I Korintho 15
15
1Niwamanyisa, walongo, evangel yila nikawandisi kwa mwenga, yiyi kawili mukayupiti, pa yila kawili muyima, kwa yila muyii mu kuyokoleka; 2wona mukamula ngani malowe gake umu nikayiwandasili kwinu, lema mwakeliti waka. 3Pakuya nikawapili mwenga palongolo lili nikayupiti nenga kawili, kukita Kristo akafwili pa mhalo wa sambi situ kwa ndingo wa malembo; 4ni kukita akawikiki pa linyinja, ni kukita akasyusiki ligono lya kadatu kwa ndingo wa malembo; 5ni kukita akambonakili Kefa; panyuma pake akawawonakili kumi na wawili wala; 6panyuma pake akawawonakili walongo kulutila mia mhano lukumbi lumonga, wa awa wingi wahwela mpaka hino, leka wangi wamaliti kugona; 7panyuma pake akambonakili Yakobo; panyuma pake akawawonakili maapostolo woha; 8leka pakumalakila, akaniwonakili nenga, ngati lihoposa. 9Pakuya nenga niyii na nchoko wa maapostolo, wakulinganila lepa kukemeleka apostolo, pakukita nikalihyungiti kanisa lya Mulungu. 10Koma pa neema ya Mulungu niyii iki niyii: ni neema yake yila yikapeliwi nenga yikayili lepa ya waka; koma nikahengiti lihengo lingi kulutila woha: leka nukuya nenga, koma neema ya Mulungu yila yikayili pa nenga. 11Mumu haka nenga, haka wombe, wiwi tiwandisa, na wiwi mukakeliti.
Na wona Kristo awandasiki kukita akasyusiki pa wakufwa, 12wajowa wuli wangi wa mwenga kukita pawaka kusyuka pa wakufwa? 13Koma wona payilepe kusyuka pa wakufwa, Kristo nuyombe asyusiki lepa pa wakufwa: na wona Kristo asyusiki lepa, 14kuwandisa kwitu kuyii kwa waka, kiyitakiso kinu kya waka kawili. 15Ena, tiwoneka walungamakiso wa mageya wa Mulungu; ndawa tikandungamakili Mulungu kukita ansyusiti Kristo: uyu akansyusiti lepa, wona wakufwa wasyusika lepa. 16Pakuya wona wakufwa wasyusika lepa, haka Kristo nuyombe asyusiki lepa: 17na wona Kristo asyusiki lepa, kiyitakiso kinu kiyii kya waka; muyii pa sambi sinu mpaka hino. 18Na awa kawili wagoniti mwa Kristo watagiki. 19Wona pa wumi uwu wakape timhuwalili Kristo, ngatipwelakaliki lipyana kulutila wandu woha.
20Koma hino Kristo asyusiki pa wakufwa, kyakulosa kya wakugona. 21Pakulola kukita kwa mundu kufwa, kwa mundu kawili kusyuka pa wakufwa. 22Pakuya ngati umu mwa Adam woha wafwila, wiwi kawili mwa Kristo woha yawakitike wakulama. 23Koma ayi yoha pa mpambo wake: Kristo kyakulosa; panyuma pake awa wa Kristo, pa kuyicha kwake. 24Bahapa pakumalakisa, apa yamfumbulile Mulungu, yuyu Dadi, utwa; apa yawuse ukulungu woha ni chengo kiyi kyoha ni makakala. 25Pakuya alinganila mwene kuya mutwa, mpaka yawawike wa mitumba wake woha pasi pa njayo syake. 26Wa mitumba wakumalakila yawusike kiki kifwa. 27Pakuya, Akawikiti fyoha pasi pa njayo syake. Koma apa ajowa, Fyoha fiwikiki pandu pawe pasi, kiwoneka kukita alemiti mwene uyu afiwikiti fyoha pasi. 28Na apa fyoha fimalasiki kuwikika pasi pake, bahalapala Mwana kawili yawikike pasi pa yombe uyu akawitiki fyoha pasi pa yombe, nausi Mulungu aye fyoha pa fyoha.
29Pangi wakubatasika kwa awa wakufwa yawakite wuli? Wona wakufwa wasyuka lepa, kwa kiki wabatasika kwa wombe? 30Kwa kiki titama mu filugu saa iyi yoha? 31Nilapila pa kuhikalila kwinu, walongo, kula niyii nako mwa Kristo Yesu Bambo witu, nifwa ligono ni ligono. 32Wona kwa ndingo wa wandu nikakomini ni fikoko pa Efeso, mbendo kiki niyii nayo? Wona wakufwa wasyukika lepa, tilye, tinywe, pakukita kilau tifwa. 33Musisoweseka: Kusyowelelana na wakuwipa kuyananga mikuwu minofu. 34Muyimukaye pa ugolofu, ni musikita sambi; pakuya wangi wayii wangali kummanya Mulungu: kuwalekelela mwenga lihamu nilongela.
35Koma wangi yawajowe, Wasyusika wuli wakufwa? nu mbili wa ntundu wuli wayicha nawo? 36Wenga mhimu, iki ukipanda wenga kilama lepa, wona kilema kufwa: 37na kila ukipanda, upanda lepa mbili yauye panyuma, koma lungele lwa waka, ya trigo kwali, pangi ya ntundu wungi; 38koma Mulungu ayipela mbili umu alondela, ni kwa mbeyu iyi yoha mbili wa yene yakape. 39Nyama yoha nukuya nyama yimonga: koma yingi yiyii ya wandu, ni yingi ya fikoko, ni yingi ya fidege, ni yingi ya somba. 40Kawili yiyii miwili ya kunani, ni miwili ya pa ndima: koma kukwisika kwa yila ya kunani kuyii kungi, na kwa yila ya pa ndima kungi. 41Kuyii kukwisika kwa lijuwa, na kungi kwa mwesi, na kungi kwa ndondo; pakuya lutondo lulekana nu lutondo luyini pa kukwisika. 42Ni wiwila kusyuka kwa wakufwa. Kupandika pa kuyanangika; kusyusika pa kukwisika: 43kupandika pa kulegeleka; kusyusika pa makakala: 44kupandika pa mbili wa nyama; kusyusika pa mbili wa roho. Wona uyii mbili wa nyama, uyii kawili wa roho. 45Wiwila yilembiki kawili, Mundu wakutumbula Adam akakitiki wumi wakulama. Adam wakumalakisa roho wakulamisa. 46Koma nukuya kya roho palongolo, koma kya nyama; ni panyuma pake kila kya roho. 47Mundu wakutumbula ayii wa ndima, wa lidupi: mundu wa kawili ayii wa kunani. 48Wa ntundu wa lidupi, wa ntundu uwu wa lidupi: na wa ntundu wa kunani, wa ntundu uwu wa kunani. 49Na umu tikakitiki kuhwanangana na wa lidupi, yatikitike kawili kuhwanangana na wa kunani.
50Leka iki nijowa, walongo, kukita nyama nu mwasi nukuhotola lepa kuyingila lipwela pa utwa wa Mulungu; haka kuyanangika kuyingila lepa lipwela pangali kuyanangika. 51Mulolaye, niwajowela kyakuhyetu, nukuya tawoha yatigone lugono, 52koma tawoha yating’anamusike, pakukupila liho, pa kalumbeta kakumalakila: pakuya kalumbeta yakakuwe na wakufwa yawasyusike wangali kuyanangika, ni yating’anamusike. 53Pakuya kuyanangika uku nakulekeka kufwatika pangali kuyanangika, nu kufwa uku nakulekeka kufwatika pangali kufwa. 54Koma apa kufwa yakufwatakike pangali kufwa, bahalapala yalipate kuya lilowe lila lilembiki, Kifwa kikamiliki pa kuhotola. 55Kiyii kuliku kifwa kuhotola kwako? Kiyii kuliku kifwa kuwina kwako? 56Kuwina kwake kifwa kuyii sambi; ni mbafu ya sambi yiyii torah: 57koma kusengusa kwa Mulungu, uyu atipela kuhotola pa Bambo witu Yesu Kristo. 58Mumu, walongo wangu wakuganika, muye wakutamasika, nukunyukanyuka lepa, kulutila magono goha pa mahengo ga Bambo, pakukita mumanya kukita mahengo ginu nukuya ga waka mwa Bambo.
Currently Selected:
I Korintho 15: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.