II Korintho 1
1
1Paolo, apostolo wa Kristo Yesu kwa kilondo kyake Mulungu, na Timoteo ndongo witu, kwa kanisa lya Mulungu ili liyii pa Korintho, pamonga na wawalafu woha awa wayii pa ndima wa mfilimila wa Akaya: 2Neema kwinu ni kindamba kuhuma pa Mulungu Dadi witu nu Bambo Yesu Kristo.
3Apelewe kihomo Mulungu nu Dadi wa Bambo witu Yesu Kristo, Dadi wa malipyana nu Mulungu wa kunyamasa kwoha; 4uyu atinyamasa pa mahumbuso gitu goha, nausi tihotole kuwanyamasa wala wayii pa lihumbuso liyi lyoha, pa manyamasiko aga tinyamasika nago tawete nu Mulungu. 5Pakuya umu mahumbuso ga Kristo gayolokela pa tenga, wiwi kawili manyamasiko gitu gayolokela pa Kristo. 6Koma wona tihumbusika, kuyii kwa kunyamasa nu uyokosi winu; pangi tinyamasika, kuyii kwa kunyamasa kwinu, kula kuhenga pa kuyumalakila mahumbuso gagaga tiyufwana tenga kawili: 7ni kihuwalilo kitu kikangamasika pa mwenga; pa kumanya kukita, umu muyii wakuhasangana pa mahumbuso, wiwila pa kunyamasa kawili. 8Pakuya tilonda lepa muye wangali kumanya, walongo, panani pa lihyungiko litu likatigwilili pa Asia, kukita tikatopasiki kulutila nyamhope, kulutila makakala gitu, mpaka pa kutaga kihuwalilo kitu kya kulama: 9ena, tenga tawete, tikapatiti lipaulo lya kufwa mugati mwitu, nausi tisihuwalila pa tenga tawete, koma pa Mulungu uyu awasyusa wakufwa: 10uyu akatifuwusi pa kufwa kwa ntundu uwu, na yatifuwule: uyu timhuwalila kukita yatifuwule kifuwulile; 11mwenga kawili wakutangatilana pamonga pa mihalo ya tenga pa maluwo ginu; kukita, kwa ndawa ya kya waka kila kyatipeliwi na wa mahele, wa mahele wasenguse pa mihalo ya tenga.
12Pakuya kwilumba kwitu kuyii uku, ulungamakiso wa chengo kya pa mwoyo, kukita pa uwalafu ni pa chakaka kwa Mulungu, nakuya pa luhala lwa kinyama koma pa neema ya Mulungu, tikayili ni matamilo gitu pa ndima, na kulutila kwa mwenga. 13Pakukita tiwalembela ifi fyakape, aga mugasoma na kawili mugayitakila, ni nihuwalila kukita yamugayitakile mpaka pakumalakisa: 14umu kawili mukatiyitakili muhana umonga, kukita tenga tiyii kulumba kwinu, ngati umu mwenga kawili muyii kulumba kwitu, pa ligono lya Bambo Yesu.
15Ni pa kihuwalilo iki nikayili nu mwoyo kuwachila mwenga palongolo, nausi mupate neema ya kawili; 16ni kuluta pa mwenga mpaka pa Makedonia, na kawili kuhuma pa Makedonia kuwachila mwenga, ni kupelekeseka nu mwenga pa mwanja wangu mpaka pa Yudaya. 17Mumu, apa nikayili nu mwoyo uwu, nikawoniki wa mioyo yiwili ati? pangi fila nikawikiti kufikita, nifiwika kwa ndingo wa nyama, nausi yiye kwangu ena ena ni lepa lepa? 18Koma umu Mulungu ayii wakukeleka, lilowe litu kwa mwenga liyilepe ena ni lepa. 19Pakuya Mwana wa Mulungu, Yesu Kristo, uyu akawandasiki pa mwenga nu tenga, nu nenga nu Silvano nu Timoteo, akayili lepa ena ni lepa, koma pa yombe yiyii ena. 20Pakuya haka fiyii filago fya mahele fya Mulungu, pa yombe yiyii ena: na kwa iki pa yombe kawili yiyii Amen, kwa kukwisika kwake Mulungu pa tenga. 21Leka uyu atitamisa pamonga nu mwenga mwa Kristo, ni akatibakisi, yuyu Mulungu; 22nuyombe kawili akatikomalili, na atipili kinogelo kya Roho pa mioyo yitu.
23Koma ninkemela Mulungu kwa ndungumakiso wa wumi wangu, kukita kuwapwelekela lipyana nikalekiti kufika pa Korintho. 24Si kukita tiyii wabambo wa kiyitakiso kinu, leka tiyii wakutangatila pa kuhekelela kwinu: pakuya pakukela muyima kiyimile.
Currently Selected:
II Korintho 1: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.