II Korintho 2
2
1Pakukita nikiwikiti namwene, kukita nakuwachila lepa mwenga pa kawili pakuniongoneka. 2Pakuya wona niwaniongonesa mwenga, nani yanisangalukise, lema uyu akaniongonesiki nu nenga? 3Leka nikalembiti iki kyene, nausi wona nihicha, nisiniongoneka kipitile pa wala nilinganila kuhekelela kwa ndawa ya wombe; pa kuhuwalila pa mwenga mwawoha, kukita kuhekelela kwangu kuyii pa mwenga mwawoha. Pakuya kipitile pa kuhumbusika 4kwingi ni kufinyisika mwoyo nikawalembili na masoli ga mahele: nakuya nausi muniniongoneseke, koma nausi mumanye kiganano kila niyii nakyo kiyolokile pa mwenga.
5Koma wona mundu aniongonesela, nakuniongonesa nenga nani, koma muhana umonga (nausi nisitopelesa nyamhope) kwa mwenga mwawoha. 6Kundingalila mundu wa ntundu uwu kuyambulisa kula kipitile pa wa mahele; 7mpaka pa kipula mbanga mundekelekese ni kunnyamasa, asimilika kwali mundu wa ntundu uwu na kuniongoneka kwa kuyoloka. 8Mumu niwapembesa mukangamase kawili kiganano kwa yombe. 9Pakuya pa iki kawili nikalembiti, nausi nimanye kulinganila kwinu, pangi muyii wa kuyufwanila pa fyoha. 10Koma uyu mundekelekesa kandu, nenga kawili: pakuya iki nenga kawili nalekelakisi, wona nalekelakisi kandu, kwa ndawa ya mwenga nalekelakisi, ngati Kristo mwene; 11nausi tisinyakika nu kunyonyela kwake Shetani: pakuya timanya mitego yake.
12Leka apa nikachiti pa Troa kwa ndawa ya evangel ya Kristo, ni apa ndyango pakadindulikili nenga mwa Bambo, nikapatiti lepa kindamba pa roho wangu, 13ndawa nikankolili lepa Tito ndongo wangu: koma apa nikawapili kwaheri nikalutiti mpaka pa Makedonia. 14Koma kunsengusa Mulungu, wakutipela magono goha kuyangala mwa Kristo, ni wakulasa kinogelo kinofu kya kumanya kwake pa tenga pandu poha. 15Pakuya tiyii kinungalilo kya Kristo kwa Mulungu, pa awa wayii mu kuyokoleka, na pa awa wayii mu kutagika; 16kwa yumonga kinungalilo kya kifwa pa kifwa; na kwa yungi kinungalilo kya kulama pa kulama. Na kwa ifi nani alinganila? 17Ndawa tenga nakuya kihwanakiso kya wingi, kulihemela lilowe lya Mulungu: koma ngati wa chakaka, ngati wa pa Mulungu, pa miho pa Mulungu, tilongela mwa Kristo.
Currently Selected:
II Korintho 2: MGS1937
Highlight
Copy
Compare
Share
Want to have your highlights saved across all your devices? Sign up or sign in
First published by the British and Foreign Bible Society in 1937.