fila fyangali wumi, pakupisa njwawila, pangi ni kitulilo pangi mhawala, wona filema kupeleka kyakupatusa pa njwawila syawe, yakimanyike wuli kila kiwukile pa kitulilo pangi mhawala? 8Pakuya wona kalumbeta kakuwa njwawila yangamanyika; nani yayiwikile ngani pa ngondo? 9Wiwi mwenga kawili, wona mulema kupeleka malowe gakumanyika, yakimanyike wuli iki kilongeleka? ndawa yamuye wakulongela waka pa nyingalila. 10Yiyii kwali misafi‐misafi ya njowelo pa ndima, ni haka yimonga yangali malumbo. 11Ni wona nilema kugamanya malumbo ga njowelo, yaniye kwa uyu alongela wakumamatila, nayombe uyu alongela kwa nenga wakumamatila. 12Wiwi mwenga namu, pakuya wa wifu wa fya roho, mulonde‐londe nausi mulutile kwa kulijengela kanisa. 13Kwa iki uyu alongela ni njowelo aluwe kukita akokosyaye kawili. 14Pakuya wona nisali pa njowelo, roho wangu usali, koma luhala lwangu lupata lepa fipambiko. 15Mumu kiki? Yanisali ni roho, leka yanisali nu luhala kawili: yaniyimbe nu roho, ni yaniyimbe nu luhala kawili. 16Ndawa wona upeleka kihomo nu roho, uyu atama pandu pa wangali kumanya yajowe wuli Amen pa kusengusa kwako, pakukita amanya lepa lila ujowa? 17Pakuya chakaka usengusa wicho, koma yungi ajengeleka lepa. 18Ninsengusa Mulungu ndawa nilongela ni njowelo kulutila mwenga mwawoha: 19koma pa kanisa nganilonditi kulongela malowe mhano nu luhala lwangu, nausi niwayigalise wangi kawili, kulutila malowe maelfu kumi pa njowelo.
20Walongo, musiya wana pa maholo ginu: leka pa fiwifu muye wakeke, koma pa maholo muye wakulungu. 21Pa torah yilembiki, Na wandu wa njowelo singi, ni milomo ya wangi yanilongele nu nsafi uwu; ni haka wiwi waniyufwanila lepa, ajowa Bambo. 22Mumu njowelo siyii kwa kiwalalilo, nukuya kwa awa wakukela, koma kwa awa wangali kukela: koma kulweta, nukuya kwa awa wangali kukela, koma kwa awa wakukela. 23Mumu wona kanisa lyamfilimila likokanasika pamonga, na woha wona walongela ni njowelo, na wona wayingila wandu wangawulika pangi wangali kukela, si yawajowe kukita muyii wakupenga? 24Koma wona woha walweta, na wona ayingila mundu wangali kukela pangi wangawulika, apisika chengo pa woha; 25apelewa mhalo na woha; na fyakufihika fya mwoyo wake filasika; na mumu pakugwa pa miho yangwilekimbo Mulungu, ni kuwandisa kukita chakaka Mulungu ayii pa mwenga.
26Mumu kiki, walongo? apa muyicha pamonga, ayi yoha wa mwenga ayii ni saburi, ayii ni liyigaliso, ayii ni lifunukuliko, ayii ni njowelo, ayii ni likokoseko. Fyoha fikitike kwa kujengelana. 27Wona mundu alongela ni njowelo, wawili wawili, pangi nukulutalila wadatu, ni pa kuyupilana; 28na yumonga akokose; koma wona payilepe wakukokosa, atame kinunu pa kanisa; na ayilongele mwene, ni kwa Mulungu. 29Leka wakulweta walongele wawili pangi wadatu, na wangi wahagule malowe. 30Koma wona lifunukulika kwa yungi wakutama baha, atame kinunu wakutumbula yula. 31Pakuya mwawoha muhotola kulweta yumonga‐yumonga, nausi woha wayiwule, na woha wakilike; 32ni roho sya wakulweta siwikikaye pasi pa wakulweta; 33pakuya Mulungu nukuya wa matimbilikano, koma wa kindamba; ngati pa makanisa goha ga wawalafu.
34Wadala watame kinunu pa makanisa: pakuya nukuyitikalika lepa kwa wombe kulongela; koma wayiwike pasi, umu torah yijowela. 35Leka wona walonda kwiyigalisa kandu, wakotaye wangwana wawe ku nyumba: pakuya kya lihamu kwa ndala kulongela pa kanisa. 36Kiki? lilowe lya Mulungu lipititi pa mwenga, ati? pangi likawahichili mwenga wakape?
37Wona mundu awoneka kukita ayii wakulweta, pangi wa roho, ayimanyise kukita ifi nifilemba kwa mwenga, fiyii mimbi sya Bambo. 38Koma wona mundu alema kumanya, aye wangali kumanya.
39Mumu, walongo wangu, mulonde‐londe kulweta, ni musikana kulongela ni njowelo. 40Koma fyoha fikitike pa kutendakeseka ni pa mpambo wawe.
Currently Selected:
I Korintho 14: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.